Do 19 ao 21 de Novembro celebrouse en Tecnopole, un centro de investigación e desenvolvemento de San Cibrao das Viñas, en Ourense, a novena edición da GALICIENCIA, unha festa da ciencia en Galicia. Todo un luxo onde decenas de mozos e mozas de toda Galicia e parte de España, levan os seus proxectos de investigación científica, social ou humanística e os presentan perante centos de persoas que pasan pola carpa durante tres días. Nesta ocasión o CPI de San Sadurniño estivo representado dentro de concurso por un proxecto de secundaria (fabricación de Biodiesel) e fóra de concurso por outro de primaria (fabricación de xabón). E mira por onde...David Santos e Carlos Martínez (que representaban aos 12 alumnos e alumnos de 4º ESO que o curso pasado desenvolveron o proxecto en cuestión) levaron o 3º premio na categoría de 2º ciclo de ESO polo minucioso e complexo estudo das condicións de síntese de biodiesel a partir de aceite usado de cociña.
Os nosos parabéns para todos eles: alumnos/as, profesores, dirección do centro e organismos colaboradores como o Concello, porque entre todos acadamos un éxito máis neste camiño que estamos a seguir por unha educación diferente e participativa.