blogue deadmin

Os nenos e nenas de Ribadetea investigaron sobre as conservas. Para isto indagaron na web Ponlle pilas ao teu bocata http://www.ponlleaspilasaoteubocata.xunta.es/ . Ademais atoparon uns xogos moi divertidos os cales realizaron na PDI da aula.

Nas sesións de psicomotricidade os alumnos e alumnas realizaron actividades relacionadas coa alimentación. Xogaron ao pilla das froitas, foron ao supermercado cos ollos tapados e clasificaron ditos alimentos. Tamén saíron a pescar, levaron os peixes á conserveira e clasificaron as latas. Resultaron unhas sesións moi divertidas!

Os cativos e as cativas de Portela cociñaron uns deliciosos patés de consevas. Gozaron coñecendo as diversas propiedades, sabores e texturas das conservas. Moitos deles non probaran algúns dos produtos e encantoulles experimentar novos sabores.

Ademais de facer unha cata, elaboraron un paté que non deixou indiferente a ninguén. Resultou unha xornada nutritiva e divertida.

Os nenos e as nenas de Areas elaboraron diversos animais mariños. Logo convertéronse nuns trepidantes mariñeiros; pescaron polbos, peixes e mexillóns. Con todas estas especies, e antes de levalas a unha conserveira, puideron xogar a localizalas nun plano coa axuda do Bee Bot. Resultou sen dúbida, unha xornada moi entretida.

Tendo en conta que para este día convocouse unha folga e para permitir que as mestras do claustro exerceran o seu dereito, organizámonos en dúas escolas: Parada e Pías.

Este motivo non foi impedimento para conmemorar este día tan especial.

Decidimos mergullar os rapaces e rapazas na importancia da labor da muller a prol da igualdade, utilizando como base esta imaxe. Preme na imaxe e verás a sorpresa que prepararon os nenos e nenas de  Ribadetea.

Traballamos distintos contidos relacionados coa igualdade; de xeito paralelo, en pequenos grupos elaboramos un marco con materiais de refugallo. 

Noutro espacio da aula creamos un "photocall" onde os nenos e nenas se caracterizaban para o posado. 

As nenas e os nenos de Portela A e Portela B convertéronse en pescadoras e pescadores, carrexonas e carrexóns, e peixeiras e peixeiros.

O venres de entroido iamos participar no pasarrúas organizado polo Concello de Ponteareas xunto con outros centros educativos da zona. Non puido ser!!!.

A chuvia fixo que mudaran os plans e disfrutamos do día no auditorio Reveriano Soutullo cuns animadores de luxo que fixeron que os nenos e nenas, mestres e mestras o pasaran de marabilla.

QUEN SOMOS?

A Anpa Xuntanza, é unha Asociación de Nais e Pais de Alumn@s do CRA A Picaraña. Tendo en conta as características deste centro, formado por 6 aulas de educación infantil, situadas en distintas parroquias do noso concello: Areas, Pías, Ribadetea, Moreira, Parada e Portela. Polo cal, a formación desta Anpa, baséase na representación de cada unha das aulas nesta asociación, sendo un factor moi importante contar con un ou dous representantes, por aula, e así chegar dun xeito máis directo a cubrir as necesidades de cada unha delas.

QUEN A FORMAMOS?

Neste curso escolar 2023/24, a ANPA está contituída do seguinte xeito:

 FINALIDADE DA ANPA:

- Asesorar e informar aos pais e nais no que respecta á educación dos fill@s e promover que exerzades os vosos dereitos e deberes.
- Promover a calidade educativa.
- Colaborar co Equipo Docente para o bo funcionamento das aulas.
- Potenciar a participación das familias na vida das aulas.
- Facilitar a representación e participación dos pais/nais dos alumnos ante as Institucións.

CANTO É A CUOTA DE SOCIO?

Este ano a cota estableceuse en 15€.

Recordade que ser asociadas da ANPA dávos acceso aos descontos que nos diferentes establecementos comerciais do Condado, Paradanta e Louriña se ofrecen, ao ser membros da Federación de Asociacións de Pais e Nais, FANPO. Ademais, tamén dá acceso a participar ao mesmo nivel que outros asociados nas actividades extraescolares que organicen as diferentes ANPAS das comarcas indicadas.

Na escola de Parada, recibimos a visita dun artesán, Eduardo Represas. Eduardo, continuando coa tradición familiar, dedícanse á fabricación artesanal de gaitas no obradoiro xa fundado polo seu bisavó, situado na parroquia de Xinzo. Explicounos de maneira moi sinxela cal é o proceso de elaboración deste instrumento, cales son os materiais precisos e as partes máis importantes da gaita.

Para rematar, fíxonos unha pequena demostración de como sona a gaita... toda unha experiencia para os máis pequenos, quenes coas primeiras notas, levantaronse para bailar!

Participamos na actividade subvencionada polo Concello de Ponteareas "CATRO PATAS DE APOIO", obradoiro  sobre Educación en Valores asistido por cans de Terapia en contornos educativos da asociación Yuracan. O obradoiro tivo lugar no local cultural de San Mateo. O obxectivo é trasladar os beneficios que aportan os animais a entornos escolares coa finalidadede traballar de forma transversal a educación en valores e a posesión responsable de mascotas.
No obradoiro trabállanse  valores como a  solidariedade, o compañerismo, o respecto, a aceptación das diferenzas, a integración, autoestima e a violencia de xénero, así como os hábitos de hixiene e alimentación saudable.

Os nenos e nenas tamén puideron disfrutar do conto "UNHA MAN CHEA DE BICOS" na escola de San Mateo. A mesma "Frida Kahlo" quixo participar con nós neste día tan especial. Unha sorpresa moi doce da que disfrutaron tanto os alumnos e alumnas como os mestres e mestras do centro.