Novas de interese

Agustín Fernández Paz, na memoria

O 12 de xullo de 2016 morreu outro dos nosos autores máis lidos e queridos, Agustín Fernández Paz.

Desde que se coñeceu a mala nova, a prensa e as redes sociais foron un fervedoiro de choros, homenaxes e recoñecementos ao autor. Nós queremos sumarnos con esta breve anotacion na nosa páxina, pois é moito moito o que nos leva dado. Graciñas por tanto, Agustín Fernández Paz.

Se queredes ler algunhas das despedidas, aquí.

Se queredes escoitalo, neste vídeo que gravou para as bibliotecas escolares (en concreto, para os clubes de lectura).

Se queredes consultar a súa vida e obra, na súa propia páxina.

Se queredes ver que obras súas temos, aquí.

Fóisenos Xosé Neira Vilas

O venres 27 de novembro de 2015 durante a nosa xornada escolar marchou coa súa maleta o último dos clásicos vivos (Xosé Neira Vilas), sen avisar, e coa súa marcha todos nos sentimos un tanto orfos.

Xosé Neira Vilas –Pepe para os amigos- foi, é e será recordado por moitas facetas pero nós queremos destacar, desde esta biblioteca escolar, que el foi o que lle deu voz e dignidade aos nenos e ás nenas, á aldea, aos labregos e á nosa lingua, lingua que fixo grande e internacional. As vivencias e os pensamentos do seu Balbino (protagonista de Memorias dun neno labrego) andan polo mundo adiante e son lidas e queridas por nenos e adultos de diversas latitudes e falas que se ven reflectidos neste neno:

Eu son … Balbino. Un rapaz da aldea. Coma quen di, un ninguén. E ademais, pobre”.

Balbino, Lelo, Toño, Moncho, Tamboril, Tomás… seguiremos lendo as vosas historias, esas que con tanto agarimo creou o voso “pai” para todos nós e todas escritas na nosa lingua.

 Xosé Neira Vilas e a súa muller Anisia Miranda, dous autores que tanto traballaron cos nenos e para os nenos, tanto nas súas obras literarias coma na Fundación Xosé Neira Vilas e na biblioteca pública de Gres, sempre estiveron presentes na nosa biblioteca, nas lecturas do noso alumnado e tamén en ocasións moi especiais como na actividade Salvando libros, nos 50 anos das Memorias dun neno labrego, na morte de Anisia...

A noticia da súa morte foi cabeceira de moitas portadas da prensa ao longo de toda a fin de semana (Praza pública, Sermos Galiza, Galicia Confidencial, Faro de Vigo, La Voz de Galicia, El Pais e tamén na CRTVG. Tamén foi moi seguida en Internet en distintas redes sociais e segue a selo en blogues particulares e de editoriais, asociacións culturais, centros de ensino e bibliotecas escolares onde todos queren deixar a súa testemuña e agradecerlle o seu traballo. Mesmo o fan dous humoristas gráficos, Xosé Lois "O Carrabouxo" e Luis Davila.

Algunhas obras de Neira Vilas no noso catálogo

 

Programa de radio: O alumnado do ámbito sociolingüístico de 4º PDC elaborou un programa especial de "O son da biblioteca" (OSDB)  sobre Xosé Neira Vilas que foi emitido na radio do noso centro, Radio Areal 7, o mércores 2 de decembro. Podedes descargalo e escoitalo aquí.
 

Ledicia Costas, Premio Nacional de Literatura Infantil e Xuvenil

Unha das nosas escritoras máis activas no panorama da literatura infantil e xuvenil da actualidade é Ledicia Costas e é noticia nestes días (principios de outubro de 2015) porque acaba de recibir o Premio Nacional de Literatura Infantil e Xuvenil, premio que se concede no Estado español e que, por quinta vez, recae nun título escrito en galego, neste caso a novela Escarlatina, a cociñeira defunta. Este premio vén sumarse a moitos outros que xa lle foran concedidos a este libro: Premio Merlín de Literatura Infantil 2014, Premio Fervenzas Literarias ao Mellor Libro Infantil 2014, Premio Fervenzas Literarias á Mellor Portada de LIX 2014, Premio Neira Vilas ao mellor libro Infantil e Xuvenil do ano 2014.

Será unha casualidade que este libro leve tantos premios ou é que realmente os merece? Se non o liches aínda, estás tardando... Animádevos a lelo ou outras das súas obras que vos han gustar; algunhas témolas na biblioteca: Escarlatina, a cociñeira defunta; O corazón de Xúpiter; Xardín de inverno e Recinto gris.

Queres ser axudante de biblioteca?

Un ano máis, este é o oitavo, seguimos incorporados no Plan de Mellora da Biblioteca Escolar (PLAMBE) e queremos que sigades participando e implicándovos nela.

O equipo de biblioteca (Mariluz, Susana e Renée) precísavos para que botedes unha man, polo que estamos buscando  axudantes entre o alumnado.

Se vos interesa, pasade pola biblioteca nos recreos a informarvos e a cubrir a solicitude. Agardámosvos!!!

Chegou a Revista OINK!, a Revista do Xabarín Club

Acaban de chegarnos varios números da Revista Oink!, Revista do Xabarín Club, o xabarín máis famoso de Galicia, ao que todos coñecedes pola TVG.

Agora podedes ler as súas historias e ver o traballo de moitos creadores de banda deseñada en cada un dos números. Tedes varios exemplares no revisteiro da cafetaría e tamén na biblioteca.

Campaña para celebrar o Día do Libro: #EnGalegoLeo

Varios colectivos propoñen unha campaña de animación á lectura en galego: #EnGalegoLeo. Animádevos a participar mañá, para celebrarmos o Día do Libro, con lecturas en galego.

Axudantes de biblioteca... de estrea

Pechado o prazo para presentar as solicitudes e valoradas as mesmas, os AXUDANTES DE BIBLIOTECA están de estrea nesta primeira semana de novembro. Graciñas a todas as persoas que se ofreceron, algunhas das cales quedan en reserva.

Tedes aquí a listaxe coas quendas de cadaquén.

Queres ser axudante de biblioteca?

Un ano máis, este é o quinto, seguimos incorporados no Plan de Mellora da Biblioteca Escolar (PLAMBE) e queremos que sigades participando e implicándovos nela.

O equipo de biblioteca neste curso dispón de menos horas ca noutros cursos e, para que nos botedes unha man, estamos buscando 5 axudantes entre o alumnado.

Se vos interesa, pasade pola biblioteca nos recreos a informarvos e a cubrir a solicitude. Agardámosvos!!!

Tedes máis información no arquivo.

Calendario do libro e da lectura 2013

Lembranza de todas as datas que nos quedan por celebrar no que queda de ano

A Torre dos Mouros en banda deseñada

Iniciamos unha nova sección do espazo da biblioteca para dar a coñecer novas de interese, sexan de carácter local ou xeral.

 

Acabamos de coñecer as dúas primeiras páxinas dunha historia de banda deseñada que tratan sobre a Torre dos Mouros, un novo xacemento arqueolóxico que se atopa en Lira. Ao longo da primavera e verán pasados un grupo de arqueólogos e moitos voluntarios estiveron traballando para poñer en valor este lugar e tratar de interpretalo.

O debuxante Manel Cráneo presenta as dúas primeiras páxinas desta historia que será publicada en Demo Editorial e coa que poderemos saber máis sobre este achado. Como sabedes, contamos con algunhas das súas obras na biblioteca e cando esta estea rematada e publicada tamén formará parte dos nosos fondos. Agardamos ansiosamente a súa publicación.

Distribuir contido