2013/2014

Do mesmo xeito ca en anos anteriores, o noso alumnado de 1º e 2º de Bacharelato visitou facultades da Universidade de Santiago o 19 de febreiro. Coidamos que foi unha experiencia interesante para os nosos rapaces e rapazas pois, dalgún xeito, supuxo o primeiro contacto co seu futuro próximo: os estudos universitarios. Ben certo é que algúns alumnos quedaron moi satisfeitos coa visita á facultade elixida por eles mesmos e outros non tanto, xa que consideraron que a explicación fora excesivamente teórica ou moi xenérica, ou mesmo porque non tiveron tempo para realizaren preguntas. Porén, a opinión unánime é a de que foi unha actividade que debe seguir realizándose en anos vindeiros. Pola tarde, gozaron dun percorrido pola zona monumental. Voltaron ao serán, cansos pero contentos.

O catedrático da Universidade de Santiago, Alberto Bugarín, membro do Departamento de Electrónica e Computación estivo no noso centro para achegar aos nosos rapaces e rapazas información relativa aos estudos universitarios na Universidade de Santiago de Compostela. Estivo acompañado do noso prezado alumno Abel Lorenzo, que compartiu co noso alumnado de 1º e 2º de Bacharelato as súas experiencias como alumno universitario.

Agradecémoslle moito ao profesor Bugarín a súa presenza no noso centro e aledámonos moi especialmente de podermos ver ao noso alumno Abel e de sabermos dos seus triunfos e da súa satisfacción nesta nova etapa da súa vida.

Os rapaces e rapazas da ESO que cursan a materia de Relixión Católica tiveron a oportunidade de asistiren a unha proxección da película “La bicicleta verde”, dentro da semana de Cine Social que organiza “Cáritas” no Colexio “Salesianos” de Vigo.

“La bicicleta verde” é unha película xermano-saudita, dirixida por Haifaa Al-Mansour no ano 2012; foi a primeira longametraxe dirixida por unha muller na historia de Arabia Saudita.

Outra realidade, outra situación, outra maneira diferente de ver o mundo… a través da mirada dunha nena.

O día 24 de xaneiro, o alumnado de 2º de ESO e o de 4º de Diversificación realizou unha visita ao edificio Sarmiento do Museo de Pontevedra. Trátase dun edificio construído entre 1685 e 1714 e malia ser, desde o ano 81 un dos inmobles que componen o Museo, foi rehabilitado recentemente.

Os nosos rapaces e rapazas pudieron contemplar o seu fermosísimo interior, que garda importantísimos fondos arqueolóxicos da Prehistoria e da Antigüidade. Puideron tamén ver mostras da arte galega medieval ata o século XIII, coleccións de louza de Sargadelos, cerámica de Pontecesures e unha selección de alfares nacionais. Igualmente pudieron tomar contacto cos mellores pintores e escultores contemporáneos (Miró, Picasso…) a través dunha colección particular doada ao Museo.

Velaquí unhas fotos que dan mostra do que contamos:

Alumnos e alumnas de 2º de Bacharelato matriculados en Relixión Católica realizaron unha fermosísima e interesantísima visita a Roma e Florencia. Amais de visitar o Coliseo, as prazas Navona, a Fontana de Trevi, a basílica de San Pedro coas Scavi, o barrio de Trastevere, o Baptisterio da catedral de Florencia, as capelas Mediceas, a ponte Veccia… e tantos outros lugares, aínda tiveron tempo para pasearen polo mercadiño de San Lourenzo, tomaren un xelado en Giolitte, pasearen tranquilamente. En definitiva: coñecer, aprender e gozar. Que envexa non podermos estar todos alí!!