O alumnado de 5º e 6º do centro, participou nun encontro online co prestixioso psicólogo clínico Rafael Santandreu. A charla promoveuna A Fundación A banca co título:" El arte de no amargarse la vida". Nela Santandreu explicoulles a importancia de adestrar o cerebro para que pase de situacións de nerviosismo á tranquilidade; do medo á despreocupación e da timidez á extraversión. Unha temática moi interesante e amena.
O 23 de abril é unha data importante no calendario escolar. Este curso, celebramos O Día do Libro con distintas actividades ao longo da semana:
-Ilustración de portadas: cada neno ou nena do cole, debuxou a portada do seu libro favorito.
-Librotendal: coas portadas elaboramos a montaxe dunha varanda para decorar a carballeira do centro.
-Mercadillo: expurgo na biblioteca, para o troco de libros por portada ou reseña.
-Booktubers: gravacións en vídeo de recomendacións lectoras
-Apadriñamento e amadriñamento de lectores: o alumando de 6º, 5º, 4º, e 3º de ed. primaria compartiron lectura cos máis pequerechos do colexio.
Preme na imaxe e verás o acontecido.
Ao longo do curso, o alumnado do colexio visita a Casa de Rosalía de Castro. É a quenda de terceiro e cuarto de educación primaria. Esta actividade realízase en colaboración co Concello de Teo.
O autor de "Formigas. Misión Entroido" visitou o colexio e compartiu cos nenos e as nenas de cuarto de Ed. Primaria, un tempo, para a análise do libro lido. Pere Tobaruela contoulles datos importantes da súa obra e contestou ás preguntas que o alumnado lle fixo.
O 21 de marzo, conmemoramos o Día da Poesía. Relacionando a data co proxecto deste curso "Espallando saberes", decidimos visitar a Tilandra nas ondas para gravar poemas da nosa terra. Cada aula elixiu un escritor ou escritora de poesía en lingua galega, investigaron sobre a súa biografía e elaboraron un podcast. O alumnado gravou poemas de Luisa Villalta, Letras Galegas 2024; Rosalía Morlán, que acode aos colexios a ler poemas; Manuel María, Letras Galegas 2016; Antonio García Teijeiro, dedicado principalmente a literatura infantil e xuvenil; Ana María Fernández, Premio Lazarillo 2001 e Xela Arias, Letras Galegas 2021.
As nenas e os nenos de 1º e 2º de educación primaria, gozaron dunha xornada de xogos ao aire libre. Pasárono xenial!
O alumnado de sexto en colaboración co Concello de Teo, asistiu a gala das regueifas 2024 no Teatro Principal de Santiago. Alí entregáronse os premios aos gañadores deste certame. Os nenos e as nenas de quinto e sexto de educación primaria, participaron enviando a súa creación. Desta vez non houbo sorte porén seguirán regueifando para participar o vindeiro curso.
Co gallo do Día Internacional da Radio, o alumnado de quinto de educación primaria elaborou un podcast coa temática: cancións coa palabra radio. O primeiro paso foi repartir as tarefas. Un grupo dedicouse a pesquisa de cancións onde aparece a palabra radio. Outros prepararon a parte da historia, a introdución e a despedida. E todos aprenderon a manexar o audacity, cortaron e gravaron as cancións para transformalas en mp3, para poder gravar o podcast.
