Para ver o protocolo de funcionamento do comedor pinchar aquí

1. Segundo a Orde do 19 de maio de 2021 pola que se aproba o calendario escolar para o curso 2021/2022 nos centros docentes sostidos con fondos públicos na Comunidade Autónoma de Galicia, a impartición efectiva das clases e funcionamento do comedor, no segundo ciclo de educación infantil e en educación primaria, será desde o día 09 de setembro de 2021 ata o 22 de xuño de 2022, ambos inclusive.
2. Os formularios de autodeclaración do comedor poderán entregarse antes do 08 de setembro de 2021. Será necesario ter pagos os impresos do curso pasado para poder ser usuario do servizo de comedor.
3. Todo alumnado que teña algún tipo de alerxia ou intolerancia alimentaria terá que entregar en secretaría do centro o correspondente certificado médico antes do 08 de setembro.
4. As solicitudes para colaborar no comedor poderán entregarse antes do 08 de setembro. Será necesario aportar a acreditación de non ter sido condenado en sentencia firme por delitos sexuais, ademais de certificación acreditativa dunha entidade financeira onde dispoñan de conta. 
5. Os cheques de axuda de material escolar poderán recollelos nos primeiros días de setembro.
6. Cada mañá deberá facerse, NA CASA, a enquisa de autoavaliación clínica familiar e comprobar que ningún membro presente algún síntoma compatible coa COVID-19. Os resultados non teñen que enviarse ao centro, pero si comunicar a ausencia. Diante da aparición de polo menos un dos síntomas que aparece na enquisa, os proxenitores non enviarán ao alumnado ao centro e solicitarán consulta co seu médico ou pediatra.
7. En caso de sospeita, o alumnado non poderá acudir ao centro, deberán comunicarllo ao Equipo Covid do centro e tamén ao pediatra para que o valore e, de ser positivo, que propoña medidas sanitarias.
8. Se a sospeita recae noutro membro da unidade familiar que non sexa o alumnado, tomaranse as medidas que nos proporcionen desde o centro de saúde de referencia.
9. O alumnado de primaria (a partir dos 6 anos) ten a obriga de usar máscara en todo momento, polo que deberán de traer diariamente un estoxo (“riñonera”) para gardala no caso de que, por exemplo, acudan ao comedor. Tamén será preciso traer unha máscara de recambio.
10. A pesares de que en infantil a máscara non sexa de uso obrigatorio, consideramos que é altamente recomendable traela, nas mesmas condicións que o alumnado de primaria.
11. Haberá soportes con xel hidroalcoholico distribuídos polo centro para desinfección das mans, ademais de soportes nos baños con xabón e papel desbotable.
12. Realizaranse ventilacións frecuentes das aulas, sempre e cando as condicións meteorolóxicas o permitan.
13. Realizarase dúas veces ao día, unha pola mañá e outra ao finalizar as clases, a limpeza de todos os aseos do centro.
14. O alumnado de infantil non empregará mandilón ao longo do curso escolar.
15. Tanto no transporte como no comedor, o alumnado terá asignado o mesmo sitio para todo o curso.
16. O acceso ao centro para o alumnado transportado será, nos meses de setembro e xuño, a partir das 9.15 horas; nos meses de outubro a maio, a partir das 9.45 horas. O alumnado non transportado poderá acceder ao centro, nos meses de setembro e xuño, ás 9.30 horas (ou a partires das 9.15 horas nos casos debidamente xustificados); nos meses de outubro a maio, ás 10.00 horas (ou a partires das 9.45 horas nos casos debidamente xustificados), ou unha vez que todo o alumnado transportado faga a súa entrada. Todo o alumnado que acceda ao centro, trasladarase directamente a súa aula, non podendo quedar no patio nin no vestíbulo do centro. O alumnado que non faga uso do comedor, nos meses de outubro a maio, fará a súa entrada ás 14.50 horas.
17. O alumnado transportado fará a súa saída, nos meses de setembro e xuño, ás 15.15 horas, ao igual que o alumnado non transportado. Aquel alumnado que non faga uso do comedor, fará a súa saída ás 14.30 horas. Nos meses de outubro a maio, todo o alumnado fará a saída do centro ás 16.30 horas; o alumnado que non faga uso do comedor, fará a súa saída ás 13.20 horas. Os familiares agardarán no exterior do centro.
18. O alumnado de cada aula constituirá un Grupo de Convivencia Estable, os cales se manterán na distribución do comedor.
19. Os recreos do alumnado de infantil e primaria serán á mesma hora. Cada grupo terá unha zona específica de xogo.
20. Tendo en conta as medidas sanitarias de hixiene e protección establecidas, non se admitirá no centro ningún tipo de alimento externo para a celebración de eventos, conmemoracións, aniversarios ou calquera tipo de actividade, coa excepción dos almorzos individuais.
21. Os familiares do alumnado acudirán ao centro cando sexa imprescindible, e procurarase resolver calquera tema a distancia (vía telefónica, vídeochamada ou correo electrónico). O acceso ás instalacións do centro por parte doutras persoas que non sexan ou alumnado ou persoal, terá que contar co preceptivo permiso e requirirá a hixiene de mans, o emprego de máscara e a toma de temperatura.

