MARZO, MES DA IGUALDADE
No noso IES aproveitamos a celebración do 8M para adicar o mes a
realizar actividades que poñan o foco na reivindicación da igualdade real
entre homes e mulleres.
Para nós todos os días son 8M e marzo é o Mes da Igualdade.
Alumnas e alumnos de diferentes cursos acompañaron aos profesores Kito
Parada, Lidia Bermúdez e Andrea Pérez a unha representación teatral no
Auditorio do Grove no marco do Proxecto Mulleres en Acción -
Violencia Zero da Deputación de Pontevedra. As marabillosas Xela
Marx e Elsa Pereira e a súa obra "A tecedora do tempo" mostráronnos,
dende a perspectiva da personaxe mítica de Ariadna, o paso do tempo na
vida das mulleres esquecidas. Unha performance que nos fai reflexionar
sobre o lugar que debemos ocupar na sociedade como personaxes activas
e loitadoras.
Tamén contaremos, ao longo do Mes da Igualdade, con varios obradoiros
sobre oficios, historias, testemuñas e proxectos de mulleres senlleiras e
próximas a nós que loitan día a día pola igualdade.
Ademais, o venres día 10 recibimos a visita de Esther Buela ao noso
centro. Veciña de Vilanova de Arousa dende fai uns anos, Esther
mostrounos a súa historia a través da súa testemuña. Unha historia de
dor, sacrificio, maltrato, violencia e sobre todo superación. Un
camiño de superación que Esther acompaña a diario con charlas de
divulgación en centros coma o noso, narrando a súa historia para que
alumnas e alumnos de diferentes idades vexan en primeira persoa como se
mostra a violencia dende os seus inicios.
Dende o Faro das Lúas agradecemos infinitamente a Esther a súa
cercanía, humanidade e xenerosidade neste día.
O 8M e a literatura
A Biblioteca do Faro das Lúas e o Departamento de Igualdade
presentounos unha mostra dalgunhas das escritoras máis relevantes na
literatura galega e tamén internacional. Dende Xela Arias
ata Virgina Woolf pasando por María Hesse, creamos un recuncho de
lectura onde o noso alumnado pode ver, ler, tocar e falar de todas as obras
presentadas. Esperamos que vos guste!
Deixámosvos cun pequeno vídeo-resumo das actividades e coa posibilidade
de descargar todas as fotos premendo nesta ligazón.
