Paradela

Ao longo desta semana estivemos conmemorando o Día internacional contra a violencia de xénero, e que mellor forma de facelo co noso alumnado de Educación Infantil que a través de contos, como “Maruxa” de Eva María Mejuto Rial, “Nos tratamos bien” de Lucía Serrano e/ou “O libro dos porcos” de Anthony Browne; conto que sorteou a ANPA entre os nenos e nenas de cada aula do CRA pola súa participación nun mural para o 25N “Que ninguén che corte as ás”, e que está exposto no Multiusos do Concello de Meis.

Pero ademais tamén quixemos deixar a mesma mensaxe na nosa escola a través da pegada das nosas mans, todas unidas contra a violencia de xénero, e que poderán ver nas ventás da aula de Paradela.

 Preme sobre a imaxe

Pouco máis podemos dicir desta xornada salvo que oxalá chegue o día onde non teñamos nada que conmemorar.

Nós seguiremos educando en igualdade día tras día. E como dixo María Montessori: "Sementade nas nenas e nenos ideas boas, aínda que non as entendan; os anos encargaranse de descifralas no seu entendemento e de facelas florecer no seu corazón”.

A principios deste mes enviamos unha nota ás nosas familias pedindo que nos trouxesen algúns "tesoritos de outono" para realizar unha e mil propostas durante as próximas semanas con todos eses elementos. Pero para poder utilizalos, antes de nada tiñamos que clasificalos, o que nos permitiu seguir desenvolvendo as nosas habilidades lóxico-matemáticas e avanzar na adquisición de novo vocabulario. Proposta sinxela, pero moi enriquecedora, ou non?

 Preme sobre a imaxe

Ademais de propostas de libre circulación -con aforo- polos diferentes espazos de aprendizaxe da aula, onde teñen actividades sinxelas para que poidan levalas a cabo de maneira autónoma. Xa son uns expertos!

E, finalmente, unha proposta onde nenos e nenas puideron experimentar coas diferentes cores desta estación e que usaremos para decorar a nosa entrada da escola. 

Como dixo Paolo Crepet: "Unha boa escola é aquela na que o neno entra limpo e volve a casa sucio. Quere dicir que xogou, divertiuse, pintouse a si mesmo, utilizou os seus propios sentidos e entrou en contacto físico e emotivo con outros".

Ambiente de Samaín, disfraces, photocall, música e un obradoiro de cociña previo á merendola que fixemos cos nosos compañeiros e compañeiras.  

Este ano iniciamos o curso compartindo cos nosos compañeiros e compañeiras algunhas das aventuras que vivimos durante o verán: reencontros familiares, visita a museos, a acuarios, ao zoo... , tardes de praia, de piscina... E que mellor maneira de facelo que en compañía das nosas familias que conseguiron transportarnos a eses recordos a través da vista, coa observación de diferentes fotografías; do gusto e do olfacto, coa degustación de doces caseiros; do oído, coa lectura de contos, e do tacto, coa manipulación de cunchas, pedras... e un experimento para crear area!

 Preme sobre a imaxe