A conmemoración O DÍA DA PAZ desenvolveuse cunha serie de actividades en todos os niveis e grupos:
- O alumnado que participou na gravación do baile de Clan ensinoulle a compañeiros doutros cursos a coreografía.
- O coro do colexio ensaiou e gravou a canción VOAMOS, na nosa lingua.
- Todo o centro colaborou nunha actividade plástica "As cores da Paz" que consistía en crear unha colaxe moi colorida do cadro "Guernica" de Picasso. Así, ademais de apreciar a arte deste gran pintor, traballáronse as figuras presentes no cadro, o seu significado, o tráxico que resulta un conflito bélico, os desastres da guerra... Cada un segundo o seu nivel.
- Todo o alumnado decorou unha pomba da paz, pero neste caso, tamén chea das cores da paz. Cada nivel dunha cor determinada, para poder formar un arco da vella cando se coloquen axeitadamente na cabeza e nunha orde establecida.
Hoxe, 30 de novembro, todo o alumnado e profesorado saíu ao patio para formar ese arco da vella e bailar ao son da música coa coreografía de VOAMOS.
Antes, escoitamos estas palabras en boca do profe Tony:
A paz, a non violencia, a convivencia constrúese día a día, en cada momento. Hoxe celebramos o Día da Paz, día da non violencia escolar, pero ademais, poñemos en valor a importancia dun xesto.
Porque, canto pode chegar a significar unha aparente pequena acción nosa?
Pois moito, moito máis do que podemos pensar!
Dende a tele, dende a canle de TVE, Clan, invitáronos xa fai un tempo a bailar para que ningún compañeiro e ningunha compañeira se sentise só, ou se sentise apartado sen amigos, sen amigas.
Esa invitación provocou unha cadea de feitos que hoxe nos ten a todas e todos aquí, para bailar xuntos en prol da non violencia.
Despois de tomar e adaptar a canción "Voamos", de facela nosa, de cantala na nosa lingua, hoxe tamén bailamos pola paz.
Así que recordade para cada día, os nosos xestos teñen moita máis importancia da que podemos crer, e aquí temos o exemplo no que un regueiro de ilusión e ánimo nos leva a voar xuntos! Voamos!!!
