IES Gregorio Fernández

No noso centro celebrouse un acto homenaxe polo cabodano do noso compañeiro de traballo durante máis de corenta anos, Eduardo Rey Moure. O acto foi prensentado pola compañeira e encargada da biblioteca, Raquel Arias, e con grande emoción foi guiando un acto cheo de lembranzas á súa traxectoria persoal e profesional.

Neste acto, puidemos escoitar o podcast feito polo alumnado de 1º ESO en Radio Bolboreta para o Día da Poesía, recordando a súa figura. Logo, e coa música de fondo versionando o poema Non deixes que a tardiña me sorprenda de Fiz Vergara Vilariño da man da profesora de Música, Paula Fernández, e do alumno de 4º ESO, Marc, un grupiño de alumnos de 1º Bac plantaron unha árbore. Esta árbore foise regando con palabras de agradecemento e moito amor cara a Eduardo por parte da comunidade educativa. Para poñer fin ao acto, escoitouse unha gravación feita polo homenaxeado e o seu tamén amigo e compañeiro Xurxo Souto, cantando o poema de Fiz Vergara Non deixes que a tardiña me sorprenda, poesía que aparecía na fermosísima talla en madeira que presidiu o acto.

Nas últimas semanas, o noso alumnado de 2º de ESO participou na fase final do proxecto eTwinning da Unión Europea "Math, Music and Emotions", proxecto virtual no que traballamos ao longo de todo o curso con alumnado de Finlandia e Chipre.

Nesta derradeira etapa, o alumnado debeu realizar un traballo estatístico analizando as emocións xeradas por música propia de cada un dos países. Compartimos con toda a comunidade educativa os resultados obtidos mediante o seguinte informe elaborado colaborativamente e cuxas conclusións foron tamén analizadas cos nosos socios europeos.

Aberto o prazo para solicitar a participación no fondo solidario de libros de texto e axudas para adquirir material escolar destinadas ao alumnado matriculado en educación secundaria para o curso escolar 2024/25. O prazo de solicitudes rematará o 21 de xuño de 2024.

• Ligazón á ORDE do 7 de maio de 2024 

O venres 24 de maio celebrouse o acto de graduación de 2º de Bacharelato da promoción 2022-2024. Parabéns aos nosos alumnos e alumnas! Podedes ver as fotos do acto no Álbum acto de graduación.

O pasado martes 14 de maio, os alumnos e alumnas de 1º curso dos ciclos formativos de Formación Profesional participaron nuns obradoiros nos que traballaron as súas HABILIDADES DE COMUNICACIÓN con Xaquín Domínguez (Bével Consultoría y Servicios Profesionales S.L.), actor profesional en activo con moitos anos de experiencia no sector audiovisual, que xa estivo no noso centro no pasado outono.

Estes obradoiros forman parte das actividades organizadas pola Aula de Emprendemento do IES Gregorio Fernández, ás que se dará continuidade o próximo curso académico. Están financiadas na súa totalidade polo Ministerio de Educación, Formación Profesional e Deportes e pola Unión Europea-NextGenerationEU (Reparto de 2023) no marco do Mecanismo do Plan de Recuperación, Transformación e Resiliencia.

Podedes ver máis fotos do obradoiro no seguinte álbum.

Un grupo de alumnos e alumnas do noso centro visitaron a cidade da Coruña e tiveron a oportunidade de coñecer os sitios máis emblemáticos da cidade.