Act. Complementarias e Extraescolares

UN DÍA NA PRAIA. ILLA DE AROUSA

O pasado martes 12 de xuño, o alumnado de 3º e 4º de Educación Primaria fomos de excursión á Illa de Arousa. Achegámonos ao Parque Natural de Carreirón onde desfrutamos dunha ruta de sendeirismo pola costa observando as calas de area branca e o bosque autóctono que o forman.

 Sobre ás 11.30 merendamos na area e organizámonos por equipos para facer diferentes xogos deportivos.

 Comemos todos xuntos con vistas á marisma e pola tarde participamos nun concurso de esculturas realizadas coa area e diversos elementos naturais que fomos atopando. A ganadora foi “A cara chorona”.

 Pasámolo moi ben!!!

 Podedes ver e o ben que o pasamos premendo nas imaxes.

 

DESFILE ENTROIDO 2018

O Entroido deste curso 2017-2018 xa chegou e no colexio puxemos todo o noso empeño en facer desfrutar a todo o mundo que nos acompañou neste día de festa. Moitas grazas a todos os/as que viñestes pasar a mañá canda nós e a todos os/as que trouxestes doces, filloas, orellas, etc para por o remate doce á xornada. Tamén moitas grazas á ANPA O Baño por botarnos unha man nesta e noutras máis actividades.

Aquí vos deixamos fotos e vídeos do desfile e actuacións dos nosos/as alumnos/as que con tanto traballo e cariño preparamos.

    

ENTROIDO 2018

Familias, amigos e amigas, veciños e veciñas, un ano máis o alumnado do CPI convídavos a asistir ao seu desfile de entroido que terá lugar partir das 11:00 hs da mañá no patio exterior do colexio; se a choiva nos visita agardamos por todos e todas vós no pavillón de deportes a carón do colexio.

Este ano o tema dos nosos disfraces está relacionado coa concienciación sobre o coidado do noso planeta, dando continuidade así ao traballo do tema transversal " Un planeta feliz: o desenvolvemento sustentable" que estamos a desenvolver nas aulas durante este curso. Esperamos que vos guste.

FESTIVAL DE NADAL 2017

Alá vai o primeiro trimestre deste intenso curso 2017-2018 e que mellor maneira de despedilo que facendo unha grande festa en forma de Festival. Un ano máis todo o alumnado e profesorado puxo moita ilusión, esforzo e horas de traballo para amosarvos todo o talento co que contamos no noso colexio. 

Queremos dar as grazas a todos/as os/as que participastes activamente para os premios do Mes da Ciencia, para os concursos da asociación Avanzar de Cuntis e para os carteis do departamento de Igualdade dos Servicios Sociais do concello de Cuntis. Moitas grazas a todos e todas pola vosa colaboración e polas gañas que lle poñedes a todo para facer deste noso e voso centro un lugar de aprendizaxe, de cooperación e ilusión polo traballo ben feito.

Aquí vos deixamos os enlaces aos vídeos e fotos que tiramos nestes días de Nadal.....

  

      FOTOS FESTIVAL NADAL I               FOTOS FESTIVAL NADAL II             VÍDEOS FESTIVAL NADAL

 BO NADAL E FELICES FESTAS!! 

FESTIVAL DE NADAL 2017

 

Mes da Ciencia 2017. Visita á adega Terras Gauda.

O alumnado de 3° ESO e 3° PMAR que participa activamente nas actividades organizadas durante o "Mes da Ciencia" foi convidado a unha excursión á adega Terras Gauda (Tui) que tivo lugar o pasado luns 6 de Novembro, para realizar un “Obradoiro de Viticultura de Precisión” organizado polo CSIC (Centro Superior de Investigacións Científicas). O programa da saída foi moi completo (Ollos no aire sobre o cultivo da vide, os Drons,Xestiona o viñedo cunha tablet,As cores e a luz na vide,Descobre os mostos...) 

A excursión durou toda a mañá e aínda que foi moi apurada desfrutárona moito. Premede nas imaxes e veredes como foi a xornada... 

        

Mes da Ciencia 2017

Un ano máis chega o mes de novembro e con el chega ao noso centro o MES DA CIENCIA cargado de actividades moi diversas: exposicións, roteiros, experimentos, xogos de pistas, concursos, charlas e un longo etc. 

Aquí vos deixamos o cartel de actividades deste mes cheo de ciencia por se vos queredes apuntar...

 

Visita a Campiño e Lourizán

O alumnado de terceiro e cuarto de educación primaria está a desenvolver unha serie de actividades de concienciación medioambiental e coidado dos montes e árbores de Galicia. Unha das actividades que levaron a cabo e que máis impactou ao alumnado nestes días de traballo foi a visita á base aérea contraincendios de O Campiño onde os brigadistas e demáis persoal desta base lles amosou cómo era o seu traballo e como usaban todo o equipamento do que dispoñen para a prevención e extinción de incendios coma os camións motobombas, o helicóptero, os seus traxes, as mangueiras, etc.

A rapazada desfrutou dun día moi divertido e puido comprobar como era a vida e traballo destes profesionais compartindo con eles/as unha xornada de convivencia moi especial.

Podedes botarlle un ollo ás fotos que sacaron os/as mestres/as e coas que seguirán traballando na aula premendo nas imaxes ou visitando a nosa galería de fotos.

            

Saída ao teatro "Guillermo Tell". 3º ciclo primaria

O pasado martes 31 de outubro o alumnado de 5º e 6º de primaria asistimos ao concerto didáctico da ópera Gullermo Tell de Gioacchino Rossini. Descubrimos a lenda deste heroe medieval a partires da fantástica adaptación realizada pola Compañía de Comediants A Baldufa.

Podedes ver as fotos premendo nas imaxes ou na nosa galería de fotos.

      

Magosto 2017

Un ano máis chegou ao noso centro o Magosto, un chisco máis cedo do acostumado pero igual de cheo de actividades, obradoiros, xogos, teatro, diversión e por suposto...castañas. Comezamos a xornada con xogos populares para todo o alumnado de Infantil e Primaria, despois viñeron os obradoiros para Primaria e o teatro para Infantil, e pechamos a mañá coa degustación de castañas asadas que tan xenerosamente nos mandaron as familias do noso alumnado.

Un ano máis queremos dar as grazas a todo o profesorado que participou na organización e posta en marcha dos obradoiros, ao alumnado de sexto de primaria por guiar aos cativos/as de Infantil facendo de padriños e madriñas e ao de cuarto da ESO por axudar cos xogos de toda Primaria, aos Piñeiriños por traernos unha vez máis teatro, música e diversión, e por suposto ás familias de todo o alumnado por achegarnos as castañas que puxeron fin a esta xornada de convivencia tan completa.

Coma sempre premede nestas imaxes ou visitade a nosa galería de fotos para ollar algúns dos momentos vividos neste día de festa. 

     

            

     

Distribuir contido