O alumnado de Servizos de Foz realizou unha xincana gastronómica por Ribadeo. Esta idea permitiulles coñecer numerosos locais de hostalería da localidade así como aos seus propietarios.

O IES de Foz agradece a colaboración dos establecementos que puxeron o seu selo aos participantes e tamén a Susana Álvarez pola organización da actividade e o seu acompañamento.

A iniciativa foi posta en marcha pola aula de emprendemento do IES de Foz.

O garda civil da Comandancia de Lugo, Héctor Méndez Fernández, acudiu a unha charla no IES de Foz sobre a violencia contra a muller. O alumnado de 3º de ESO tivo a oportunidade de ver unha realidade presente na nosa sociedade, unha lacra que debemos combatir entre todos.

Méndez, que é un dos responsables do Plan Director, compartiu coas rapazas e os rapaces moita información sobre un feito que ten presenza no debate social dende hai relativamente pouco tempo.

Un grupo de alumnas e alumnos de Formación Profesional do Instituto de Foz participaron na xornada de presentación de Innovatech FP. O equipo que acudiu á cita coordínase dende a aula de emprendemento.

Os rapaces e as rapazas que participaron na cita darán resposta ao reto proposto pola empresa Diesemm Events sobre turismo deportivo.

Dous alumnos do ciclo superior de Dirección de Cociña do IES de Foz, Brandon Ticona e Laura López, están realizando prácticas en Praga dende o pasado 1 de outubro. O establecemento no que están traballando é o hotel Eurostars Thalia da cadea hoteleira Hotusa.

Esta actividade está encadrada dentro do programa Erasmus+ polo que seis alumnos se beneficiarán dunha estadía de prácticas en Europa.

O alumnado de 3º e 4º de ESO acudiu este venres 24 de novembro a unha actividade de iniciación á orientación deportiva. A proba celebrou en Viveiro, concretamente no Roq Park.

Esta iniciativa enmárcase dentro do programa Xogade da Xunta de Galicia. Trátase dunha modalidade deportiva na que o obxectivo é realizar un percorrido marcado nun plano sobre un terreo con puntos de control no menor tempo posible.