Hoxe recibimos a visita de tres Gardas Civís de Tráfico. Estivéronnos recordando as normas que debemos cumprir cando andamos en bicicleta e tamén cando somos peóns. Insistíronnos na importancia dos sistemas de retencións cando viaxamos no coche. Despois da charla tivemos a sorte de ver algúns dos seus medios. Desfrutamos moito coas motos e facendo soar a sirena do coche. |
|||
O venres desprazámonos ata Ribadavia para participar, por fin, no cross que organizamos a Asociación Deportiva Arenteiro, á que pertence o noso cole. Aproveitamos as instalacións do campo de fútbol "O Xestal" para asearnos e descansar despois das carreiras e gozamos dunha mañá chea de deporte xunto con máis de 700 alumnas e alumnos doutros centros. Xa nos tarda a próxima xuntanza! |
|||
Tivemos a sorte de contar hoxe coa presenza de Rocío Pavón, vixente campiona do mundo de futbolín Tsunami. Explicounos as distintas modalidades que existen e tamén as diferentes regras coas que se xogan nos campionatos, bastante diferentes ás que estamos acostumados. Sen dúbida, a que máis nos chamou a atención foi que no futbolín "Taco" non se pode falar durante a partida. Grazas a que nos cederon por uns días o futbolín do Local Social de Vilarrubín, Rocío puido ensinarnos de primeira man algunhas das súas xogadas favoritas. Agora só nos queda practicar! |
|||
Na mañá de hoxe acompañounos Don Arturo, con raíces en Graices. Presentounos as súas maquetas e fotografías sobre as diversas tipoloxías de cruceiros e petos de ánimas que podemos atopar en Galicia. Explicounos cada unha das partes que compoñen estas construcións e os usos que tiñan. Tamén nos inisitiu na importancia da conservación destes elementos como parte do noso Patrimonio. A exposición manterase na entrada do colexio durante esta semana para todos os que quierades visitala. |
|||
A primeira hora da mañá recibimos a Tomás, un axente do SEPRONA. Explicounos as distintas seccións que forman o corpo da Garda Civil, entre as que se encontra o Servicio de Protección da Natureza. Contounos cales son as súas funcións e en que consiste o seu traballo. Fixo especial fincapé na prevención de incendios forestais, xa que é un grave problema na nosa provincia. Neste sentido, deunos consellos para evitar provocar un incendio e para saber como actuar no caso de ver un. Seguro que agora todos recordaremos que ante calquera problema debemos chamar ao 112. |
|||
No día de onte festexamos o Día das Bibliotecas. O alumnado de 5º e 6º de Primaria leu contos para os demais compañeiros, traballamos entre todos co libro "Carabuñas" e coloreamos un debuxo elaborado pola profe Marta para conmemorar a data. |
|||
A semana pasada recibimos a visita de Ignacio, o axente forestal da nosa zona. Ensinounos a importancia do coidado da flora e a fauna da nosa contorna e os riscos que conlevan a súa desaparición. Tamén nos falou da importancia de facer un bo tratamento dos nosos residuos. |
|||
O pasado 20 de setembro estivemos coñecendo a vida e obra dun dos grandes persoeiros do noso concello: o Lebre das Casarizas. Visitamos o seu Museo na Peroxa e da man de Verónica descubrimos unha morea de cousas interesantes sobre a súa vida e, sobre todo, puidemos comprobar de primeira man o ocorrente e resolutivo que era fronte aos problemas. Todos os seus inventos resultáronnos de moito interese, pero o que máis nos chamou a atención foi a súa malladora. Que xenio! |
|||
Benvidas e benvidos ao curso 2023/2024! Iniciamos este novo ano académico coa ilusión de seguir construíndo entre todos un colexio cada día mellor. |
|||
|
|||
- « primeira
- ‹ anterior
- 1
- 2
- 3
- 4
- 5
- 6
- 7
- 8
- 9
- …
- seguinte ›
- última »