As actividades lectivas nas ensinanzas de educación infantil e educación primaria realizaranse desde o día 11 de setembro de 2024 ata o 20 de xuño de 2025, ambos incluídos.

Artigo 6. Vacacións escolares

Os períodos de vacacións escolares no curso académico 2024/25 serán os seguintes:

– Desde o día 23 de decembro de 2024 ata o día 7 de xaneiro de 2025, ambos incluídos.

– Os días 3, 4 e 5 de marzo de 2025.

– Desde o día 14 ata o día 21 de abril de 2025, ambos incluídos.

Artigo 7. Días non lectivos

 O Día do Ensino, que terá a consideración de día non lectivo, celebrarase o 31 de outubro de 2024.

A incorporación gradual do alumnado no cuarto curso da etapa a que se refire o artigo 4 da Orde do 30 de maio de 2023 non se prolongará máis alá do 17 de setembro de 2024.

Con anterioridade ao inicio das clases serán informados de cal é a quenda que lle corresponde a cada alumno/a.

A distribución será a seguinte:

DÍAS 11 E 12 DE SETEMBRO, en cada grupo haberá tres quendas:

• Quenda 1: de 9:30h. a 10:30h
• Quenda 2: de 10:45h a 11:45h.
• Quenda 3: de 12:15h a 13:15h

DÍA 13 DE SETEMBRO, en cada grupo haberá dúas quendas:

• Quenda 1: de 9:15h a 11:15h
• Quenda 2: de 11:45h a 13:45h

DESDE O LUNS 16 DE SETEMBRO, ENTRARÁN TODOS/AS EN HORARIO NORMAL: DE 9:05H A 14:05H

Lembren que hai unha reunión inicial programada para o día 5 de setembro ás 17:00h, no edificio de educación infantil.

De acordo co compromiso de centro -recollido no Proxecto Educativo-  adoptado desde o 2019 de non empregar libros en educación infantil e de reducir nos primeiros cursos da educación primaria, faise pública a lista de libros para o curso 2024/25.

Educación Infantil: Non hai libros

 Educación primaria:

Poden consultar o listado completo de libros para 1º, 2º, 3º e 4º de  educación primaria para o  curso 2024/25   no arquivo adxunto.

5º e 6º de educación primaria son cursos EDIXGAL, dispoñen dun entorno virtual de aprendizaxe. Non hai libros en formato papel.

Os listados de material para os distintos cursos, tanto de infantil como de primaria serán proporcionados unha vez comece o curso, directamente polas titoras ou titores.

 Ao rematar o curso 2023/24, o alumnado beneficiario de libros de texto do fondo solidario deberá devolvelo ao centro para a súa incorporación ao fondo solidario para o curso 2024/25.

O prazo máximo para devolvelos será o 21 de xuño 2024. Desde o luns 17 de xuño poden pasar por secretaría a devolvelos.

CONDICIÓNS DE DEVOLUCIÓN

Devolveranse baixo a supervisión de persoal da secretaría do centro, que comprobará se compren as condicións de devolución. 

Os libros deben ser devoltos en bo estado, forrados, sen marcas de lapis, bolígrafo, pegamento, e sen nome (por favor retírenlle as etiquetas co nome do alumno ou alumna).

O ACTIVITY BOOK non se devolve, considérase material funxible. O CLASS BOOK é o que hai que devolver, de ser o caso.

As familias que libremente queiran doar os libros de texto de 3º ou 4º, adquiridos con fondos propios, para incorporar ao fondo solidario de libros do centro, poderán facelo nas mesmas datas e coas mesmas condicións de devolución.

