Ed. Infantil

Un ano máis o alumnado de Educación Infantil participante no programa de Innovación Educativa "Aliméntate Ben" dos Plans Proxecta da Consellaría de Educación en colaboración coa Consellaría do Mar tivo a oportunidade de participar dunha visita á praia da Amorosa en Vilanova de Arousa.

Nesta visita puideron coñecer de primeira man o traballo dos/as mariscadoras/es, como se sementa, coida e recolle o marisco e da importancia de manter en bo estado as nosas praias. Tamén tiveron a oportunidade de ver como se traballa na lonxa, como se procesa e clasifica o marisco recollido por cada un/ha dos/as mariscadores/as e como se preparan para o seu transporte aos mercados.

E para rematar unha xornada de moito traballo e aprendizaxe tiveron a gran sorte de participar dunha estupenda merenda mariñeira a base de empanada de chocos e polbo e bocadillos de paté de sardiñas, qué rico todo!!! 

Premede nestas imaxes ou visitade a nosa galería de fotos para ver canto traballamos e aprendemos.

Este mércores 9 de maio, o alumnado de educación infantil do noso centro e da unitaria de Arcos de Furcos, fomos ver a obra de teatro "Antón Comodón" á cidade de Pontevedra. Unha historia que nos achegou á vida de Antón, un home bastante preguiceiro e mandón, acostumado a que todo o mundo lle fixera todo e que se convertera nun auténtico "desastre" que nin sequera sabía atar os cordóns ou facer un bocadillo de queixo. Menos mal que coa axuda dos/as seus amigos e amigas aprendeu a valerse por si mesmo e pouquiño a pouco transformouse nun rapaz de proveito. Despois, ainda tivemos un pouquiño de tempo para merendar e dar unha volta pola alameda de Pontevedra.

Premede nestas imaxes e poderedes ver algunhas fotos que nos tiraron as mestras para lembrar este día.

A semana pasada, coa celebración do 8 de marzo, Día da Muller Traballadora como fondo, adicamos moitas das nosas actividades a celebrar o importantísimo papel que teñen as mulleres nas nosas vidas en particular e na vida en xeral desta sociedade na que nos toca vivir. 

O alumnado de Educación Infantil participou en varias actividades programadas para esta semana, pero unha das máis significativas para os/as nosos/as cativos/as sen dúbida foi a visita dun grupo de avoas que se ofreceu a compartir con todos/as nós a súa experiencia de vida e todos os seus coñecementos.

Os/as nosos/as cativos/as desfrutaron de primeira man da compañía, historias e anécdotas das avoas Concha, Carmen, Elena, Lucía, Ana, Rosa, Marisé, da bisavoa Lola, e fixéronlle un montón de preguntas que elas moi amablemente respostaron. 

Moitas grazas a todas por compartir con nós o voso tempo e achegarnos a vosa visión da vida; na escola quedamos con gañas de máis historias e de futuras visitas. Aquí quedan algunhas imaxes dos momentos vividos..... 

Esta luns 18 de decembro visitaron o noso centro os/as axudantes das súas Maxestades os Reis Magos de Oriente, os/as Paxes Reais. Todo o alumnado do centro puido velos/as polos corredores, pero foron os máis cativos/as de Infantil e Primeiro e Segundo de Primaria os que tiveron contacto con eles/as dun xeito máis próximo.

Falaron con eles/as, dixéronlle os agasallos que tiñan pedidos, recibiron as cartas que eles traian para poder escribirlle e tamén se fixeron fotos con eles/as que podedes ver premendo nesta imaxe ou visitando a nosa galería de fotos.

O alumnado de Educación Infantil do noso centro está a participar dunha serie de Obradoiros, " Xogos, xoguetes e videoxogos", que está a impartir unha técnico do Concello de Cuntis ao abeiro da temática da Igualdade de Xénero neste mes de novembro.

Entre contos, cancións, xogos, xoguetes e moita diversión os máis cativos e cativas do colexio están aprendendo que a igualdade é posible e que comeza dende o máis simple xesto, a nosa persoa.

Premede nestas imaxes e veredes algúns dos momentos que vivimos en igualdade de xogos....