A nosa volta ao colexio despois das vacacións foi especial, tíñamos moita ilusión por volver a estar xuntxs. Descubrimos que Babá e Flash xa regresaran ao Polo Norte e atopámonos cuns agasallos para as nosas aulas, encantounos todo!

Por outra banda, comezamos a realizar propostas relacionadas co inverno a medida que continuamos co proxecto do Monstro de cores iniciado no primeiro trimestre.

Os momentos de xogo libre están cheos de oportunidades de aprendizaxe. E é todo un privilexio poder ser observador e testemuña dalgún destes grandes descubrimentos. Nesta ocasión acababamos de incorporan unhas bandexas douradas de cartón ao recuncho da cociniña. Como estes días vai frío pero pega o sol, os nosxs pequenxs divertíronse moito ao descubrir que podían reflexar o sol por toda a clase. O resto de compañeixs decatáronse do xogo e todxs deixaron o que estaban facendo para observar tal marabilla.

“As aprendizaxes máis importantes da vida fanse xogando” Francesco Tonucci

Ademais, neste mes conmemoramos o Día Escolar da non Violencia e da Paz, bailando ao ritmo da canción “Apertas que voan” de Paco Nogueiras e desfrutando dos lemas que apareceron por todo o centro. Tamén recibimos unha invitación de Carrás para visitar a biblioteca e realizar unha lectura relacionada co proxecto anual no que está inmerso o centro durante este curso “Unha vida en igualdade”.

Empezamos  este novo ano e trimestre moi conten@s e con sorpresas, xa que na clase apareceron uns agasallos que nos encantaron. Con estes xogos fixemos estas construccións tan chulas!

E co novo trimestre comezamos con novas propostas.

Como xa estamos no inverno, estivemos vendo os cambios que se producen  nesta estación. Estamos traballando o vocabulario  e as prendas de vestir  que usamos para protexernos da chuvia e do frío. Cantamos a canción de “Botas de goma” e “Chove en Galiza" de Pablo Díaz e tamén” Como chove miudiño” de Uxía.

Desfrutamos moito decorando  a clase con paraugas nas ventás e con pingas de chuvia que colgamos a modo de móbil e na árbore da clase. E tamén coloreamos e recortamos una bonita paisaxe de inverno e osos hibernando.

Fixemos un boneco de neve utilizando a simetría. Antes de facelo no folio comprobamos no espello a simetría. Tamén realizamos actividades do inverno con  grafismos.

Conseguimos facer neve artificial utilizando bicarbonato e auga.  O tocala está fría e parece neve de verdade! Foi un experimento que  nos encantou. Agora está no recanto  de inverno para poder xogar e experimentar.

E un día tivemos outra sorpresa! Apareceron na clase uns vasos cunhas boliñas e unha nota que nos daba pistas sobre o que poderían ser.  Despois de pensar un pouco adiviñamos o que eran: CHÍCHAROS!!! Decidimos plantalos nun vaso con algodón e auga e colocamos os nosos vasos enriba dun moble para que lle derá a luz e ver que vai ocorrendo.

Ao día seguinte  na clase atopamos un conto: "Todos menos un” no que a través do crecemento dunha planta de chícharos nos conta a importancia de crer en nós mesmos e da aceptación da diversidade. Como o tema nos pareceu moi interesante e aos nen@s lles gustou moito, iniciamos un proxecto sobre este conto que iremos desenvolvendo ao longo do trimestre.

O día 28 de xaneiro celebramos  no cole o Día da Paz. Cantamos todo o cole no patio a canción “Apertas que voan” de Paco Nogueiras.

Durante a semana ademais de ensaiar a canción lemos contos sobre a paz, a igualdade e diversidade.Tamén fixemos un mural sobre a triatleta de Vigo: Susana Rodríguez Gacio. Aínda que é case cega acadou grandes logros na súa vida, grazas a súa constancia e esforzo.

En febreiro volvemos con máis propostas e novidades!

No Nadal dámoslle a benvida ó inverno, estación na que fai moito frío, incluso as veces neva! nas aulas de 3 anos fixemos a nosa propia neve!

Para celebrar a chegada das vacacións, o último día deste trimestre degustamos, individualmente, doces típicos desta época de Nadal.

O noso conserxe xubílase e como agasallo fixemoslle uns debuxos.  Tamén coñecimos e compartimos agasallos cos nosos padriños e madriñas de ler e recibimos a visita do apalpador!

O mes de decembro foi moi curto pero moi divertido. Recibimos unha visita moi especial de dous elfos chegados do Polo Norte. Xa que non tiñan nome, estivemos pensando diferentes posibilidades, fixemos unha choiva de ideas e unha votación. Os nomes que recibiron son... Flash e Babá! Cada día descubríamos unha pequena travesura que realizaban en cada clase e debíamos solucionar esa situación xuntos e reflexionando,tendo en conta que se os tocábamos perderían os seus poderes máxicos.

Por outra banda, volvimos a empregar o calendario de advento coma fixemos en 3 anos , no que cada día realizamos a proposta que tocaba (cantar unha canción, facer unha manualidade...).

Ademais, tivemos sorte de coñecer aos nosxs padriños e madriñas de ler. Foi un momento especial, encantounos poder vernos e facer entrega das postais que lles preparamos con tanta ilusión.

Durante este mes de decembro continuamos facendo actividades sobre o espazo pero ademáis como neste mes celebramos o Nadal, fixemos algunhas manualidades que nos encantaron, entre elas, desfrutamos moito facendo a tarxeta para agasallar aos nosos padriños e madriñas de lectura.

Tamén nos encantou decorar a estrela con purpurina de cores e decorar as aulas con moito amor.

Decoramos con grafismos unha bola, unha campá e un abeto usando rotuladores e tamén ceras.

Fixemos bonecos de neve e unha árbore de Nadal que pode balancearse! e por suposto bailamos, cantamos, rimos e festexamos a visita do apalpador!.

Esperamos e desexamos que desfrutedes moito do Nadal cos vosxs fillxs xa que é un momento que eles viven con moita ilusión.

En xaneiro volvemos con máis propostas.

                         BO NADAL!