O Martes, 12 de marzo, imos de novo ao Auditorio Municipal de Ourense, cos alumnos e alumnas de 2º de ESO, a ver a terceira película programada por Cinensino para este curso, relacionada co módulo de comportamento asertivo. Con ela remata o ciclo por este curso no que non poidemos disfrutar da segunda película que foi suspendida.
A película que veremos será Heroes, de Pau Freixas, recentemente estreada en España (2010).
Reseña da película:
Un novo publicista, cunha exitosa carreira profesional e unha vida persoal baleira, vese inmerso nunha viaxe a contrarreloxo para chegar puntual a unha importante reunión de negocios. Durante o traxecto coñece a unha moza que viaxa tan só cunha mochila, e coa que, a pesar das súas opostas maneiras de vivir a vida, conectará e acabará rememorando a época máis mítica e emotiva da súa infancia: o último verán que pasaron coa cuadrilla. Descubriremos quen foron de nenos, con que intensidade viviron o seu primeiro amor, a súa primeira aventura e como se sentiron heroes, cando loitaban por conseguir aquela cabana máxica que lles podía conceder todos os seus desexos. Esta viaxe ao pasado, aos seus antigos anhelos e motivacións, fará que o publicista se reformule da noite para a mañá a súa vida.
Esta actividade foi organizada polo Departamento de Orientación e Actividades Extraescolares.
Agradecemos á Concellería de Sanidade do Concello de Ourense a participación neste programa.