O IES de Foz recibiu unha mención especial na VII edición do concurso 'Cantamos con las manos' da Federación de Asociacións de Persoas Xordas de Galicia. Alumnado e profesorado do instituto participaron na elaboración dun vídeo ao son da canción 'Morriña', do grupo Baiuca.

O premio do xurado foi para o CRA de Culleredo, na Coruña, e o premio do público para o CEIP de Ardán, en Marín. As outras mencións recibíronas o CEIP Novo Mesoiro da Coruña, e o IES Xesús Taboada Chivite, de Verín.

O alumnado de 4º de ESO acudiu a unha nova charla do Plan Director da Garda Civil. Neste caso, tratou sobre ciberseguridade, apostas deportivas e algún que outro tema de actualidade relacionado co mundo web.

A conferencia forma parte dunha serie de charlas nas que se advirte sobre os perigos de Internet, unha ferramenta moi beneficiosa se se lle dá un bo uso e moi prexudicial en caso de que se careza de información sobre a súa utilización.

O alumnado de Servizos de Hostalería do IES de Foz deu a coñecer no certame FP Innova a miniempresa creada no centro e que se chama Sanus. Os asistentes ao evento poderán degustar algunha das cinco variedades de batidos que se ofrecen: Antiinflamatorio, Antioxidante, Minuscol, Detox e Supervit.

A miniempresa xorde dentro do programa Lanzadeiras patrocinado pola Fundación Alcoa. Os alumnos e alumnas do instituto encárganse de servir as diferentes variedades de batidos para todos os que desexen degustalas.

O instituto conmemorou o Día Mundial da Saúde baixo o lema 'A miña saúde, o meu dereito', salientando o acceso universal a servizos de saúde de calidade e á importancia dos coidados diarios para unha vida máis saudable. Un ano máis, este día serve de base para programar unha serie de actividades durante abril e maio, que terán como eixo central a saúde física e mental do noso alumnado. O primeiro deles consistiu en que o profesor de Educación Física, Adrián Levoso, impartiu unha charla sobre hábitos de vida saudables ao alumnado de 1º da ESO.

Ademais, tamén se celebrou un obradoiro para o alumnado de Ciencias de 4º de ESO e de 1º de Bacharelato impartido por profesores da Universidade da Coruña sobre como empregamos as matemáticas, a física, a química e a bioloxía para avaliar a condición física.

En sintonía coa saúde física e mental, o alumnado de 2º de ESO acudiu a Ribadeo para a celebración do Día da Educación Física na Rúa con máis de 600 participantes de centros educativos da Mariña. A temática deste ano foron os Xogos Olímpicos. Durante a xornada deportiva puideron practicar hockey, atletismo, balonmano, baloncesto, skate, judo, bádminton, voleibol, rugby, remo, tenis de mesa, golf e tenis.