Iniciar sesión: Acceso

Benvidos á nosa web!

 

 

Recuncho virtual onde pretendemos amosar as experiencias educativas levadas a cabo na escola, ademais de proporcionarvos moita información relativa ao centro escolar. Esperamos que a información que vos demos sexa do voso agrado e aceptamos atentamente todo tipo de suxerencias que nos podan axudar a enriquecer a nosa páxina web. 

 

Gustaríanos que este novo recurso que temos na escola sirva para sentir a escola coma un novo lugar de convivencia, de relación, de aprendizaxe, de disfrute,... por parte de todos os membros da comunidade educativa e da xente interesada en coñecer as experiencias desenvolvidas no noso centro escolar. 

 

Para disfrutar de toda a información da páxina debedes de adentrarvos polas diferentes seccións que podedes ver nos menús da dereita ou da esquerda.  

 

Un cordial saúdo

 

CONVERSAS CO ARQUEÓLOGO XURXO AYÁN EN RADIO GUÍMARO ACERCA DE ANTÓN FRAGUAS

CONVERSAS CON XURXO AYÁN SOBRE ANTÓN FRAGUAS EN RADIO GUÍMARO.

O venres, 21 de maio vivimos unha xornada ben interesante, repleta de información que ademáis vindo da man de Xurxo Ayán sempre resulta rica, emocionante e divertida.

Xurxo Ayán tivo a sorte de coñecer persoalmente a Antonio Fraguas, e nós pedímoslle  que viñera a radio Guímaro, para coñecer mellor a esta gran figura das Letras Galegas. Asi que veu, pero cunha boa sorpresa...porque, se algo caracteriza a Xurxo, e que sempre consigue intrigarnos, asombrarnos...por iso nos gusta tanto escoitalo.

Nestes intres está a dirixir unha excavación en Vilachá, pois hai bastantes indicios de que alí houbese na idade media un mosteiro. Un deles é o nome que recibe a ribeira donde están a facer a excavación: Val dos Frades.

Xurxo traia con él un maletín pequeno con grandes sorpresas dentro: algúns dos achados recentes desta excavación que Xurxo nos explicou e mostrou así, de primeira man.

Sacou do maletín unhas bolsiñas de plástico, como as de conxelar os alimentos pero esta vez con outra función. Puidemos ver de primeira man, como se gardan e catalogan os obxectos que se atopan nas excavacións, para envialos aos laboratorios. As bolsas contiñan etiquetas con datos: nome, lugar, data, códigos....

Ensinounos, en primicia, un coitelo de ferro de hai aproximadamente uns 800 anos, un anaco dunha cacerola de barro e unha moeda, nada máis nin nada menos, que da època de Alfonso X.

Con esta información tan potente, pasamos ao outro tema non menos interesante: coñecer da súa man, máis da vida deste gran galego: Antón Fraguas. De novo a información empapounos..porque Xurxo semella unha bilioteca humana.

Queredes escoitala?

So tedes que escoitar os programas de Radio Guímaro que os nenos e nenas de quinto e sexto gravamos con Xurxo Ayán Vila.

Moitas grazas Xurxo....por aportarnos e enriquecernos tanto.

Conversas con Xurxo Ayán e os nenxs de 5º acerca de Antón Fraguas

Conversas con Xurzo Ayán e os nenxs de 6º acerca de Antón Fraguas.

Podedes disfrutar das imaxes desta enriquecedora conversa premendo aquí.

FESTIVAL DAS LETRAS 2019.

 

ANTON FRAGUAS: imaxe de Renfe.

 

O xoves, 16 de maio celebramos o festival das Letras Galegas, e nesa semana iniciamos actividades relacionadas coa figura de Antonio Fraguas que se desenvolverán ao longo do mes de maio.

Coñecemos a figura de Antón Fraguas a través da exposición dos carteis que recibimos no centro, como cada ano, e que expuxemos no comedor. Completamos a biografia consultando os libros que tiñamos na biblioteca.

Así soubemos desta gran figura galega, da que non coñeciamos nin a súa existencia, e comprendemos, mellor aínda, por qué cada ano se lle adica o Día das Letras Galegas a unha persoa que traballou, moitas veces en tempos difíciles, polo medrar e personalidade de Galicia. Algúns escritores como Rosalía, Manuel María, Castelao… merecen esa homenaxe e sirve para profundizar máis na súa obra; pero outros, como Antonio Fraguas é unha oportunidade para coñer a persoas que amaron, investigaron e traballaron para que a historia de Galicia saia a luz e ocupe o seu lugar. gracias a persoas como él…Galicia ten unha lingua, unha cultura e unha historia propias. Na nosa man está agora que teña presente e futuro. 

