CARTA DE 4ºA Á COMUNIDADE EDUCATIVA
Enviado por A Maía o Mar, 16/02/2016 - 9:49amEstimadas familias, profesorado e alumnado do CEIP A Maía:
O alumnado e profesorado de 4ºA imos facer a partir de hoxe e durante as próximas semanas un proxecto de educación viaria sobre os accesos ao Centro, as entradas e as saídas.
Imos observar e recoller datos sobre como están os accesos e arredores do Centro, as beirarrúas, os aparcadoiros, etc.; tamén como se utilizan eses espazos, como circulamos por eles, como se fan as entradas e saídas ao Centro.
Logo imos reflexionar sobre o observado, que aspectos positivos atopamos e que debería mellorar; ao final comunicarémosvos as nosas conclusións.
Para poder realizar este proxecto, pedímosvos a vosa comprensión e colaboración nas actividades que realicemos.
Moitas grazas
Alumnos e alumnas de 4ºA
María Ramos Sánchez
Rosa García Garrido
Isabel Abelleira Bardanca
Baile de disfraces no Antroido da Maía
Enviado por A Maía o Dom, 14/02/2016 - 9:51pmTanto os profes coma os alumnos o pasamos moi ben durante o baile do disfraces co que rematamos esta semana de Antroido no Ceip A Maía!
DÍA DA PAZ
Enviado por A Maía o Ven, 29/01/2016 - 11:27pmHoxe celebramos o Día da Paz. Os alumnos e alumnas de infantil e primaria elaboraron ó longo da semana as pancartas que hoxe compartimos, leron os lemas traballados por niveis e remataron todos xuntos cantando a Cantarela dos nenos de Neira Vilas. Deixemos que os videos coas fotos dos traballos falen por eles....
As pancartas:
Un anaco da canción:
A xuntanza de todos os alumnos:
Ademáis no blog de primaria podedes ver outro video da xornada premendo AQUÍ
Os mandadiños do Meco para Infantil
Enviado por A Maía o Ven, 29/01/2016 - 10:22pmEstos son os mandadiños do Meco para os nenos de infantil ó longo da semana:
Luns empeza con algo na cabeza. Quedarás coa nosa mirada se o martes traes a cara pintada. Para o noso gozo o mércores traerás algo no pescozo. E o xoves vístete do revés e trae algo nos pés. |
A paz, a tolerancia e a convivencia
Enviado por A Maía o Mér, 20/01/2016 - 12:15amPremendo neste Symbaloo ao que tamén podedes entrar desde o blog da biblioteca, atoparedes cancións, cortos de animación, contos e historias sobre a paz, a tolerancia, o respeto e a convivencia para pensar e traballar na clase e na casa. Outras linguaxes...
BO NADAL !
Enviado por A Maía o Ven, 18/12/2015 - 12:27am
CANTIGA PRA RECIBIR O ANINOVO
¡Ai, qué Noiteboa chea de ledicia
si os galegos estuveran en Galicia!
¡E nós eiquí calados!
¡Ai, qué santo e bó sería o Nadal
si houbera no mundo menos mal!
¡E nós eiquí calados!
¡Ai, qué Aninovo cheo de craror
si houbera na terra mais amor!
¡E nós eiquí calados!
¡Ai, que leda e gozosa Epifanía
si todo amañecera limpo como o día!
¡E nós eiquí calados!
E si houbera xusticia, paz e ben,
¡cómo brilaría a estrela de Belén!
Os anos van pasados,
¡e nós eiquí calados!
Manuel María (ms.)
Monforte de Lemos, Nadal, 1964
Homenaxe dos alumnos e alumnas de 6º B a Xosé Neira Vilas
Enviado por A Maía o Dom, 29/11/2015 - 10:33pmSegundo escribín na entrada anterior, Xosé Neira Vilas estivo falando cos rapaces de 6º B a mesma mañá do xoves. Por unha serie de coincidencias chamou por teléfono cando eles estaban a piques de ler un dos seus poemas e falou cos nenos a través da súa profe. Fíxolles prometer que sempre lerían poesía... Agora as rapazas e rapaces enviaronlle a Marina a súa homenaxe personal a este gran escritor e aquí vola poño tal e como eles a escribiron:
"HOMENAXE do alumnado de Sexto B a Xosé NEIRA VILAS
Ai, amor!
Que lonxe! Que lonxe estás!
Canta terra entre nós dous.
