O pasado venres 31 de maio, o grupo de embaixadores junior do Parlamento Europeo conversou con Noemí Diaz, concelleira de Medio Ambiente do concello da Coruña sobre os desafíos ambientais da nosa cidade e de Galicia : os residuos, a auga e o cambio de modelo enerxético. Noemí explicoulles que a planta de Nostián, que empezou a funcionar en 1999 tras o derrube do vertedoiro de Bens, xestiona nestes momentos o 18 % dos residuos de Galicia, ofrecendo un modelo de tratamento de residuos máis ecolóxico, baseado na reciclaxe e a transformación da materia orgánica en electricidade e compost. Informoulles que existen neste momento na cidade dezaseis proxectos relacionadas coa protección do medio ambiente, financiados por fondos europeos Next Generation, centrados na sustentabilidade e na economía circular, e que se puxeron en marcha medidas para aumentar os espazos verdes, como a remodelación de rúas e parques, a creación de vías peonís e o aumento de áreas arborizadas. Sobre como aborda a administración local o impacto do cambio climático, o proxecto urbano da cidade contempla zonas de baixas emisións (ZBE) e aposta pola mobilidade sostible potenciando o uso de Bicicoruña, cunha rede de carril bici de máis de 45 kilómetros. En relación aos proyectos galegos financiados pola Unión Europea que apostan polo hidróxeno verde, a concelleira considera que calquera enerxía renovable que contribúa a eliminar a dependencia dos combustibles fósiles é importante para evitar o quecemento global. Noemí, apaixonada desde sempre pola xeoloxía e a bioloxía, estudou Enxeñería de Montes, é profesora de Bioloxía e impartía clases no noso centro cando foi convidada a formar parte do equipo de Inés Rey para a área de medio ambiente e sustentabilidade. Para finalizar a entrevista, comentoulles que un dos éxitos máis recentes da cidade, foi o de recibir un premio da Rede de Cidades polo Clima grazas á traxectoria nas boas prácticas ambientais.   

Transmitimos o noso agradecemento a Noemí pola súa presenza e a súa colaboración interesantísima para o traballo de investigación sobre medio ambiente e sustentabilidade que está a realizar o equipo que forma parte do programa Escolas Embaixadoras do Parlamento Europeo.

FOTOS: enlace 1 enlace 2

  VÍDEOS: enlace 1  enlace 2   enlace 3

   LIBRO "Luísa, melodía infinita":  enlace 

Dicía o poeta cubano José Martí que tres son as metas que debe realizar unha persoa na vida: ter un fillo, plantar unha árbore e escribir un libro. Pois, dende logo, a celebración hogano do Día das Letras Galegas, dedicado a Luísa Villalta, permitiu que moitos alumnos e alumnas contribuísen cos seus traballos á conformación dunha arela soñada cando cooordinei as actividades para honrar a figura da nosa amada paisana, Luísa Villalta: escribir un libro conxunto. Así, todos os compañeiros e compañeiras lle demos forma ao volume Luísa, melodía infinita, no cal participou profesorado de distintos departamentos didácticos, co desexo de deseñar traballos que abordasen as distintas facetas nas que se desenvolveu maxistralmente a esgrevia escritora e violinista coruñesa.

Así, o pasado 3 de maio presentouse o dito libro, saído do mellor prelo posible: todo o noso traballo, de alumnado e profesorado. O acto, presentado pola xefa do Depatamento de Lingua Galega e Literatura Beni Vidal Tomé, e mais pola corrdinadora do EDLG Teresa Pastor Novo tivo lugar na dita data, ás 17:00 h no salón de actos do IESP Eusebio da Guarda. Abriu a dita celebración a directora Mª Isabel Ruso de Lago, logo da magnífica interpretación da canción de Antonio Vega El sitio de mi recreo, cantada con acompañamento de guitarra acústica polo alumno do IESP Salvador de Madariaga Abraham González Estévez. Este tema serviu de pretexto para contextualizar o título deste tributo: O sitio do meu recreo, sendo o IESP Eusebio da Guarda, o noso instituto, o sitio ao que sempre volver porque, unha vez que marcha o noso alumnado, sabe que sempre vai ter as portas abertas para regresar cando quixeren, como así fixo Luísa Villalta, pendurada, dende comezos deste seu ano, co seu estandarte na fachada do noso emblemático centro. Así, dende o EDLG, abusando da súa xenerosidade, quixemos que cada profesor e profesora presentase a actividade realizada cos seus grupos, por considerarmos que o profesorado implicado é o mellor voceiro do seu traballo. Deste xeito, o dito profesorado explicou cada traballo proposto nas súas respectivas clases, ou ben leron a breve reseña que escribiron na ficha adxunta ás súas tarefas. Houbo tamén compañeiras e compañeiros que quixeron que algún alumno ou alumna axudase na dita tarefa de presentación. Ademais, a compilación das actividades fíxose por orde alfabética dos distintos departamentos participantes.

