Novidades biblio

Descobre os sete continentes do mundo! Con bonitas e detalladas ilustracións, este libro de gran formato e páxinas de cartolina informará e sorprenderá a aqueles que desexan aprender sobre o mundo e as súas maravillas. Xa o temos na nosa biblioteca á vosa disposición!

Lembrádesvos do concerto tan fermoso de Magín que gozamos o curso pasado no parque da ruta da pedra e da auga en San Martiño polo Día do Libro? Pois aquí, neste seu novo libro disco xa dispoñible na nosa biblioteca, tedes moitas desas melodías. Un libro de 68 páxinas magnificamente ilustradas por Leandro Lamas, poesías, contos e un CD con 13 cancións: Marcho que teño que marchar, Peixiños do mar, O abecedario, Este planeta é divertido...  Rock and roll, bases electrónicas, jazz coa Gallaecia Big Band, a guitarra de Guillermo Fernández... Camiños quere ser un lugar de encontro e descuberta a través das cancións, dos contos e dos poemas dalgúns dos máis destacados escritores galegos actuais. Unha metáfora da vida para estimularen e enriqueceren a imaxinación e a creatividade da xente miúda.

Temos outra novidade na biblioteca do CRA de Meis: "Rojo. Historia de una cera de colores". Na etiqueta de fábrica di claramente que é unha cera de cor vermello. Todos intentan axudala para que pinte desa cor, pero non hai maneira. Por moito que se esforce, os amorodos só lle saen azuis. É moi infeliz, ata que un día unha nova amiga pídelle que pinte un océano... Este fermoso libro fálanos do dereito á diferenza, de autoestima, de valentía, de respectarse a un mesmo e aos demais. 

A Biblioteca do CRA vai ampliando a súa colección, e hoxe Rabuñoso tráenos un conto orixinal, sorprendente, tenro e divertido, inspirado no clásico de Carapuchiña Vermella, pero cunha interpretación moi libre. Ao protagonista desta historia gústalle nadar no río, botar a sesta ao sol, e sobre todo, fuxir da xente e estar sempre so. Pero un día coñece alguén moi especial e a súa vida empeza a cambiar...