O noso centro é un dos 20 seleccionados para participar nun programa piloto da Consellería de Cultura, Educación e Universidade consistente na aplicación dunha ferramenta en liña de orientación vocacional. Galicia é pioneira no estado español na implantación dun programa destas características, deseñado para axudar ao alumnado na toma de decisións académicas e profesionais de xeito complementario á labor que xa veñen desempeñando os departamentos de orientación.
A toma de decisións sobre o futuro académico e profesional é un proceso complexo que require por parte do alumnado un alto grao de autocoñecemento e tamén contar con ampla información sobre as opcións dispoñibles. A través deste programa poderán percorrer este camiño de forma organizada e guiada sempre polo departamento de orientación.
Nun contexto complexo, onde 9 de cada 10 estudantes non saben que estudar, e onde 1 de cada 3 ten que rectificar o seu itinerario ou abandonar os estudos superiores elixidos, todo o apoio que se lles pode ofrecer é de especial relevancia.
O programa constará de varias etapas:
1. Realización dunha proba de orientación vocacional a través da plataforma Viaedu, desenvolvida por profesionais da psicoloxía e a pedagoxía (alumnado de 4º ESO). Mediante diferentes probas psicopedagóxicas e unha análise personalizada de cada estudante, ofreceranse unha serie de suxestións de estudos superiores (tanto de Formación Profesional como universitarios) relacionadas co seu perfil.
2. Resposta (con carácter voluntario) por parte das familias do alumnado de 4º ESO, a unhas breves preguntas para complementar a información facilitada polos seus fillos e fillas, o que permitirá que as suxestións de titulacións que se fagan teñan en conta as circunstancias familiares
3. Envío do informe de resultados. A orientadora estará en todo momento á súa disposición para a interpretación dos resultados e apoio na investigación das opcións educativas dispoñibles