E, deste xeito, nesa fermosa xornada do pasado 3 de maio, ademais da presentación oficial do libro por parte do EDLG, tamén tiveron lugar outras dúas actividades relacionadas co mesmo:

• Presentación do cadro A Cidade Alta, en homenaxe ao poema Poema da Cidade Alta, inserido no libro En Concreto (2004), galardoado ese ano co Premio de Poesía Espiral Maior, un canto de amor ao seu berce, a cidade da Coruña. Realizado por alumnado do noso instituto, baixo a coordinación da catedrática de Educación Plastica e Audiovisual Eva Vérez. Foi presentado polas alumnas de 2º Bach, da materia de Debuxo artístico.

• Estrea da versión musicada, A Luísa, creada polo catedrático de Música Faustino Porras, a partir dun poema de Luísa Villalta, pertencente ao seu libro Música reservada. En colaboración co IESP Salvador de Madariaga, contouse coa asistencia de alumnado dese centro, quen cantou esta peza, acompañado musicalmente pola súa profesora e antiga compañeira do noso instituto, Rosa Mª Rodríguez Rivas e mais o violinista Pedro Navarret, ademais luthier encargado da restauración do violino de Luísa Villalta. Ao violoncelo tamén participou a alumna do noso centro Pilar Alonso-Jáudenes Paz. As voces que interpretaron o tema creado polo profesor Porras foron Alex García Vázquez e Alex Amigo Ribet, esta última filla dos nosos compañeiros Nuria Ribet López e Avelino Amigo Romero. Ambas rapazas, alumnas da materia de Coro e Técnica Vocal no IESP Salvador de Madariaga, foron coordinadas pola súa profesora Rosa Mª Rodríguez Rivas.

No mesmo acto, foi inaugurada tamén oficialmente unha placa en homenaxe a autora herculina, antiga alumna deste centro, instalada no vestíbulo do centro, encima da de Pablo Picasso. E, como remate, non podía faltar a música. De novo, Rosa Mª Rodríguez Rivas e mais o violinista Pedro Navarret mostraron unha xenerosidade e amizade infindas, agasallándonos con dúas pezas musicais: Romanza andaluza (Pablo Sarasate) e Salut d ́Amour (Edward Elgar).

Tras este acto, estaba previsto que a a directora e catedrática de Xeografía e Historia Mª Isabel Ruso de Lago fixese unha visita guiada polo instituto, acompañada dunha guía realizada por ela “O sitio do meu recreo: un paseo polo instituto de Luísa” (inserida no libro), para todo o público asistente. Ende mal, esta non se puido levar a cabo por mor dunha afonía da directora.

Por último, o IESP Eusebio da Guarda encargou dous exemplares impresos, un para darllo de lembranza a María Gómez, nai de Luísa Villalta; e o outro, para que permaneza para sempre no soso centro, como recordo de tan fermosa efeméride. Non obstante, aquí vos deixamos un enlace co libro dixital, para que o poidades descargar cando quixerdes, dirixido a toda a comunidade educativa. Como cooordinadora do EDLG, hei de dicir que foi un ano moi intenso, emotivo e inesquecible, no cal quixen amosar do xeito máis integral a grandeza da personalidade e o impagable legado creativo que nos deixou Luísa Villalta.

En nome do EDLG, moitas grazas de novo a todas e a todos.

