Como ben sabedes, o pasado mércores 17 conmemorouse o Día das Letras Galegas. Este ano o autor homenaxeado é Carlos Casares (Xinzo de Limia, 1941- Nigrán 2002). Desde a biblioteca do noso centro, fixemos unha selección dalgúns dos seus libros (A galiña azul,  Toribio contra o profesor Smith ou Lolo anda en bicicleta) e incorporamos material novo como As miñas primeiras Letras Galegas, da colección dos Bolechas. Agardamos que gocedes coa súa lectura! 

Hoxe, 15 de maio, conmemoramos o Día Internacional da Familia e desde a biblioteca do centro queremos impulsar a lectura no fogar. Porque a lectura tamén é afecto, coñecemento e tolerancia; que mellor que compartila coas persoas que máis queremos. 

Chegou maio! O mes das letras e as flores! Desde o EDLG, e coa colaboración do alumnado, realizáronse uns fermosisímos maios que decoraron varios recunchos do noso centro. E así de espectacular permaneceu a entrada da biblioteca!

Ademais, a ocasión permitiu afondar no estudo da flora autóctona (xestas, fieitos, fiúnchos...). Xa sabedes que na nosa biblioteca tamén podedes consultar libros sobre esta temática.

Xa temos na nosa biblioteca a colección de Everest "Do A ao Z con...". Trátase dunha recompilación de poesía de grandes poetas galeg@s (Castelao, Rosalía, Neira Vilas, Pondal...) a través de voces contemporáneas e con fermosísimas ilustracións. Non perdades detalle!

Hoxe, 21 de marzo, celébrase o Día Internacional da Poesía.  No centésimo aniversario da poeta Gloria Fuertes, que dedicou gran parte da súa obra ao público infantil, queremos aproveitar a ocasión para convidarvos a ler poesía. Na nosa biblioteca atoparedes libros da súa autoría e doutr@s poetas. Moitos versos para tod@s!

O pasado 8 de marzo conmemoramos o Día Internacional da Muller. Desde a biblioteca, seleccionamos un conxunto de libros, que ao noso entender, contribúen a rachar con estereotipos sexistas, formando e educando na igualdade todos os días do ano. Deixámosvos cunha ilustración, Matrioskas, de Leandro Lamas, que preside o noso taboleiro.

O pasado 24 de febreiro celebrouse o Día de Rosalía de Castro. Desde a biblioteca reivindicamos a súa figura coa exposición de breves textos da autora galega. Asemade, aproveitamos a ocasión para recomendarvos a lectura dalgúns libros coma este da editorial Tambre, Miña casiña, meu lar (que tedes dispoñible na biblioteca).

O pasado 11 de febreiro conmemorouse o Día Internacional da Muller e a Nena na Ciencia. Desde a biblioteca do centro seleccionamos unha serie de contos ilustrados, da editorial ALBA, na que se destaca, entre outras, a vida e obra de protagonistas coma Marie Curie. Doutora en Ciencias e profesora na Universidade de París, foi a primeira persoa en recibir dous premios Nobel. Se queredes pescudar máis, animámosvos a tirar deste fío.

O pasado 30 de xaneiro celebrouse no centro o Día Escolar da Non Violencia e da Paz. Esta data coincide coa morte de Mahatma Gandhi, referente mundial en prol dos dereitos humanos. Desde a biblioteca quixemos facer fincapé neste día a través dunha selección especial de libros sobre esta temática e coa exposición duns paraugas impregnados de noticias violentas, que nos convida á reflexión. Por conseguinte, a nosa mensaxe é clara e meridiana: as nosas armas sempre serán os libros. A lectura fainos libres, amig@s!