Pero dende que te fuches.
Ai, amor! Ai, amor!
(Xosé Neira Vilas)
O grupo de alumnos e alumnas de 6º B do Ceip A Maía tivemos a sorte de poder lerlle o poema “Ai, amor!” a Xosé Neira Vilas; escoitarlle e recibir, da súa parte, agarimosas palabras, animándonos a seguir lendo poesía.
Isto que contamos, tería pasado en centos de veces con nenos e nenas de toda Galicia. Pero, no noso caso, foi algo especial: ocorreu o xoves día 26 de Novembro pola mañá, e esa mesma noite, faleceu na súa casa.
Estas son as nosas palabras de homenaxe e recordo ao escritor. E queremos que vaian acompañadas dunha promesa: non esqueceremos ler poesía nin as súas obras en prosa!
Balbino e Ruliño están tristes. Botan de menos ao seu pai.
Os nenos queremos que Xosé volva ás nosas vidas. De calquera xeito, sempre estará no noso corazón.
As alumnas e os alumnos de 6º B."
Xosé Neira Vilas, un rapaz de aldea no Ceip A Maía
Enviado por A Maía o Ven, 27/11/2015 - 10:23pmOnte finou o escritor Xosé Neira Vilas autor de “Memorias dun neno labrego”, o libro máis lido e traducido da literatura galega que comeza con estas palabras: “Eu son Balbino. Un rapaz da aldea. Coma quen dis, un ninguén…”.
Con motivo do 50 aniversario da publicación das memorias de Balbino, no ano 2011 o escritor visitou o noso Centro, conversou cos rapaces do 3º ciclo e adicoulles os seus libros. Nesta ligazón co blog da Biblioteca podedes ver como transcurreu a visita e lembrar a Don Xosé.
Estratexia Galega de Convivencia Escolar
Enviado por A Maía o Mér, 25/11/2015 - 11:24pmA Consellería de Cultura, Educación e Ordenación Universitaria presentou neste ano a Estratexia Galega de Convivencia Escolar 2015-2020, un documento de traballo presentado ao Consello para a Convivencia Escolar da Comunidade Autónoma de Galicia co fin de ofrecer á comunidade educativa unhas pautas de traballo que promovan a adopción de boas prácticas no ámbito da convivencia escolar.
Pódese consultar o documento na seguinte ligazón.
abalarMóbil
Enviado por A Maía o Mar, 24/11/2015 - 6:00pm
Estimadas familias,
A Axencia para a Modernización Tecnolóxica de Galicia (Amtega), en colaboración coa Consellería de Cultura, Educación e Ordenación Universitaria, pon en marcha a aplicación abalarMóbil, que permitirá ás familias seguir a actividade educativa dos seus fillos dende calquera lugar, dunha forma rápida e cómoda a través dos seus dispositivos móbiles.
Esta aplicación nace no contexto do Proxecto Abalar, un compromiso da Administración galega coa cidadanía galega, no ámbito da integración das novas tecnoloxías na práctica educativa, para acadar unha resposta integral e de futuro aos retos que presenta a educación do noso alumnado na sociedade dixital do século XXI.
abalarMóbil é unha aplicación que se pode instalar tanto no teléfono móbil como nunha tablet, e que permite ás familias consultar a información de calquera dos seus fillos a través destes dispositivos.
A descarga desta aplicación faise dende Apple store (se o sistema operativo é IOS) ou dende Play Store (se o sistema operativo é Android).
|
|
As familias que descarguen abalarMóbil van a poder dispoñer das seguintes funcionalidades:
• Acceder aos datos persoais
• Consultar as cualificacións
• Consultar e xustificar as faltas de asistencia
• Consultar as faltas de conduta
• Solicitar unha cita de titoría
• Consultar os datos do centro educativo
• Consultar os avisos ou notificacións por parte do profesorado ou do centro educativo.
• Consultar as incidencias creadas polo profesorado
• Modificar o idioma da aplicación
Tamén está á vosa disposición unha guía, na que se mostran as diferentes funcionalidades e servizos que os representantes legais poden utilizar dende o seu teléfono móbil, e un formulario para realizar consultas ou tramitar incidencias relacionadas coa aplicación abalarMóbil.
- « primeira
- ‹ anterior
- …
- 57
- 58
- 59
- 60
- 61
- 62
- 63
- 64
- 65
- …
- seguinte ›
- última »