Teresa Pastor Novo

(coordinadora do EDLG)

Vídeo en francés do vídeo do alumnado de 2ºCS de Guías sobre Luísa Villalta

Acceso a todas as fotos no ENLACE

Vídeos do alumnado: V1 - V2 -  V3 - V4 - V5 - V6 - V7 - V8 - V9 - V10 - V11 - V12 

Fotos do acto: ENLACE 

Os días 13, 14 e 15 de maio o EDLG organizou a Semana das Letras Galegas 2024, adicadas hogano á escritora homenaxeada no Día das Letras Galegas Luísa Villalta. Dada a repercusión que este ano ten tal efeméride para a nosa cidade e para o noso instituto, por ser Luísa Villalta coruñesa de pro e antiga alumna do Instituto Eusebio da Guarda, a coordinadora do EDLG Teresa Pastor Novo solicitoulle á Dirección do centro a concesión das últimas dúas horas da mañá, co obxecto de que o alumnado puidese expoñer as tarefas que estiveron facendo ao longo do curso, en homenaxe á escritora herculina.

Durante esas tres xornadas, os alumnas e alumnas, acompañados do seu profesorado, presentaron os seus traballos, que constituíron as tarefas recompiladas no libro Luísa, melodía infinita, volume conxunto, no que participaron diversos departamentos didácticos, atendendo con moito interese a proposta deseñada polo EDLG. Ao longo destas xornadas, expuxéronse múltiples e laboriosas tarefas; ademais de traballar as facetas da autora como poeta, narradora, articulista de opinión, dramaturga e ensaísta, tamén resultou moi enriquecedora a convivencia lingüística, abordando a súa faceta como tradutora. E así, puidemos ter a marabillosa oportunidade de escoitar as verbas de Villalta na voz do noso alumnado (e tamén dalgún profesor) en latín, grego, inglés e francés.

E, por suposto, a presenza da música non podía faltar, nesa perenne e fermosa aliaxe desta arte, que Luísa Villalta propiciou con todas as demais. Así, o último día desta Semana das Letras Galegas, no Salón de Actos puidemos escoitar a melodía A Luísa, creada polo catedrático Faustino Porras, sendo interpretada ao piano pola alumna de 1º Bach B Lara Solsona Santás.

Días antes desta Semana das Letras Galegas, concretamente o 3 de maio, tivo lugar no noso instituto un acto, tamén organizado polo EDLG, onde, baixo o título Tributo: O sitio do meu recreo, se presentaron os seguintes traballos: o nomeado libro Luísa, melodía infinita, no que interviron diversos departamentos didácticos, con interesantes tarefas destinadas ao alumnado; un cadro realizado por alumnado de 2º Bach de Debuxo artístico, baixo a coordinación da catedrática Eva Vérez, a partir do poema Poema da Cidade Alta, do libro de Villalta En concreto; e a estrea oficial da musicalización dun poema do libro Música reservada, realizada polo catedrático Faustino Porras, peza que titulou A Luísa. O memo día, presentouse unha placa de homenaxe á escritora, colocada no vestíbulo do centro, encima da de Pablo Picasso.

Logo deste entrañable acto académico, dirixido a representantes políticos e institucionais, á familia Villalta Gómez e mais a profesorado en activo e xubilado, a Semana das Letras Galegas tivo un único protagonista: o alumnado do noso centro, quen amosou un enorme compromiso coa obra villaltina e unha actitude respectuosa ante o traballo desenvovido en común.

Con este última actividade, o EDLG pecha os actos de homenaxe a Luísa Villalta, iniciados de xeito agoirento aquel 8 de maio do curso pasado cando, a que subscribe, propuxo dentro do Plano anual de actividades do EDLG do curso 2022/ 2023 adicarlle unha homenaxe, de xeito periódico, a algún alumno ou alumna que destacase nalgún campo. Nin non meus mellores soños imaxinaría que, tras aquel O ollar calmo das palabras, organizado en memoria de Luísa Villalta, escoitaría a avegosa nova, algo máis dun mes despois, de que a RAG decidiu nomear a autora coruñesa a elexida no Día das Letras Galegas do ano 2024.

