Curso 2014-15

O día 10 de abril recibimos na nosa biblioteca á escritora viguesa LEDICIA COSTAS autora dun libro que limos os nenos e nenas de 5º e 6º titulado Escarlatina, a cociñeira defunta, e co que gañou o Premio Merlín de Literatura Infantil e Xuvenil no ano 2014.

Resultounos moi divertido:

Román Casas quería ser un auténtico chef, pediulle aos seus pais un curso de cociña para o seu décimo aniversario, que coincide co Día de Defuntos, a festa dos mortos. E nese día tan especial recibiu un agasallo moi singular, un cadaleito acompañado dun sobre negro onde viñan as instrucións para activar a Escarlatina, unha cociñeira falecida no século XIX que nunca se separa de Lady Horreur, un arrepiante arañón con acento francés. A bordo do mortobús, os tres novos amigos e mais o gato Dodoto viaxarán ao Inframundo, onde os defuntos viven baixo as ordes de Amanito, o tirano que goberna no Alén. Alí Román atópase co seu avó falecido había xa algún tempo.

  Unha ducia de moi gorentosas e larpeiras receitas, que moitos de nós fixemos nas nosas casas, dan paso a cada un dos capítulos desta historia de humor macabro que conseguiu estimular a nosa curiosidade polo mundo da cociña.

Ledicia foi moi amable, díxonos que ía seguir escribindo para os rapaces e rapazas, que lle gusta moito, e antes de marchar, asinou nos nosos libros cunha frase adicada a cada un de nós.

MOITAS GRAZAS LEDICIA !!!!!

   Os alumnos e alumnas de 4º, 5º e 6º de Primaria recibimos a visita dunha representante de URBASER que nos veu a ensinar o que debemos facer para coidar a nosa cidade e mantela limpa.

  Seguro que xa o sabes pero ímoscho recordar porque é moi importante:

• Utiliza as papeleiras. Non tires papeis , plásticos e material orgánico no chan.
• Non tires ao chan os chicles. Tardan 5 anos en desintegrarse, custa moito arrincalos e teñen bacterias.
• Non tires cabichas na praia,  poden tardar anos en se descompoñer.
• Recolle os excrementos dos animais. Non deixes que o teu can se avergoñe de ti!
• Non deteriores o mobiliario urbano. Hai que pagalo cos teus cartos.
• Recicla utilizando o colector axeitado.
• Os residuos tóxicos, mobles, electrodomésticos  e utensilios vellos lévaos a un PUNTO LIMPO, alí recíclanse. Podes chamar ao teléfono 981 333 034 e pasan a recollelos á túa rúa.

COIDAR A TÚA CIDADE NON CHE CUSTA NADA…….

 NON FACELO CÚSTACHE MOITO

Os nenos e nenas de 3° limos o libro "Un intruso en mi cuaderno" e gustounos moito. O 24 de febreiro tivemos a sorte de contar coa visita do seu autor, David Fernández Sifres.

Era moi simpático, facíanos rir e contaba chistes. O tempo pasou voando por ser tan divertido. Chamou a dúas nenas e dicíalles cousas raras e graciosas: chamoulles vampiros e extraterrestres.

Fixo preguntas sobre o libro e daba bolboretas moi bonitas e unha lambetada a quen as contestaba, pero a algúns non nos elixiu aínda que levantamos a man en todas as preguntas! Non había bolboretas nin lambetadas para todos! (Isto foi o que menos nos gustou).

Amosounos un invento seu, un paraugas máxico. Ensinounos técnicas para escribir un  libro. Falounos do seu novo libro que se titula "¡Que vienen los fantasmas!". Díxonos que tiña moza (pero que era un segredo moi segredo).

Estar co autor deste libro foi unha oportunidade única na que aprendimos moito. Algúns e algunhas queremos comprar todos os seus libros e que escriba moitos máis.

E, para rematar, asinou os nosos libros. Para moitos de nós foi a primeira vez que un escritor nos firmou un libro. 

(3° EP)

Enlace á web de David F. Sifres.

O venres 23 de xaneiro o alumnado de 5º de EP asistimos, na sede de Afundación de Ferrol, á representación da seguinte obra de teatro en inglés:

Título: Spinderella.

Personaxes: Cindy, Becky, DJ Dave e Karaoke King.

Argumento: A historia trataba dunha nena de 13 anos chamada Cindy que cantaba moi ben e quería ser unha estrela do pop. Vivía coa súa irmá maior, Becky, que tamén quería ser unha estrela pero cantaba moi mal. Becky era maleducada, moi mal vestida e moi egoísta. Ademais era moi mandona con Cindy e facíalle limpar e limpar sen parar mentres ela comía ata estoupar.

As dúas rapazas querían ir cantar a un show de karaoke presentado por un famoso DJ chamado Dave. Becky decidiu ir pero a Cindy non lle deixou e mandoulle quedar na casa a limpar.

De súpeto apareceu Karaoke King e Cindy quedou impresionada. El díxolle que cos seus feitizos podía convertir o seu soño en realidade. E así foi: axudoulle a facer as tarefas e da súa bolsa vermella sacou uns zapatos, unhas gafas e unha perruca azul. Grazas a Karaoke King Cindy xa estaba preparada para triunfar. Pero había unha condición: tiña que volver antes das 12 da noite.

Foi ao karaoke a cantar pero finxindo ser outra, pois tamén estaba a súa irmá. Cindy cantou moi ben, ao contrario de Becky, que quixo enganar a todos facendo "playback".

Pero ao tocar as 12 campanadas Cindy saiu correndo e caeulle a perruca. Ao día seguinte DJ Dave deu con Cindy despois de probar a perruca a Becky e a outra nena (a elas non lles quedaba ben). Ao final Cindy gañou o concurso e deixou a limpeza para Becky. A súa vida cambiou por completo.

Gustounos moitos e, aínda que era en inglés, entendémola moi ben!

(5º EP)