No ROU celebramos a semana do libro do mellor xeito posible!

O Mercado do Libro, con libros de ocasión e marcapáxinas realizados polos alumnos de 1º da ESO, recadou 92€ destinados á ONG Save the Children.

Tanto Save the Children como o IES ROU queremos agradecer a toda a comunidade -alumnos, familias, persoal non docente e profesorado- o seu compromiso e axuda nesta iniciativa.

Na materia de Proxecto Competencial estivemos investigando sobre Vigo e, para afianzar os contidos, realizamos unha visita guiada ao centro da nosa cidade.

Adxuntamos información que pode ser do voso interese sobre os impresos para a matrícula na ABAU e o depósito do título de bacharelato.

Os impresos son meramente informativos, os que vaiades utilizar xa se vos facilitarán nas datas correspondentes.

Esta semana tivemos a sorte de entrevistar no Pregunta ROU á nosa alumna Lola, logo de ser escollida como proposta a mellor deportista do ano 2023.

Se facedes clic na imaxe poderedes acceder a entrevista.

Cada ano, o 15 de abril, a celebración do Día Mundial da Arte contribúe a reforzar os vínculos entre as creacións artísticas e a sociedade, a fomentar unha maior conciencia da diversidade das expresións artísticas e a entender a cultura como camiño cara a unha educación inclusiva e equitativa. Dende o ROU as alumnas de Historia da Arte de 2º de Bacharelato, escolleron unha serie de murais do proxecto Vigo, cidade de cor e vencelláronos aos versos de distintas poetas contemporáneas.

No arquivo adxunto tedes información que consideramos de interese sobre a convocatoria de becas para estudos postobrigatorios.

Aquí temos un vídeo da viaxe a Londres do noso alumnado de primeiro de bacharelato, organizado polo Departamento de Inglés. Polo que parece, mal non o deberon pasar.

Este martes 2 de abril, dentro das xornadas de encontros con autoras e autores organizada  pola Biblioteca e, neste caso, o departamento de Lingua Galega, visitounos PAULA CARBALLEIRA, autora da peza teatral As alumnas, Premio Nacional de Literatura Dramática 2023. Participou o alumnado de 1° de bacharelato que leu a obra, xunto coa súa profesora Esther Quinteiro. Paula Carballeira contounos anécdotas sobre a creación, pescuda e recepción desta obra que trata sobre a educación da muller durante o franquismo e tamén sobre a amizade. Coa soltura que dá toda unha carreira literaria e vinculada ao teatro, respondeu as preguntas das e dos asistentes e  intercambiou pareceres e mesmo a interpretación dunha pasaxe connosco. Grazas Paula Carballeira por este encontro tan interesante.

O martes, 19 de marzo, Rubén e Luz da asociación ASBIGA estiveron por segunda vez no ROU co alumnado de psicoloxía para explicarlles en que consiste o trastorno bipolar, unha enfermidade pouco coñecida a pesar de que afecta a arredor dun 3% da poboación.

Se facedes clic no enlace poderedes acceder a un folleto informativo de dita asociación.

O noso alumnado de 4º da ESO asistiu á oitava Edición da Feira das Ensinanzas Artísticas e Profesionais de Vigo no Museo Verbum, onde tiveron a oportunidade de informarse a cerca de ciclos oficiais de grao medio e superior, graos universitarios e formacións técnicas. Entre as especialidades estiveron presentes: moda, deseño de interiores, produción e vídeo, perruquería, xoiaría, auxiliar de vó, piloto de liñas aéreas, idiomas e caracterización.