Música

PROPOSTAS DE MÚSICA. Semana do 20 ao 26 de abril

1.  O 23 de abril é o Día do Libro, e por estas datas é cando celebramos o noso Pícnic Literario, con contos e música. Este ano non vai poder ser, pero imos lembrar o do ano pasado, con Ce Orquestra Pantasma tocando e cantando para nós esa canción que tanto bailamos no cole, “Xoaniña voa voa”. Recordade imitar como fan todos os animais que quere ser a Xoaniña (saltar como a ra, fretar as ás –os nosos brazos- como os grilos, saltar como os coellos, mover o cuíño como os parrulos…) e a cantar e bailar!

https://www.youtube.com/watch?v=jWORBfTBf24

2.  E xa que estamos con animais, que tal se viaxamos a algún bosque de África central e descubrimos algún gorila? Aquí están os gorilas cos que moitas veces cantamos e bailamos na clase de música, do libro-disco En Cabárceno se oye cantar, de Susa Herrera:

https://www.youtube.com/watch?v=E9HAy9QW_sE

Non vos esquezades de facer todos os xestos como Susa e os nenos e nenas, e tamén de bailar como máis vos guste!

3.  Tamén podemos quedar nun dos nosos soutos, e quizais vexamos algún moucho, ou unha lebre, ou un esquío, a donosiña, un rato, unha vacaloura… Aquí nos presentan a canción e fan un baile uns amigos nosos (O moucho chosco, do disco Tic Tac, de Pablo Díaz):

https://www.youtube.com/watch?v=IIW4honLunY&t=2s

E aquí un vídeo moi orixinal coa mesma canción, que se escoita mellor para poder cantar e bailar todos e todas vós:

https://www.youtube.com/watch?v=zi8cpXRVPjM

PROPOSTAS DE MÚSICA. SEMANA DO 30 DE MARZO AO 5 DE ABRIL

1. Lembrades a Migallas? Viñeron ao noso Pícnic Literario hai dous anos, e o curso pasado vímolos en Pontevedra. Non é estraño que no noso cole saibamos moitas das súas cancións. Aquí vos deixo algunhas das que máis vos gustan, para que as bailedes na casa coa familia:

“Dime que fixeches”, do libro-disco Canta connosco: https://www.youtube.com/watch?v=4jtbAyVC7A0

“Miña abuela Manuela”, do libro-disco Pan de millo:

https://www.youtube.com/watch?v=ZMz7FHjSlqw

“Pan de millo”, do libro-disco Pan de millo:

https://www.youtube.com/watch?v=SqBqSYNMqHQ

2. Tamén vos deixo outra das cancións motoras, a do mércores, co mono Amelio:  https://www.youtube.com/watch?v=l_AUhKBn87g

PROPOSTAS DE MÚSICA PARA A SEMANA DO 16 AO 22 DE MARZO (CORENTENA)

Lembramos as cancións destes últimos días, que falaban de Rosalía de Castro, ou eran poemas seus musicados. Así podemos cantar e bailar un pouquiño na casa. O importante é que os nenos e nenas canten, bailen, xoguen, manipulen, se expresen... non que estean moito tempo mirando pantallas. Os enlaces son para que poidades poñer a música ou para que sirvan de guía aos adultos.

Empezamos por “O moucho”, canción do disco “Pan de millo” de Migallas: escoitamos e facemos os xestos que as nenas e nenos xa saben. Aquí está a canción con imaxes de mouchos e de Rosalía: https://www.youtube.com/watch?v=uOUCIP6iiS4 e neste outro enlace podemos lembrar os xestos (o moucho tamén o fan marcando os ollos grandes) naquela homenaxe que lle fixemos a Rosalía hai uns anos no CRA, a partir do minuto 4:53 https://www.youtube.com/watch?v=hJx9oD75NIs

Outra canción que coñecen é “A grasia non era moita”, do disco “Rosalía pequeniña” de Uxía. Hai dous anos tamén xogamos un pouquiño con ela en Xuntanzas, incluso aprendemos algún verso. Recoñecedes a algún? Aí os tedes, coa letra: https://www.youtube.com/watch?v=sMRi_6-y-Rc E para escoitala ben e bailar moito, pinchade aquí: https://www.youtube.com/watch?v=B7htdmrdKNQ Que instrumento soa ao principio e “tocan” os nenos? De que familia de instrumentos é? Que outros instrumentos escoitades? Bailamos e acompañamos con palmas. Incluso podemos improvisar algún “instrumento” con cousiñas que teñamos pola casa: caldeiro dado a volta e culleres de madeira, paus... Ou construír unhas maracas se temos os materiais: https://www.youtube.com/watch?v=BJVcQ4b-KhE

Unha actividade estupenda e divertida para estes días pode ser o teatro, esas adaptacións que fixemos e que son faciliñas de representar cos nenos na casa, por exemplo “Os seis barbudos”, que coñecen deste ano no Samaín, e no que unha persoa pode facer varios personaxes: https://www.youtube.com/watch?v=sVYc-4f9HfM

E, por suposto, este é un bo momento para que os pequenos practiquen con toda a familia as nosas cancións motoras, por exemplo o luns: https://www.youtube.com/watch?v=10rK_eLaCgQ

Polo Día de Rosalía cantamos esta versión dun dos seus poemas. E para celebrar o Día da Poesía, os rapaces e rapazas de 5 anos recitárona, un verso cada un, para lograr recompoñela entre todas. Ademais, é a propia Rosalía (a que nenos e nenas deseñaron) a que fala, coa voz dos cativos.