As persoas interesadas no servizo de transporte escolar para o curso 2024/25 DEBEN FACER A SOLICITUDE  do 14 ao 30 de xuño  a través deste enlace

https://www.edu.xunta.gal/centros/ceipamaia/node/1160

Lembren que considerarase persoa usuaria con dereito a transporte escolar gratuíto o alumnado cuxo domicilio se encontre fóra do núcleo urbano no que radique o centro escolar e, en calquera caso, a unha distancia deste superior a 2 km, calculada utilizando o itinerario máis directo, sen desvíos e rodeos innecesarios. Para poder ser usuario/a con dereito ao servizo o alumnado deberá estar escolarizado no centro que lle corresponda, segundo a situación do seu domicilio e a distribución das áreas de influencia establecida ou contar cun ditame de escolarización forzosa emitido pola Administración Educativa. Neste senso, excepcionalmente, pode considerarse como domicilio do alumnado o daqueles familiares cos que o/a estudante efectivamente conviva.

Nestes supostos excepcionais non é suficiente a xustificación do domicilio mediante unha certificación do padrón municipal, sendo requisito imprescindible para a súa consideración a xustificación dunha convivencia real mediante certificación específica expedida para tal efecto polo concello, a partir de informes da Policía Local ou da Garda Civil, agás no caso de menores en situación de acollemento, no que as familias de acollida presentarán unha fotocopia da resolución ditada pola Xefatura Territorial da Consellería de Política Social.

Do mesmo xeito, para manter a condición de usuaria/o con dereito, é necesario que se faga un uso continuado do transporte escolar, entendido este como o uso repetitivo del en días fixos da totalidade das semanas do curso 2024/25.

Estimadas nais/pais/familias,

desde fai uns cursos, no centro temos en funcionamento o que denominamos “Plan de tránsito de infantil a primaria", que ten tres fases principais:

1.- Durante o mes de xuño, prográmanse conxuntamente por parte das titoras de infantil e primaria varias visitas ás aulas de primaria, resólvenselle dúbidas que eles mesmo plantexan, comparten recreo cos de primaria, amósanselle as instalacións, etc.

2.- Durante o mes de setembro: Celebrarase unha reunión inicial das familias co equipo docente de 1º para:

• Presentación     do profesorado.
• Información sobre o funcionamento xeral do centro.
• Usos da biblioteca e demais dependencias.
• Proxecto educativo,  programas educativos e actividades do centro.
• Entrega de documentación (autorizacións das saídas escolares, imaxe, etc.)
• Características  psico- evolutivas da etapa educativa.

3.- Durante o mes de setembro, previo ao inicio das clases o profesorado de infantil e o profesorado de primaria reúnense para intercambio de información sobre as características do alumnado.

Ademais, a finais de curso, vostedes recibirán tamén un folleto con recomendacións e información sobre este proceso.

Reciban un cordial saúdo

Chegou o final do curso e pronto a biblioteca pechará as súas portas. Toca poñer en orden os andeis e os libros, por iso vos recordamos que se non o fixestes aínda, devolvades á biblioteca os libros que levastes en préstamo para casa antes do mércores día 12 de xuño. 

Desde o Equipo da biblioteca queremos despedir este curso agradecendo ao profesorado, ao alumnado e aos escritores e escritoras que nos acompañaron a súa implicación nas actividades que fomos realizando. Podedes ver un resumo de todas elas no blog da biblioteca:

https://biblioceipamaia.blogspot.com/

Queremos agradecer ás familias tamén a súa participación nas actividades de animación e pedirvos que continuedes fomentando o gusto pola lectura durante as vacacións. Para iso, achegámosvos unha guía con algunhas propostas de lecturas para o verán, que cada curso redactamos entre os coles de Ames. 

Bo verán!
Equipo da biblioteca do CEIP A Maia

Adxuntamos un PDF co documento sobre a actividade do Traxe Galego (O Noso Patrimonio!. O traxe tradicional galego..pdf). Tamén vai un arquivo onde podedes ver como traballamos no noso centro a celebración do Día das Letras Galegas e o Modo Galego Actívao! (DÍA DAS LETRAS GALEGAS E MODO GALEGO ACTÍVAO! NO CEIP A MAÍA.pdf) 

Pablo Seoane, un gaiteiro de recoñecido prestixio, mestre de gaita e construtor de instrumentos tradicionais galegos no obradoiro Seoane en Teo envia esta mensaxe ao alumnado do CEIP A MAÍA.

DÍA DAS LETRAS GALEGAS EN EDUCACIÓN INFANTIL