Actividades curso 2015-2016

O pasado 17 de marzo, quinta feira (esta denominación dos días da semana que se usa en portugués tamén existe en galego) o alumnado de Portugués  de 1º de ESO-B visitou o Museo Municipal de Valença do Minho.

Alí explicáronnos cando e por que fixeron as súas murallas, que tamén visitamos. A finalidade era defensiva e data da etapa na que Portugal se converte en reino independente(1140). Con posterioridade, e baixo as ordes de enxeñeiros militares franceses, amplíanse e modifícanse construíndo os baluarte en forma de cuña, que caracterizan a nova fortaleza. A reforma débese ás necesidades de defensa do reino, unha vez que conseguen  a independencia da coroa española. De 1580 a 1640 Portugal coñeceu un período no que foi gobernada por reis castelans, o primeiro deles Felipe II, denominado alí como Filipe I. Malia os avatares políticos, a guía do museo insistía en que na vida cotiá, e durante séculos, a convivencia entre a poboación dun e outro lado do río Miño era boa, os portugueses ían a Tiu a comprar, a pasear... e o mesmo á inversa

Como xa ven sendo tradición neste centro, o alumnado de 2º Eso participa no Obradoiro de Construción de Instrumentos musicais dando renda solta a súa creatividade á hora de elaborar o seu propio instrumento musical.

Ano tras ano o traballo vai mellorando, chegando a ser de gran nivel e interese para todos/as. Mostra desta gran labor é a exposición que mostramos na entrada do instituto e que podedes ver nas seguintes imaxes:

Tamén fixemos unha votación, na que participou toda a comunidade educativa, e os instrumentos que maior puntuación acadaron foron os seguintes:

1º Premio

Evián Alves

2º Eso B.

Guitarra eléctrica   

3º premio

Aarón Molares e  Miguel Hernández.

2º Eso A .

Batería

2º premio

Dimitri Rodríguez e Lucía Mora. 2º Eso.

Guitarra eléctrica

O luns 22 de febreiro o alumnado de 3º ESO realizou unha saída á Coruña organizada polo departamento de Bioloxía para visitar a Domus e o Aquarium Finisterrae.

Pola mañá fomos á Casa dos Peixes. Instalada no paseo marítimo da cidade, adéntrase no máxico mundo das profundidades mariñas a través de grandes acuarios onde están presentes especies propias do litoral. Destaca a sala de observación Nautilus, onde hai case cinco millóns de litros de auga onde nadan os maiores peixes do Atlántiuco. Entre eles destaca un tiburón: Tiburón Toro macho de 2,5 metros de longo. Nas piscinas exteriores (conectadas co Océano Atlántico) hai unha colonia de 9 simpáticas focas que facían as nosas ledicias véndoas dar viravoltas unha e outra vez. E tamén vimos como as alimentaban.

Despois de comer visitamos a Domus, museo que ten como obxectivo espertar a curiosidade e provocar a reflexión sobre a especie humana, a través de módulos interactivos os alumnos e profesoras gozamos de experiencias como a de subir a pedalear nunha bicicleta e ver ao lado un esquelete facendo os mesmos movementos; lanzar un penalti e comprobar a velocidade á que se impulsou o balón; descubrir como reaccionan as nosas pupilas ante un estímulo luminoso; ver imaxes dun parto real; ver dúas nenas siamesas nacidas a finais do século XIX que estaban unidas polo ventre, relaxarse para gañar unha partida nun xogo que mide a actividade cerebral; entre moitas outras.

E para rematar visionamos o documental "Titáns da Idade do Xeo", que nos transportou ás belas paisaxes xeadas do hemisferio norte de hai 20.000 anos a través dos tigres dentes de sabre, os mamuts, e os seres humanos prehistóricos que loitaban por sobrevivir nun ambiente inhóspito.

                                  Foi un día ben aproveitado e para repetir!

A Consellería de Medio Rural autorizou a distribución de froita para o alumnado do noso centro dentro do seu Plan de consumo de froita fresca nas escolas.

O alumnado recollerá unha peza de froita en calquera dos dous recreos da mañá.

As datas de reparto serán:  xaneiro (do 18 ao 22), febreiro (do 15 ao 19), marzo (do 7 ao 11) e abril (do 11 ao 15).

Todos os venres no segundo recreo da mañá haberá unha audición en vivo dun instrumentista que forme parte da nosa comunidade educativa.

O pasado 15 e 29 de xaneiro asistimos aos primeiros concertos de piano interpretados por Nicolás Alén, e Noelia Martín.

    Cada semana pasarán distintos intérpretes pola Aula de Música que darán mostra das súas habilidades como instrumentistas.

                  Irene González López y Manuel E. Glez. López (venres 22 de abril)