Porén, malia ser un ano de intenso traballo, como coordinadora do EDLG deste centro, agradezo a implicación dos diversos departamentos nas actividades propostas e deseñadas por este equipo, ademais de todo o apoio recibido pola Dirección deste instituto, quen sempre lle deu luz verde a todas as iniciativas que tiven a honra de propoñer e coordinar.

Moitas grazas, alumnado e profesorado implicado, por mover este buque tan grande: a prolífica obra da nosa esgrevia paisana, Luísa Villalta!

Teresa Pastor Novo

(coordinadora do EDLG)

 "Vídeo-homeaxe a Luísa Villalta realizado polo alumnado de 2º Ciclo superior de Guías turísticas. Axiña estará dispoñible a versión en lingua francesa."

Acceso a todas as fotos no ENLACE

O pasado 8 de maio o EDLG celebrou a Festa dos Maios. A orixe desta festa, denominada FESTA DOS MAIOS OU DO PAU DE MAIO, remóntase a antes do cristianismo. Parte da crenza de que os espíritos arbóreos fan prosperar, non só as colleitas, senón tamén bendicen o gando e mesmo as mulleres con fillos. Trátase de ritos vencellados á natureza, á fecundidade da terra, aos animais e ao propio home.

Esta festa popular galega forma parte do chamado Ciclo do maio, época de exaltación da natureza ao comezo da primavera. Celébrase en concreto entre finais de abril e principios de maio, aínda que o ciclo se desenvolve ata o mesmo comezo do verán, na noite de San Xoán. A súa orixe está necesariamente relacionada coa manipulación da natureza por parte do home; neste sentido, ben pode remontarse ao período magdaleniense, momento en que xorden os primeiros rituais asociados coa colleita, ben ao neolítico, coa consolidación da agricultura e mais o sedentarismo.

A festa coñeceu algunhas materializacións específicas en distintas culturas, asociándose á fecundidade da natureza, como a celta, grega (no culto á deusa Afrodita), a latina (con diversos xogos en honra a Ceres, Tellus, Pales, Elicius e Robigo, e sobre todo as Floralia en honra a Flora, así como a fiesta en honra a Maia o primeiro de maio), a sueva (co seu culto ao lume) e a cristiá (que despaganiza determinadas festas, facéndoas coincidir con celebracións propias, como a fiesta da Santa Cruz).

Así, o alumnado de 1o ESO A e D, coordinados pola súa profesora de Lingua Galega e Literatura Teresa Pastor Novo quixo contribuír ao mantemento destas tradicións e elaborou o seu particular maio, representado na cortiza do EDLG, onde expuxeron uns coloridos caligramas de flores e mais acrósticos, estes formados con termos alusivos á primavera. Á parte disto, tamén colocaron fotografías destas esculturas arbóreas, con moita tradición en moitas partes de Galicia, especialmente en Ourense. Deste xeito, conmemórase a chegada da primavera e ensínase a ledicia polo medre e floración da vexetación, polo que se crean verdadeiras obras de arte con flores, cascas de ovos, herbas ou froita diversa. Como a música non debe faltar nestas celebracións, que cómpre achegarlle á mocidade para que as conserven, ningunha mellor que a versión de Emilio Batallán, sobre o poema de Curros Enríquez “O maio”, do libro “Aires da miña terra” (1880).

Aí vén o maio

de frores cuberto ...

Puxéronse á porta

cantándome os nenos;

i os puchos furados

pra min estendendo,

pedíronme crocas

dos meus castiñeiros.

Pasai, rapaciños,

calados e quedos;

que o que é polo de hoxe

que darvos non teño.

Eu sonvos o probe

do pobo gallego:

pra min non hai maio,

pra min sempre é inverno! ...

Cando eu me atopare

de donos liberto

i o pan non me quiten

trabucos e préstemos,

e como os do abade

frorezan meus eidos,

chegado habrá estonces

o maio que eu quero ...

Queredes castañas

dos meus castiñeiros? ...

Cantádeme un maio

sin bruxas nin demos;

un maio sin segas,

usuras nin preitos,

sin quintas, nin portas,

nin foros, nin cregos.

Teresa Pastor Novo

(coordinadora do EDLG)