O pasado 15 de maio veunos dar unha especie de visita un poeta e dramaturgo galego chamado Paco Souto.        

    Paco é un poeta malpicán que realizou con nós unha pequena actividade porque os nenos e nenas do Club de Lectura “Os esquíos lectores”, de 1º e 2º de ESO, lemos un dos seus libros de poesía, As horas de María, que gañou o premio de poesía Jhan Carballeira. Nel os poemas inspíranse nunha campesiña de finais do século XIX e metade do XX, que é unha idealización das súas dúas avoas e do seu mundo. Conta as emocións e frustracións dunha muller en diversas situacións: a chegada de novos inventos como a lavadora e a trelevisión, as vivencias e rutinas como traballadora da terra... e mais os seus problemas persoais.

     Deixamos aquí e no noso blog da biblioteca "Biblioaponte" a reportaxe gráfica sobre a actividade que fixemos o luns 4 de abril para traballar e recapacitar un pouquiño sobre a triste realidade que lle toca vivir ó protagonista do libro que limos "Asmir no quiere pistolas", un rapaz que vive a traxedia da guerra de Bosnia dende o punto de vista dos refuxiados. Cóntanos como é a súa viaxe ata Viena, os medos  e as alegrías que ten, a morriña pola súa terra e sobre todo, a lembranza polo seu pai, que non puido viaxar con eles. Un libro moi recomendable, fermoso e triste á vez.

     A xuntanza consistiu nun picnic, que tomamos ó aire libre no coidado céspede do noso instituto. Tivemos moita sorte co día, porque estivo moi asollado. Cando rematamos de xantar e reposar un pouquiño, fomos directamente á nosa biblioteca a traballar e realizar un pequeno resumo  dos personaxes e a viaxe, que fixemos entre todos. Quedou reflectido nun mural que se pode ver  colgado na biblioteca.

   Asmir no quiere pistolas é o novo libro que estamos a ler os Esquíos Lectores, que xa temos a nosa próxima xuntaza no recreo do vindeiro luns 14.

   Como xa sabedes o 30 de Xaneiro celébrase coma todos os anos o DÍA DA PAZ, aínda que nós vivamos nunha sociedade cunha calidade de vida moi boa, non toda a xente ten esta sorte, e moit@s rapaces e rapazas coma vós viven a traxedia da guerra. Por exemplo,  o día 12 de Febreiro adícase Ó DÍA INTERNACIONAL CONTRA A UTILIZACIÓN DOS NENOS SOLDADO, porque en moitos países os rapaces e rapazas non teñen a oportunidade de medrar xogando e aprendendo... senón que, desgraciadamente, son obrigados a coller un arma e matar.

   A historia que nos conta o protagonista do novo libro que estamos a ler, Asmir, un neno de sete anos, trata tamén dunha guerra, a guerra de Bosnia, e a viaxe que emprende con case toda a súa familia fuxindo como refuxiados da súa casa de Saraxevo por varias cidades.  Este libro achegaranos á triste realidade do que significa ser un refuxiado e o sen sentido das guerras.

     Os integrantes do Club de lectura do 1º ciclo da ESO xa pensaron no nome do  club: OS ESQUÍOS LECTORES... e ademais dous deles, Paula Blanco López e Diego Pérez Couto, fixeron un debuxo como icona do club.

     Por outra banda, xa rematamos o primeiro libro, que eliximos para ler: Rudi Fuciños, o cocho de carreiras. 

     Ós nosos lectores, en xeral, gustoulles pero estaban todos moi de acordo en que non terían un porquiño como mascota!