Efemérides

O 30 de xaneiro celébrase o Día escolar da Paz e da Non Violencia. Con este motivo animámosvos a vir pola biblioteca consultar os materiais relacionados con esta temática. Só por poñer un exemplo, o texto escrito por Malala Yousafzai, Premio Nobel da Paz no 2014 e que leva por título: Yo soy Malala : La joven que defendió el derecho a la educación y fue tiroteada por los talibanes.

Ademais, podedes ver polos corredores do centro carteis alusivos a esta conmemoración elaborados polo alumnado de Relixión, así como, algúns outros carteis elaborados polo alumnado de atención educativa deste curso (e anteriores).

Nesta ligazón, podedes acceder a materiais interesantes elaborados polo Seminario Galego de Educación pola Paz. Son moi interesantes tamén algunhas das propostas elaboradas noutras bibliotecas escolares.

Ao longo de mes de outubro e, en especial, o día 24 celébrase o Día da Biblioteca Escolar. Nesta ocasión, préstaselle unha atención especial ás MATEMÁTICAS e a campaña ideada pola Consellería de Cultura, Educación e Ordenación Universitaria leva o nome Biblioteca escolar... matemático!!!  O autor do deseño do cartel e dos materiais destinados a promocionar a lectura é David Pintor.

Animámosvos a todos a vir á biblioteca, consultar os fondos relacionados coas matemáticas: libros, revistas, CDs e DVDs relacionados coa temática deste ano. Podedes acceder a algúns dos fondos de matemáticas que temos catalogados na biblioteca aquí e tamén aquí. 

Na páxina da Asesoría de bibliotecas escolares podemos acceder a distintos materiais relacionados con esta temática:

-Materiais e actividades doutros centros: selección de títulos.

-Matemáticas e poesía: seleccións de poemas relacionados coas matemáticas

-Conferencia TED  "As matemáticas son para sempre", do matemático e profesor Eduardo Sáenz de Cabezón.

 Deixámosvos aquí un texto do autor Paco Martín co que agasalla a todas as Bibliotecas Escolares de Galicia no Día Internacional do Libro.

O código secreto que permite o acceso á sala de

mandos da nave espacial exploradora de futuros

itinerarios siderais.

A bambeante escada de corda e táboas coa que

abordar o áxil bergantín no que sucar mares ignotos

 na procura do eterno tesouro da ilusión.

A estribeira na que pousar o pé para cabalgar o

 airoso alazán de galope tendido cara ao horizonte

promisorio.

A fiestra aberta ao ar vivificador, franca aos saberes,

 ao pensamento diverso, ao voo da imaxinación, á

descuberta venturosa de novos mundos, ao espello

substancial do propio ser....

O libro!

Este texto aparece nun marcapáxinas que levarán de agasallo todas as persoas que pasen pola biblioteca neste día. Tamén podedes baixalo aquí.

Tamén vos animamos a participar na campaña #EnGalegoLeo que botaron a andar a CRTVG, a AELG e GALIX.

 O luns 24 de febreiro imos celebrar, por sétimo ano consecutivo, o Día da Poesía no instituto, coincidindo co Día de Rosalía de Castro. para o cal estamos organizando un recital poético que terá lugar a 4ª hora, despois do recreo. A esa hora todo o alumnado non terá unha sesión de clase normal senón que vai recibir na súa aula a visita de distintas persoas que entren a recitar poemas.

Se queres participar no recital aínda estás a tempo: ven á biblioteca escoller poema e incluímoste no circuíto! Anímate e axúdanos a darlle outra oportunidade á poesía!!

Para recordares como celebramos a actividade nos anos pasados, preme aquí: 2013, 2012, 2011, 2010, 2009

Unha das organizacións que vén celebrando dun xeito moi especial esta data é a Asociación de Escritores en Lingua Galega (AELG). Para esta edición propón unha actividade moi creativa e renovadora da imaxe de Rosalía. O título da actividade é graffitiRosalía. Podedes ver información aquí.

Rosalía é a nosa autora máis universal e malia vivir no século XIX é aínda hoxe unha figura totalmente viva e vixente. O ano pasado celebráronse os 150 anos da publicación do seu primeiro libro Cantares gallegos e son moitas as homenaxes que se lle fixeron:  lecturas públicas da obra,  alboradas para Rosalía,  musicáronse moitos dos seus poemas e con versións moi variadas (desde o rap ao jazz) e dirixidas ao público infantil e ao adulto. Nesta noticia publicada en Sermos Galiza fálase de Rosalía de Castro como a letrista galega máis destacada do ano 2013.


Se entrades no catálogo da biblioteca podedes atopar moita da súa obra e moitas das versións ou reinterpretacións da mesma:

Obras de Rosalía: aquí

Rosalía musicada: aquí, aquí, e aquí.

Versións dos Cantares gallegos no 150 aniversario da publicación do libro: Programas monográficos na Radio Galega

O 30 de xaneiro celébrase o Día escolar da Paz e da Non Violencia. O alumnado de 1º de ESO está traballando cos recursos da biblioteca na elaboración de carteis e unha mascota que represente esta data.

Se queredes saber máis desta data ou ver que actividades se fan noutras bibliotecas, pulsade aquí.