A obesidade infantil é un dos problemas de saúde pública máis graves do século XXI. O problema é mundial e está afectando progresivamente a moitos países. O sobrepeso, a obesidade e enfermidades como a diabete ou enfermidades cardiovasculares, son en gran medida previsibles a través dunha boa alimentación e hábitos de vida saudables.
Ademais disto, está comprobado que a inxesta de determinados alimentos axudan a nutrir e estimular as áreas cerebrais relacionadas coa aprendizaxe, a memoria e a concentración. A ciencia demostra que unha alimentación saudable, variada e equilibrada irrigará mellor o cerebro permitindo que os nutrientes e o osíxeno cheguen as neuronas e xeren novas conexións nerviosas e, por tanto, novas aprendizaxes.
A alimentación tamén inflúe no humor, no comportamento, e nos hábitos de sono. Un/unha neno/a que durme ben e está ben alimentado vai a render moito mellor que un que non o está.
No CEIP Plurilingüe de Maceda vimos detectando nos últimos cursos un aumento no consumo de azucres e produtos ultrapocesados na merenda da media mañá. A falta de tempo das familias e a conciliación familiar provoca que a elaboración ou preparación das merendas sexa algo fácil e rápido que non implique tempo e que ademais non xere conflitos cos nenos/as.
Ademais disto tamén observamos que no comedor escolar o alumnado é remiso a comer pratos con verduras, ensaladas ou peixe.
O programa “Aliméntate Ben” proporcionaríanos os medios e recursos necesarios para ir modificando esta situación, partindo da concienciación das familias e do traballo conxunto co profesorado, co fin de mellorar os hábitos alimentarios da poboación escolar do centro e porén da comunidade educativa.
Con este proxecto pretendemos empoderar ao noso alumnado e ao resto da comunidade educativa con coñecementos nutricionais adaptados para así influír nas súas decisións como consumidores e facer unha transición a unha alimentación moito máis saudable e equilibrada. E non so iso senón tamén buscamos que o noso alumnado mellore a súa atención, a súa motivación e, en último lugar, a súa aprendizaxe.
