CPI PADRENDA CRESPOS

Durante o mes de abril de 2024, o noso alumnado participou en dúas xornadas de deporte escolar en Cartelle (fútbol-sala) e en Ramirás (bádmington).

En Cartelle, os alumnos e alumnas de 5º e 6º xogaron cos rapaces de A Valenzá e Entrimo.

E en Ramirás, participaron rapaces e rapazas de Primaria e da ESO pertencentes a diferentes colexios da comarca: O Ruxidoiro de Barbadás, San Marcos de Cartelle, Rogelio García Yañez de Ramirás, Curros Enriquez, Sagrado Corazón e Xoaquín Lorenzo de Celanova, Aquis Querquenis de Bande e Santa María A Real de Entrimo.

Un total de 137 rapaces e rapazas!

Parabéns a todos e todas e especialmente a Gabriel, Candela e Gabriela (2º ESO), Uxía e Daniel (3º ESO) e Juan (4º de Primaria) que conseguiron medallas!

O alumnado de 4º da ESO estivo en Barcelona do 11 ao 14 de abril de 2024 co motivo da súa viaxe de fin de etapa.

Visitaron os barrios de Gràcia, Gótico, La Barceloneta, El Raval...; viron a Sagrada Familia, o acuario, o zoo, o Parque Güell; e fixeron unha ruta polas obras máis emblemáticas de Gaudí.

O luns 15 de abril visitamos a Residencia "Nosa señora do Socorro" de Arnoia para unha xornada de convivencia cos nosos maiores. O alumnado de primaria e ESO cantaron unhas cancións tradicionais animando aos usuarios da residencia e organizaron distintos xogos (de mesa, de lanzamento, de retos...) que tiveron moi boa acollida.

Quedamos moi agradecidos/as, especialmente co persoal da residencia que se implicaron no desenvolvemento de todas as actividades.

Ademais, tivemos a oportunidade de gozar das vistas dende o mirador e de xantar e xogar no centro social de Arnoia para rematar esta xornada.

Ao longo dos meses de abril e maio de 2024, todo o alumnado do centro participará no ciclo de charlas organizado polo Departamento de Orientación baixo o título "A nosa diversidade". César e Cristina, da cooperativa "Leirar na leira" de Pontedeva, animarán estes talleres desde Infantil ata 4º da ESO.

Diversidade corporal e familiar, autoconcepto, identidade, bo trato, educación afectivo-sexual son algúns dos temas que se van debatir nas aulas.

O mércores 13 de marzo a asociación Aixiña xunto con COGAMI (Confederación Galega de Persoas con Discapacidade) invitáronnos ás súas instalacións. Alí, tivemos a sorte de escoitar o relato de Camila, Lalo, José Manuel e Carlos que nos explicaron os retos aos que se enfrontan as persoas con discapacidade. Ademais, José Manuel (deportista paralímpico en Londres e Brasil) xunto con Elena ensináronnos o xogo do Boccia, un deporte moi difícil e que eles practican á perfección. 

Todo o alumnado de Padrenda participou activamente nas distintas actividades propostas e volveron encantados por esa experiencia única!