Iniciar sesión: Acceso

Benvidos á nosa web!

 

 

Recuncho virtual onde pretendemos amosar as experiencias educativas levadas a cabo na escola, ademais de proporcionarvos moita información relativa ao centro escolar. Esperamos que a información que vos demos sexa do voso agrado e aceptamos atentamente todo tipo de suxerencias que nos podan axudar a enriquecer a nosa páxina web. 

 

Gustaríanos que este novo recurso que temos na escola sirva para sentir a escola coma un novo lugar de convivencia, de relación, de aprendizaxe, de disfrute,... por parte de todos os membros da comunidade educativa e da xente interesada en coñecer as experiencias desenvolvidas no noso centro escolar. 

 

Para disfrutar de toda a información da páxina debedes de adentrarvos polas diferentes seccións que podedes ver nos menús da dereita ou da esquerda.  

 

Un cordial saúdo

 

Entrevista ao arqueólogo Xosé Gago

O alumnado de 5º e 6º entrevistou en Radio Guímaro ao arqueólogo Xosé Gago. 

Disfrutade do programa, unha viaxe a través da historia,  no que coñeceredes máis sobre o noso pasado.

Queremos dar as gracias a Xosé pola infinidade de coñecementos cos que nos empapou, por achegarnos a unha profesión realmente interesante...

Seguiremos realizando actividades en conxunto polo que estade moi atentos á nosa web e a Radio Guímaro.

 

 

 

Programa de radio sobre a semana do deporte

O alumnado de 5º elaborou un programa de radio para lembrarnos as actividades desenvolvidas na semana do deporte e as súas valoracións.

Día do libro

O luns,23 de abril, conmemórase o Día do Libro. Un libro é unha ventá aberta á diversidade de culturas, son fontes de información, novas oportunidades que nos permiten sentir, voar…

Ler, entre outras cousas, axúdanos a expresarnos mellor, a adquirir novo vocabulario, a ser creativos…

Durante esta xornada, realizamos as seguintes actividades:

“Apadriña un conto”. O alumnado de 5º e 6º contoulle un conto ao alumnado de 1º e 2º, e 3º e 4º fixeron o propio co de infantil.

Os contos centráronse nas emocións, xa que recoñecer e saber expresar emocións é moi importante para o desenvolvemento da personalidade.

Despois,  falaron sobre o que sucedeu, as personaxes que interviñeron, o que aprenderon do conto…

Nas últimas datas fixemos un traballo de investigación. Coincidindo que no 2018 se cumpren 500 anos da primeira volta ao mundo, nós tamén quixemos viaxar polo mundo adiante. Descubrimos Oceanía, Asia, África, América e Europa: os países de cada continente, as súas costumes, os seus principais escritores…

A verdade é que aprendemos moito e todo o traballo e esforzo realizado mereceu a pena. Aínda que quedaron moitos coñecementos dentro de nós, tratamos de plasmalos en diferentes murais, que nos próximos días servirannos para “compoñer” o mundo. 

 

O noso colexio

O alumnado de 6º elaborou un programa de radio no que deron a coñecer o noso colexio: os proxectos nos que estamos inmersos, actividades que levamos a cabo, conmemoracións...

Difrutade do programa de Radio Guímaro.

Coñecendo a nosa historia

O pasado mércores, 25 de abril, realizamos unha visita á escavación que están facendo en Repil Xurxo Ayán, Xosé Gago e o seu equipo. Da súa man coñecemos máis de preto o que aconteceu na nosa contorna nos anos posteriores á guerra civil española, e máis en concreto o 20 de abril de 1949, cando foron asasinados catro homes por pensar de xeito diferente ao sistema franquista.

Comprendemos as dificultades que pasaron os nosos avós e avoas, démonos conta de que a historia só se entende mirando atrás…

Hoxe entrevistamos en Radio Guímaro a Xurxo Ayán; deixámosvos o programa para que poidades disfrutar del.

Nos vindeiros días acudirá á nosa radio Xosé Gago, que nos falará da escavación que se está realizando no Castro de San Lourenzo.

Ambos cóntannos a historia a través da arqueoloxía, son verdadeiras fontes de información para nós.

Xornada de educación ambiental

O venres, día 20 de abril, o alumnado de 3º, 4º, 5º e 6º participamos na segunda xornada de educación ambiental organizada polo Grupo de Desenvolvemento Rural (GDR), en Folgoso do Courel.

