Parlamento Xove
Mér, 16/07/2014 - 11:00

Ficha técnicaProxecta

Institucións:

  • Consellería de Traballo e Benestar
    • Dirección Xeral de Xuventude, Participación e Voluntariado

Ámbito: comunicación
Definición: fomento do diálogo e da argumentación razoada das ideas propias como ferramenta para o consenso
Temporización: curso completo
Alumnado ao que vai dirixido: 3º e 4º da ESO e bacharelato
Límite de centros participantes: 48

Criterios de selección:

  1. Orde de inscrición. Como máximo cada centro poderá inscribir 2 equipos nun só proxecto. Se se supera a previsión da organización, poderase admitir unicamente 1 equipo por centro para a participación no concurso-debate.
  2. Prioritariamente facilitarase a participación de centros que nunca participaran ou que o fixeran un menor número de ocasións.

Persoas responsables:

Nome: Yolanda Otero Balsa e Carmen Pereiras Pérez
Departamento: Subdirección Xeral de Programas para a Xuventude (Dirección Xeral de Xuventude, Participación e Voluntariado)
Teléfono: 981 544 821 / 981 544 645
Correo electrónico: yolanda.otero.balsa@xunta.es, carmen.pereiras.perez@xunta.es

Obxectivo xeral

O programa ten como obxectivo fomentar entre a mocidade galega o diálogo como ferramenta para argumentar razoadamente as ideas propias e, tamén, potenciar habilidades individuais e en grupo como a capacidade para seleccionar información, a expresión oral e escrita, a orixinalidade, o traballo en equipo e a convivencia.

Palabras clave

Alfabetización informacional. Competencia en comunicación lingüística. Normalización lingüística. Oratoria

Obxectivos específicos

Este programa ofrece un conxunto de actividades que teñen como fío común debater a redor dun tema formulado pola organización; entre estas actividades inclúese a publicación de artigos de opinión en blogs e xornais, a realización dun caderno de investigación sobre o tema tratado e, finalmente, a realización dun concurso-debate sobre o tema proposto.

Na avaliación da participación dos equipos durante o debate téñense en conta os seguintes criterios:

  • Capacidade de argumentación (calidade da lingua, capacidade de oratoria, estrutura da exposición, creatividade, variedade nas referencias, uso das fontes de investigación, emprego de figuras estilísticas, capacidade de síntese e presentación en medios dixitais).
  • Traballo en equipo (coordinación, distribución das funcións, tolerancia, respecto polos demais, iniciativa, autonomía persoal, responsabilidade e espírito crítico). Este aspecto do proxecto considérase fundamental dentro do Plan Proxecta, polo que se valorará especialmente o carácter activo, cooperativo, interdisciplinario e de desenvolvemento das competencias clave e da educación en valores.
  • Calidade do artigo e do caderno de investigación sobre o tema de debate.

Metodoloxía recomendada

En canto á metodoloxía recomendada, o Parlamento Xove esixe o desenvolvemento de todas aquelas estratexias que contribúan á consecución das catro competencias lingüísticas en lingua galega (comprensión oral, comprensión escrita, expresión oral e expresión escrita). Para conseguilo, o profesorado debe desenvolver as seguintes estratexias metodolóxicas:

  • Aprendizaxe colaborativa baseada na resolución de problemas para favorecer o traballo en equipo.
  • Role playing ou xogo de roles que favoreza a implicación e a empatía do alumnado cos temas de debate.
  • Planificación da investigación: o profesorado participante dirixirá a pescuda da información, que se obterá bibliográfica e telematicamente e que se compilará na realización do caderno de investigación.
  • Uso do brainstorming ou chuvia de ideas co fin de incentivar o proceso creativo do alumnado.
  • Deseño, creación e mantemento dun blog recompilatorio das accións realizadas e da información pescudada.
  • Profundización no uso da linguaxe xornalística e dos textos argumentativos para favorecer o dominio do rexistro formal que deben empregar.
  • Ensino das técnicas básicas de comunicación oral (oratoria, dialéctica) e de expresión corporal (linguaxe corporal).
  • Realización de mapas conceptuais para a expresión das liñas de argumentación.
  • Execución de Portafolios.
  • Aprendizaxe activa e interactiva que leve á construción do seu propio coñecemento.
  • Avaliación formativa do alumnado co fin de retroalimentar o seu proceso de aprendizaxe.

Temporización

A temporización abarca todo o curso escolar. Seguiranse os seguintes pasos no desenvolvemento do traballo ao longo do curso:

  1. fornecemento da información sobre o desenvolvemento do programa, mesmo no propio centro, para prestarlles o apoio necesario e orientar o proceso metodolóxico.
  2. constitución dos grupos de traballo nos centros; cada grupo estará constituído por un docente e 4 alumnos; procurarase a paridade de xénero.
  3. neste punto recoméndase iniciar a aprendizaxe dos elementos relacionados coa expresión do discurso.
  4. publicación do tema de debate (expresado a modo de dilema) na web do concurso; sobre este tema os grupos deben preparar dúas posturas de defensa (a favor e en contra).
  5. desenvolvemento do proceso de investigación e documentación usando como pretexto o tema formulado.
  6. elaboración do artigo de opinión e mais do caderno de investigación co argumentario de defensa das dúas posturas.
  7. realización da fase de concurso-debate, que se rexerá segundo o regulamento do Parlamento Xove. Para a celebración do debate, os equipos constituídos polos centros viaxarán nunha fin de semana ao lugar acordado pola organización para debater sobre o tema proposto.
  8. elaboración da memoria.

Actividades e recursos

Entre as actividades do programa recóllense as seguintes:

  • Web de referencia: http://www.parlamentoxove.com/. A web do concurso ofrece o cronograma da actividade, as bases do concurso e o regulamento que rexe nos debates e outra información de interese para os centros participantes.
  • Saídas extraescolares: a realización do concurso terá lugar en fin de semana nos lugares que determine a organización (probablemente na Coruña e en Santiago de Compostela). Os cursos do desprazamento e da estadía dos grupos participantes van por conta da organización da Dirección Xeral.
  • Concurso: a participación no concurso é obrigatoria para os centros que soliciten este programa. Premios que se ofrecen:
    - 1º premio: orzamento para a realización dunha viaxe
    - 2º premio: unha semana multiaventura en instalacións da Dirección Xeral de Xuventude e Voluntariado
    - 3º premio: unha fin de semana multiaventura.
    - agasallos de recoñecemento aos mellores oradores.

Produto final

  • Participación no concurso.
  • Elaboración do caderno de investigación das dúas posturas (a favor e en contra).

Criterios de avaliación da memoria final

Criterios xerais do Plan Proxecta

1. Participación activa do alumnado na realización do proxecto, na toma de decisións e na realización do produto final. Cómpre visibilizar claramente o traballo do alumnado a través de evidencias gráficas (a través de webs, blogs...) ou documentais.

2. Implicación da comunidade educativa (profesorado, familias e institucións do contorno) e crea entre todos unha rede de traballo cooperativo.

3. Interdisciplinariedade do proxecto (desde distintos departamentos didácticos, disciplinas ou materias) e transferibilidade.

Criterios específicos

4. Calidade da argumentación do tema a debate (capacidade de oratoria, estrutura, creatividade, variedade nas referencias, fontes de investigación, emprego de figuras estilísticas, capacidade de síntese e presentación en medios dixitais).

5. Traballo en equipo (coordinación, distribución das funcións, tolerancia, respecto polos demais, fomento da iniciativa, autonomía persoal e capacidade crítica responsable).

6. Calidade do dossier de investigación sobre o tema a debate.