ESO

Os grupos de 1º ESO e de Cultura Clásica de 4º ESO viaxamos o 28 de maio á Coruña.

Previamente investigamos na clase a relación de Hércules coa cidade e a presenza do mítico rei Xerión na mesma.

O día aproveitámolo para, na Fundación Barrié, facer unha visita guiada á exposición Deuses e Heroes no Barroco Veneciano.

Despois de traballar todo o ano mitoloxía grega nas clases, puidemos ver pinturas auténticas e xogar a recoñecer os deuses,

as deusas e os mitos que aprendemos.

Coñecemos a praza de María Pita e paseamos a zona portuaria e dos Cantóns, atendendo a encontrar Xerións. De tarde,

fomos visitar a Torre de Hércules, subimos todos os seus chanzos até a terraza e puidemos contemplar a cidade e o mar

desde o alto.

Foi un día luminoso e divertido como podedes observar premendo aquí.

Ligazón: https://fundacionbarrie.org/exposicion-dioses-heroes

Álbum: Curso 23-24 -> Saída 1º ESO e Cultura Clásica

O día 23 de Abril, en xornada matinal, o alumnado de 3º e 4º da ESO participou nunha Xornada Deportiva de Badminton organizada pola Asociación de Deporte Escolar de A Estrada. Esta xornada enmárcase dentro do programa XOGADE de deporte escolar.

O alumnado do CPI participou nesta xornada con alumnado do IES García Barros, do IES nº 1, CPI Santa Lucía e do Colexio de Lourdes.

Álbum: Curso 23-24 -> Encontro Badminton ESO

Por fin chegou! O destino soñado, a viaxe prometida, as/os compañeiras/os de toda a vida e moitas ganas de exprimir ao máximo a fin dunha etapa. Demasiadas emocións xuntas como para pegar ollo pero as olleiras merecían a pena. E tanto que o mereceron! O pasado 8 de abril aterrizamos en Palma de Mallorca e o bo tempo prometía aventuras irrepetibles: chapuzóns furtivos, mosquitos asasinos, bailes eufóricos, GPS mentireiros, fotos arriscadas e sonecas desubicadas. Ademáis das mil e unha anécdotas que vivimos, tamén visitamos lugares cheos de maxia: as covas do Drach, o castelo de Pera, a catedral de Palma, a praia do Muro, o pobo de Valldemosa, o porto de Sóller, o mirador de Alcudia... Logo de 5 días cheos de aventuras, o venres collemos rumbo á terriña coas maletas a medio cerrar, moitos agasallos por repartir e milleiros de historias que compartir.

Álbum: Curso 23-24 -> Excursión 4º ESO

O pasado mércores 21 de febreiro, o alumnado de 2°ESO e 3°ESO saíu de excursión a Manzaneda. Por diante tiñamos 3 días para gozar dunha paisaxe de montaña única e novidosa para a rapazada. Logo dunha breve parada en Castro Caldelas para visitar o seu maxestuoso castelo e repoñer forzas, chegamos ao noso destino. Xa asentados no albergue, comezamos a probar as múltiples instalacións da Estación de Esquí de Manzaneda: probamos a nosa puntería co arco no polideportivo, escalamos árbores no parque multiaventuras, nadamos entre centos de burbullas no spa, saímos de ruta polos sendeiros da contorna, e bailamos ao ritmo da música na discoteca. A sorpresa chegou da man da neve. Ao segundo día da nosa aventura, as temperaturas comezaron a baixar e experimentamos, por primeira vez en moitos casos, a sensación da camiñar coas folerpas de neve batendo de cheo na nosa cara. O brillo dos ollos delataba a emoción do noso alumnado, que aproveitou a situación para seguir practicando puntería nunha divertida pero competitiva loita de bolas de neve. A aventura chegou ao seu fin o venres 23 de febreiro cando, despois dunha mañá chea de actividades coa neve, voltamos para o noso centro cheos de anécdotas que contar, fotos que compartir e días que riscar do calendario ata a nosa próxima viaxe!

Álbum: Curso 23-24 -> Excursión a Manzaneda