Atentamente,

O director e coordinador do equipo Covid do CEIP Plurilingüe Santa Eulalia de Dumbría

Daniel Mato Neira

Estimadas familias:

Modifícanse os días para recoller os vales de libros de texto e material.

Finalmente, serán os días 22 e 23 de xullo, ambos inclusive. O horario será de 11.00 a 12.30 horas.

Atentamente, 

O EQUIPO DIRECTIVO

Estimadas familias:

O próximo venres, 16 de xullo, de 10.00 a 12.00 horas, poderán recoller os historias académicos do alumnado de 6º de Educación Primaria.

Atentamente,

O EQUIPO DIRECTIVO

Estimadas familias:

Segundo a Orde do 19 de maio de 2021 pola que se aproba o calendario escolar para o curso 2021/2022 nos centros docentes sostidos con fondos públicos na Comunidade Autónoma de Galicia, a impartición efectiva das clases e funcionamento do comedor, no segundo ciclo de educación infantil e en educación primaria, será desde o día 09 de setembro de 2021 ata o 22 de xuño de 2022, ambos inclusive.

O período de adaptación do alumnado en educación infantil que se incorpora por primeira vez ao centro non se prolongará máis alá do día 21 de setembro de 2021.

Atentamente,

O EQUIPO DIRECTIVO

Estimadas familias:

O próximo 09 de xullo publicarase a listaxe provixional de axudas de libros de texto e material en Educación Primaria para o próximo curso.

Poderase reclamar nos dous días seguintes á publicación da listaxe provisional.

A listaxe definitiva publicarase o 20 de xullo de 2021.

Os vales, tanto para libros como para material, poderanse recoller no centro do 21 ao 23 de xullo, ambos inclusive. O horario será de 11.00 a 12.30 horas.

Para consultar as listaxes, tanto provisionais como definitivas, poderán:

• Chamar ao centro (Teléfono: 881880654) 
• Enviar correo electrónico a ceip.santaeulalia.dumbria@edu.xunta.gal 
• Acudir ao centro, en horario de 11.00 a 12.30 horas.
• Entrando en https://www.edu.xunta.es/fondolibros no menú "Cidadáns".

Atentamente,

O EQUIPO DIRECTIVO

Estimadas familias:

Recordámoslles que o horario de xornada continua dará comezo o martes, día 01 de xuño. 

Este horario distribúese da seguinte maneira:

• Clases: 9.30 - 14.30 horas.
• Comedor: 14.30 - 15.10 horas.
• Saída: 15.15 horas.

Atentamente,

O EQUIPO DIRECTIVO

Estimadas familias:

No día de hoxe, saíu publicada no DOG a Orde do 06 de maio de 2021 pola que se regula a participación no fondo solidario de libros de texto e se convocan axudas para adquirir libros de texto e material escolar destinadas ao alumnado de educación primaria, educación secundaria obrigatoria e educación especial para o curso 2021/2022.

Esta orde ten por obxecto regular:

a) Á participación no fondo solidario de libros de texto do alumnado matriculado en 3º, 4º, 5º e 6º de educación primaria e en 1º, 2º, 3º e 4º de educación secundaria, cursos en que, necesariamente, se manterán os libros de texto do curso 2020/2021.

b) Á convocatoria de axudas para adquirir libros de texto destinadas ao alumnado matriculado en 1º e 2º de Educación Primaria e en educación especial, así como as axudas que pode recibir o alumnado incluído nas disposicións adicionais primeira e segunda desta orde.

c) Á convocatoria de axudas para adquirir material escolar destinadas ao alumnado matriculado en EP, ESO e EE.

