Eventos

Nestes últimos tempos seguro que xa oistes falar de termos como ventilación cruzada, ACH ou ppm de CO₂. Desde o comezo da pandemia os científicos teñen investigado arreo sobre a propagación do coronavirus a través do aire, porén aínda falta moita información sobre o tema. Desde Proval queremos participar neste esforzo poñendo en marcha unha rede de medidores nas aulas con distintos prototipos feitos polos departamentos de Electrónica e Tecnoloxía, coa colaboración do departamento de Física e Química para a definición de protocolos e análise de resultados. Estamos traballando en prototipos conectados á rede, illados, con pantalla ou sen ela, que miden varios parámetros como dióxido de carbono, temperatura, humidade ou luz ambiente, con alarma vía web e incluso que envían información por Telegram. O alumnado tamén participa no deseño e montaxe dos prototipos e no estudo da información recollida.

Hai poucos días a Consellería concedeunos un Proxecto de Innovación no que temos como socios á empresa Hermes Smart Control e o IES Val Miñor, aos que queremos agradecer a súa participación xa que sen eles un proxecto colaborativo como éste non sería posible. O IES Proval actuará como centro de desenvolvemento e ensaios, a empresa creará o seus propios medidores e explorará a viabilidade comercial do sistema e o Val Miñor aportará traballos previos e tamén servirá de centro de ensaios. A concesión do proxecto e o orzamento asociado permitirá mellorar o sistema, estender a rede de medida e facer actividades de divulgación.

Os primeiros medidores xa están en funcionamento e os datos poden consultarse na web: http://codos.meteoproval.es