Educar en igualdade e contra a violencia machista é un dos principais obxectivos do IES Otero Pedrayo. Para iso, a través dos diferentes plans que desenvolve o centro, programa actividades pola igualdade ao longo de todo o curso.
Nesta ocasión, as actividades agrupáronse arredor da data do 25 de novembro, DÍA INTERNACIONAL CONTRA AS VIOLENCIAS MACHISTAS.
Comezámolas o propio día, 25N, coa colga da lona no balcón co lema escollido este ano: “No Otero, querémonos sen violencia”; a visibilización da data a través da pantalla da entrada do IES e varios paneis en ambos edificios (entrada e biblioteca); selección de bibliografía na biblioteca; lectura do manifesto e poemas contra a violencia; visualización de vídeo e música contra a violencia nos leceres.
A partir daí, as actividades sucedéronse ao longo dos demais días:
- Martes (3º e 4º da ESO): Charla-obradoiro “Desmontando mitos, construíndo igualdade”, impartida por Antía Pousa, membro da cooperativa Xeracción.
- Mércores (1º de BAC): Proxección da curtametraxe “Matria”, de Álvaro Gago, e posterior coloquio.
- Xoves (2º da ESO): Elaboración de graffiti na muro exterior do patio “Pola igualdade e pola convivencia”, con David Segade Sotelo, integrante do grupo artístico Pouvelle.
- Venres (1º da ESO): Visonado de curtametraxes e posterior coloquio. Actividade organizada polo Departamento de Orientación.
Tamén nas titorías de toda a semana se tratou o tema das violencias machistas e, ademais, o alumnado de 3º e 4º da ESO leu durante o tempo adicado ao proxecto lector Amor amargo, de J. A. Perozo.
Estas xornadas rematan aquí, pero non as actividades contra a violencia e pola igualdade, que se estenderán ao longo de todo o curso. No Otero, querémonos sen violencia.
IES OTERO PEDRAYO. ENSINO PÚBLICO. ENSINO DE CALIDADE.