O prazo para presentar solicitudes permanecerá aberto desde o día 21 de maio ata o 22 de xuño, ambos inclusive. O horario de atención ao público será de Luns a Venres, no mes de maio, de 10.00 a 10.50 horas, e no mes de xuño, de 9.30 a 10.20 horas. É de obrigado cumprimento o respecto ás medidas de prevención e hixiene (uso de mascarilla...). 

As solicitudes poderán presentarse por vía telemática empregando a aplicación informática "fondolibros" (https://www.edu.xunta.es/fondolibros) a través da sede electrónica da Xunta de Galicia, https://sede.xunta.gal, ou ben presencialmente nos propios centros docentes, así como en calquera dos lugares e rexistros establecidos na normativa reguladora do procedemento administrativo.

As persoas interesadas deberán achegar, debidamente cubertos, o Anexo I-II, máis a seguinte documentación:

• Copia do libro de famlia ou documento equivalente, onde figuren o alumno e os demais membros computables da unidade familiar.
  
• En caso de separación ou divorcio, deberán achegar, ademais, a sentenza xudicial e/ou convenio regulador onde conste a atribución da custodia do/a menor.
• Certificado de discapacidade do/da alumno/a ou calquera membro da familia non expedido pola Administración Autonómica.
• Documentación xustificativa da situación de violencia de xénero no ámbito familiar, en calquera das formas que enumera o artigo 5 da Lei 11/2007, do 27 de xullo, galega para a prevención e o tratamento integral da violencia de xénero.
• Resolución xudicial de incapacitación con patria potestade prorrogada ou rehabilitada.
• Resolución administrativa ou xudicial acreditativa da situación de acollemento ou do certificado do centro de menores, para o alumnado en situación de tutela ou garda da Xunta de Galicia.
• Certificado de convivencia, volante de convivencia ou informe dos servizos sociais ou do órgano equivalente do concello onde resida a familia, no caso de que o pai ou o titor ou titores carezan de DNI e NIE.

Os documentos deberán ser válidos e eficaces no momento da súa presentación, e reflectir a situación persoal, familiar e económica a 31 de decembro de 2019, agás no caso de violencia de xénero, en que se aplicará o disposto na lexislación específica.

A data máxima para a devolución de libros empregados neste curso 2020/2021 en 3º, 4º, 5º e 6º de educación primaria será o 22 de xuño, inclusive.

Atentamente,

O EQUIPO DIRECTIVO

Estimadas familias:

Pola presente infórmase que acaba de ser publicada a listaxe definitiva de admisión para o curso 2021/2022 no CEIP Plurilingüe Santa Eulalia de Dumbría.

Por protección de datos, esta listaxe só se pode consultar presencialmente no taboleiro de anuncios do centro e tamén a través da aplicación AdmisiónAlumnado, para o que será preciso identificarse coa Chave365 ou co certificado dixital da FNMT.

En todo caso, infórmase que TODO O ALUMNADO QUE PRESENTOU SOLICITUDE FOI ADMITIDO.

Nos próximos días avisaremos ás familias para proceder coa formalización da matrícula.

Atentamente,

O EQUIPO DIRECTIVO

Estimadas familias:

O prazo de solicitude de admisión para o próximo curso 2022/2023 estará aberto desde o día 01 ata o 21 de marzo, ambos inclusive.

As familias poderán cumprimentar as solicitudes de xeito manual ou a través da aplicación admisión alumnado no menú Solicitude-Admisión-Crear. Esta solicitude deberase presentar no centro educativo solicitado en primeiro lugar ou en calquera dos lugares que establece a Lei 39/2015, do 01 de outubro, do Procedemento Administrativo Común, incluída a Sede Electrónica, para o que se precisará de Chave365 ou certificado dixital, sendo esta a canle preferible de presentación.

Aquelas familias que desexen cubrir as solicitudes de xeito manual, poden descargar nos seguintes enlaces os correspondentes formularios:

• Galego
• Castelán

Documentación a presentar: Fotocopia libro de familia, fotocopia certificado de empadronamento, fotocopia DNI dos proxenitores, fotocopia cartilla de vacinación alumno/a solicitante, fotocopia tarxeta sanitaria alumno/a solicitante, 4 fotos tamaño carnet alumno/a solicitante e sentenza xudicial de separación ou divorcio e/ou convenio regulador onde conste a custodia do menor, de darse o caso.

Horario de atención ao público: de Luns a Venres, de 10.00 a 10.50 horas. Mércores, de 15.40 a 16.30 horas.

Atentamente,

O EQUIPO DIRECTIVO