Dentro da actividade Sementar Sementarei, fixemos un taller que consistía en realizar bólas de arxila para meter dentro unha landra, xunto con abono e sementes de trevo. O obxectivo desta técnica é protexer a landra.  Aproximadamente dentro dun mes estarán ben secas e poderanse “lanzar” á terra.

Despois deste primeiro obradoiro, tivemos un anaco para a merenda.

A continuación, movémonos en autobús uns quilómetros máis adiante, cara os montes de Folgoso, para plantar un castiñeiro.

Neste mesmo intre, fomos agasallados cunha árbore para plantas nas nosas casas.

Aproveitamos para comer na carballeira onde fixemos o primeiro obradoiro e disfrutar así da natureza.

Por tanto, vivimos unha mañá de concienciación da importancia de coidar o medio ambiente, de manter limpos os montes, da vitalidade das árbores…

 

Obradoiro alimentación saudable

O xoves, 19 de abril, a asociación monfortina Cior organizou no centro unha xornada sobre hábitos alimentarios saudables. Acudiron dúas psicólogas, unha educadora social e un traballador social.

O alumnado participou en dous grupos. Primeiro, os nenos e nenas de infantil, 1º e 2º, e logo o alumnado de 3º a 6º.  Cada un dos obradoiros tivo unha duración de entre 30 e 40 minutos. Consistían nunha charla sobre a importancia de comer de xeito saudable, así como algún xogo de sensibilización no que por exemplo tiñan que mercar unha cea beneficiosa para a saúde, clasificar alimentos de consumo diario, consumo ocasional…

Queremos dar a gracias a esta asociación por axudarnos a seguir inculcando uns hábitos imprescindibles no alumnado.

Día da árbore

O 21 de marzo conmemórase o Día Mundial da árbore. Este ano entre algunha saída que fixemos ultimamente, a radio escolar, a semana do deporte…aínda non plantáramos a árbore que envía a Deputación, así que o fixemos onte.

Para plantar o salgueiro colaboramos entre todos, mentres falábamos da importancia das árbores, dos seus beneficios, dos coidados que precisan…

Primeiro, o alumnado fixo o burato para meter a árbore; a continuación botáronlle terra e abono.

O seguinte paso, foi pisar a terra para que quedase ben prensada.

Finalmente, regámolo.

Deixámosvos algunhas fotos, para compartir con vós esta experiencia.

Ademais, nas últimas datas, durante a hora de ler o alumnado de infantil, 1º e 2º traballou co conto "A auga, o dragón e o salgueiro", e de 3º a 6º fixérono co conto "A invención do salgueiro".

Coñecendo máis sobre a compostaxe

O pasado xoves, 12 de abril, acudiu ao centro Elvira para falarnos sobre a compostaxe, unha técnica mediante a cal se crean as condicións precisas para que, a partires de residuos orgánicos, os organismos descompoñedores fabriquen un esterco de elevada calidade.

Aprendemos que podemos depositar follas frescas e restos de sega e céspede, restos de froita e verduras, bolsas de infusións e pousos do café, restos de plantas, flores vellas, restos de carne e peixe, cascas de ovos, ósos de froita, cinsas de madeira non trata, cartóns de ovos, servilletas de papel…

Quedounos moi claro que non podemos depositar cinsa de carbóns ou madeira tratada, feces humanas, cueiros desbotables, cabichas de tabaco, plásticos, metais, vidro…

Que beneficios ten o compost? Ten efectos na estrutura do solo, sobre a súa saúde, sobre os nutrientes das plantas, beneficios económicos…

Por que é importante realizar a compostaxe? Porque reducimos a cantidade de lixo que remata nos vertedoiros e/ou incineradora. Permite pechar o ciclo da materia orgánica. Ademais, porque acadamos un esterco de alta calidade para as nosas plantas sen ningún tipo de produto químico. Indudablemente enriquecemos o solo, devolvéndolle a materia orgánica.

Tamén tratamos aspectos como os parámetros do proceso da compostaxe: temperatura, humidade, aireación…

Despois de coñecer todo isto, é momento de aplicalo, de levalo á práctica, e non hai mellor maneira de facelo que no comedor. Así que cada día contribuímos a encher o compostador que temos ao carón do centro.

Distribuir contido