IES Faro das Lúas | Aprendendo

Entroido 2020 no Faro das Lúas

Mér, 2020-02-26 17:27

Un ano máis, o noso alumnado deuno todo para celebrar o entroido. Houbo concurso de ambientacion de aulas e tamén de coplas. Que quen foron os gañadores? Pois a verdade, iso é o de menos (o 1º de premio de ambientación foi para os de 3ºB e o de coplas, para os de 2ºB). O que importa é o que gozaron ideando, organizando, creando, ensaiando, colaborando... Traballando en equipo para que todo saíra ben. Queredes ver todas as fotos? Pois premede na seguinte imaxe:

Ademais, deixámosvos un vídeo de compilación de todas as performances das distintas aulas. Unha pequena mostra da creatividade dos nosos rapaces e rapazas.

Prazas vacantes no IES Faro das Lúas para o curso 2020-2021

Xov, 2020-02-20 12:17

Estas son as prazas vacantes no noso centro para o vindeiro curso 2020-2021. Premede na imaxe para acceder ao documento:

1 adxunto

24 de febreiro: Día de Rosalía de Castro

Lun, 2020-02-17 00:13

O día 24 de febreiro celébrase un día importante para a lingua, a literatura e en xeral para a cultura galega. Festexamos o día da muller que fixo rexurdir coa súa poesía o noso idioma, dándolle o estatus que perdera durante os Séculos Escuros. Rosalía de Castro é a figura por excelencia do Rexurdimento, este inaugúrase coa publicación de Cantares gallegos (1863), un libro reivindicativo no que a autora pretende defender e prestixiar a nosa lingua e o noso pobo fronte aos que o aldraxan.

Aínda que esta festa cadrará nas vacacións de Entroido, para renderlle a nosa particular homenaxe, preparamos unha “playlist” con composicións versionadas por distintos artistas e grupos musicais. Esperamos que vos guste!

XXVI Concurso de Adhesivos da Coordinadora de Equipos de Dinamización Lingüística do Salnés: O GALEGO E A LUSOFONÍA

Lun, 2020-02-17 00:08

Como cada ano, o EDLG do noso centro participou no concurso de adhesivos promovido pola Coordinadora de Equipos de Dinamización Lingüística do Salnés. A continuación podedes ver algúns dos traballos seleccionados. Grazas aos e ás participantes pola vontade e o esforzo!

E tivemos a sorte de traer para o Faro das Lúas o 2º Premio na categoría de 1º e 2º da ESO! Aquí temos o deseño elixido:

Queredes saber quen foi a afortunada gañadora? Pois premede para a foto.

8 meses, 8 causas para usarmos o galego. Palabras de xaneiro.

Dom, 2020-02-16 23:49

Seguimos corrixindo castelanismos e aprendendo léxico na nosa lingua. Aí van as palabras de xaneiro:

O alumnado de 4º ESO visita o Salón EDUGAL

Dom, 2020-02-16 23:39

O venres 14 de febreiro o alumnado de 4º ESO visitou o CIFP A Xunqueira e o 9º salón EDUGAL.

No CIFP A Xunqueira coñeceron a súa ampla oferta profesional mediante unha visita guiada preparada polo profesorado e alumnado do centro. Visitaron os diferentes obradoiros onde lles fixeron unha pequena presentación dos ciclos, as súas características, ámbitos profesionais e saídas laborais. Neste curso académico este centro conta con ciclos formativos de grao medio, superior e básico, nas familias profesionais de Electricidade, Mantemento de Vehículos, Madeira e Moble e Servizos Socioculturais e á Comunidade.

Ao rematar a visita acudiron ao Salón EDUGAL (Salón de oferta de educación e formación de Galicia), no que se puideron informar e asesorar sobre as diferentes opcións de formación que se ofertan en Galicia. Nos stands e expositores estaban as tres universidades, centros de ensino medio, CIFPs, asociacións, funadacións, empresas e escolas de arte, entre outros.