Nestas pasadas semanas o alumnado do noso IES veu participando nun obradoiro de Diversidade afectivo-sexual organizado pola Concellería de Igualdade de Vilanova e impartido por Cecilia Cores, no cal se tratan aspectos tan cruciais para o desenvolvemento dos nosos adolescentes como a identidade de xénero, o feito sexual humano e as diversas manifestacións afectivas,así como as enfermidades de trasmisión sexual.
O día 9 de decembro estivo dirixido ao alumnado de 4º ESO e nesta semana os protagonistas foron os alumnos/as de 2º e 3º de ESO.
Actividade de cohesión no programa de titorización entre iguais.
Como todos os meses, na última sesión de titoría, o alumnado-titor de 3º de ESO e o alumnado titorizado de 1º de ESO pasaron unha sesión moi divertida e dinámica co xogo de emocións “EMOTEI”, na cal puxeron a proba as súas aptitudes como cantantes, debuxantes, comunicadores e amosando moi boa actitude e participación grupal.
Rematamos a semana contra a violencia de xénero cunha obra de teatro, El sí de las niñas de Leandro Fernández de Moratín. Nela reivindícanse os dereitos da muller a elixir e a decidir libremente. Dirixidos polo profesor de Lingua Castelá e Literatura Manuel Radío, Laura, Zaida, Lara, David e Santiago, de 4º ESO, fixeron as delicias de todo o alumnado coas súas interpretacións. Velaí un resumo da obra:
Este luns, Día Internacional da Eliminación da Violencia contra a Muller, o noso centro levou a cabo actos conmemorativos e de homenaxe hacia as mulleres vítimas da violencia machista. Recollemos as principais accións neste vídeo. Ogallá que nunca máis fose necesaria esta reivindicación. (Preme aquí para ver as fotos)
A Semana da Ciencia tivo estes días todo o protagonismo no Faro das Lúas. Alumnado voluntario de 3º e 4º organizou unha Feira da Ciencia chamada Interciénciate en Vilanova e, exercendo de monitores dos seus compañeiros, foron explicando e amosando os fundamentos científicos que hai detrás de experimentos coma a serpe do faraón, o arco da vella químico, a pasta de dentes para elefantes, a botella que fuma ou o concurso da moeda. Ademais, recibimos a visita dos nosos veciños do IES A Basella, que viñeron coñecer de primeira man o traballo feito no noso instituto.(Preme no cartel para ver as fotos de Interciénciate no Faro das Lúas). Uns días despois, fomos nós a ver os experimentos na Basella (preme aquí para ver as imaxes da nosa visita)
Antonio Rial Boubeta, profesor de Psicoloxía Social na USC e experto nas adiccións dos mozos e mozas, ven de estar no noso centro o pasado xoves 14. Nunha distentida charla, o profesor advertiunos dos grandes riscos que están a correr os adolescentes se adican todo o seu tempo de ocio aos vídeoxogos, a miúdo con contidos violentos. Fai un chamamento á comunidade educativa en xeral para que non banalicemos o consumo de vídeoxogos e de Internet, e para que prestemos atención especial á introdución dos adolescentes no mundo das apostas online.
