Na titoría, o alumnado de 2° ESO colgou os hoteis de insectos que fixeron aredor do horto. Os insectos vannos  axudar para combater as pragas. 

Ademais, hoxe tamén usamos a tecnoloxía no horto. Os rapaces descubriron para que serve un detector de metais e como usalo na natureza. Vimos que clases de obxectos podemos atopar na terra grazas ao detector e usámolo para atopar o lixo e sanear o espazo onde imos plantar as flores e as hortalizas. 

Ata houbo quen atopou un tesouro!

O alumnado do CPI de Castroverde  de 3º de primaria e 2º de ESO está desenvolvendo proxectos sobre agricultura sostible desde o horto escolar. As actividades inclúense nos programas de éxito educativo nos que participa o centro (EDU-SOSTIBILIDADE) e pretenden contribuír a acadar os Obxectivos de Desenvolvemento Sostible da ONU 2030. Principalmente os referidos a:

- Garantir pautas de consumo e produción sostibles.

- Protexer, restaurar e promover o uso sostible dos ecosistemas terrestres, xestionar de forma sostible os bosques, combater a desertificación e frear e reverter a degradación da terra e frear a perda da diversidade biolóxica.

- Adoptar medidas urxentes para previr o cambio climático e os seus efectos.

O alumnado de 3º de primaria vai a plantar verzas ou repolos, auténticos superalimentos galegos, con excelentes propiedades para contribuír a unha alimentación saudable. Máis adiante plantaranse allos, cebolas, leitugas e patacas, despois de recuperar informacións dos maiores sobre a época e as técnicas máis adecuadas para cada cultivo.  Estas actividades mateñen viva a información que transmitiron de xeración en xeración as familias do rural.

O día 18 de Novembro o alumnado de Ciencias de 4º ESO foi á Coruña para participar no Concurso Galego de Robótica, cada grupo formado por 5 alumnos/as tivo que resolver unha serie de desafíos de dificultade progresiva que implicaba unha programación sinxela dun robot e unha adaptación a nivel construtivo. Todos os grupos empregaron un robot Lego EV3.

Logo visitaron o Museo de Ciencia e Tecnoloxía (Muncyt), donde puideron ver nas distintas salas desde o rincón das chapuzas, cachivaches, ata grandes pezas como a primeira lanterna eléctrica da Torre de Hércules, unha parte dun acelerador de partículas construído pola Xunta de Enerxía Nuclear en Madrid, a primeira enciclopedia Mecánica deseñada pola mestra Ángeles Ruíz Robles que facilitou a aprendizaxe dunha maneira interactiva e razoada, pero o que máis lles chamou a atención foi a sala iberia, onde está a cabina do Boing 747 “Lope de Vega” conocido como Jumbo, na súa adega viaxou dende Nueva York a Madrid o Guernica de Picasso en 1981.

VÍDEO DO PROXECTO SOBRE HIPATIA REALIZADO POLO ALUMNADO DE 3º DE ESO