Se San Xoán chora, a silveira non dá moras.
Con esta última entrada despedimos o curso, desexándovos a todos e todas un feliz verán e moita saúde ata o curso que vén.
O refrán deste mes explícanos que a choiva de xuño prexudica a algúns froitos como, por exemplo, as moras ou as uvas dos viñedos.
Por outra banda, temos que falar da popular festa de San Xoán e o seu significado na nosa cultura. Festexamos a noite de San Xoán para celebrar o solsticio de verán. Dise que a finalidade das lumaradas é darlle máis forza ao sol xa que a partir de aí os días vanse facendo cada vez máis curtos. Pero aquí, na nosa terra, sabemos que nesa noite podemos comunicarnos co mundo do máis alá, e é o mellor momento para espantar aos malos espíritos, xa que “no San Xoán, meigas e bruxas fuxirán”.
Algúns ritos para practicar esa noite son:
- Saltar a fogueira nove veces para escorrentar aos malos espíritos.
- Elaborar o ramo de San Xoán con herbas como fiúncho, fento, romeu ou herba luísa.
- Meter esas herbas en auga de sete fontes distintas e deixala toda a noite para lavar a cara con ela ao día seguinte.
Así que non vos esquezades de acender a vosa cacharela o día 23 ás 12 da noite, sáltala con precaución, bailar ao son de gaitas e pandeiretas e, por suposto, comer unhas sardiñas cun anaco de pan ou cachelos.