O xoves, celebramos como cada curso o festival das Letras Galega. Supón un traballo distinto, agora nos recreos, nas horas de ler, algunhas clases, ensaiamos as actuacións que decidimos facer cos nosos profesores. Nos nosos festivales sempre hai algo de todo: cantigas, bailes e sobre todo teatro…

Como cada curso esta é unha actividade aberta a toda comunidade educativa, e institucións…así que as nosas familias, os veciños do centro de día, persoal do concello, nos arroupan unha mañá na que nos sentimos importantes, coa responsabilidade de facelo ben, pois somos os protagonistas indiscutibles, especialmente o alumnado de 6º, sobre o que recae o maior peso da organización do festival. Presentaron o festival Eli, Aday e Brais. Leron a vida de Antonio Fraguas, os premios de Certame Letras Galegas, e responsabilizáronse de abrir e pechar cortinas Julia e Roi. 

Comezou o noso festival ás 11 da mañá. Os nervios, case o medo, pero tamén a responsabilidade de facelo ben conxúganse dun xeito especial…e pouco a pouco arroupados polos asistentes…iremos vivindo todxs xuntxs unha mañá inolvidable.

Os primeiros en actuar son os máis grandes artistas: Os nenos e nenas de infantil que dirixidos polo seu profe Oscar nos deleitaron cun fermoso conto tradicional que se presta moi ben para o teatro: “A ratiña presumida”.

En segundo lugar Xulia e Roi léronnos a vida e a obra de Antonio Fraguas.

A continuación os nenos e nenas de primeiro e segundo, dirixidos polos seus profes Paco e Dori puxeron en escea unha obra que combina a gracia e a mensaxe…pois Don Latin e Dona Grecia teñen unha nena, Gallecia, que é fermosa pero está enferma a lingua non lle medra porque non fala galego. Deixanos con moita gracia  unha fermosa mensaxe: coidar e falar a nosa lingua.

O alumnado de 5º e 6º, dirixidos polas súas profes Paula e Dori, puxeron en escea unha obra dun escritor  da localidade de Salcedo, que editou dous libros de obras de teatro para infatil e adultos que representan cada entroido en Salcedo. Javier, asistiu e agradeceunos que puxésemos en escea unha obra súa. Unha comedia simpática de dous rapaces  que van a cidade a unha discoteca… Remataron a obra cun baile moderno. A obraque representaron titúlase: “A bailar”.

O alumnado de 3º e 4º, dirixidos polo seu profe Pablo, escribiron e representaron, polo Nadal,  unha obra na que confronta  con moita gracia a convivencia das parellas no mundo rural; déronlle continuidade e se no Nadal se titulaba a obra: “A banca sempre gaña” (Un banco donde se sentaban as veciñas moi frecuentemente a resolver os problemas) seguiron escribindo eles mesmos para representarnos agora: “a banca sempre gaña ou non”. Agora son os homes os que ocupan o banco, con prederencia, e traman como vingarse das mulleres, que os fan traballar arreo…pero non acertan.

Voltaron os nenos e nenas de 5º e 6º que puxeron es escena a obra “Sen saír da casa”. Unha parodia chea de gracia, dun magazine no que se entrevista diversidade de persoas de actualidade. Hai noticias  graciosas e inxeniosas que crearon os alumnxs e que gravamos previamente na radio…tempo tamén para a publicidade con anuncios creativos e graciosos  que tamén crearon eles…e que igualmente gravaron na radio para emitir e actuar no festival en playback.

Coñecemos os gañadores do XXVIII Certame dos contos das Letras Galegas. Este ano, tendo en conta o Lema de Bibliotecas Escolares os premios consistiron en libros de poesía. Os gañadores  foron: 

  • Primeiro e segundo: Arianna e Antón

  • En terceiro e cuarto: Keira e Candela

  • Quinto e sexto: Amanda e Xulia.

 

E cando nos iamos despedir co himno galego Pablo, o profe de música e os nenos e nenas de 3º e 4º déronnos unha sorpresa. Soou unha polka e comezaron a bailar diante do escenario…pero empezaron a sacar a bailar a todxs e fomos formando unha fila que percorreo o espazo do salón  bailando ata que rematou a peza. Moi poucos quedaron sentados… unha sorpresa agradable que nos uniu un chisco máis nesta celebración alegre na que todos nos sentimos orgullos dos nosos nenos e nenas, familias e Mestres.

 

E rematamos o festival agradecendo a presencia de todxs e as colaboracións, satisfeitos do traballo dun gran equipo colaborativo no que participamos todxs.

SESIÓN DE LECTURA NO CENTRO DE DÍA: “Coas alas de Kovar”

O pasado mércores día 8 de maio visitamos aos nosos amigos e amigas do centro de día para ter unha sesión do noso club de lectura. Neste caso leran un conto de Elena Villar Janeiro: “Coas alas de Kovar”, que nos recomendaron e por certo: encantounos!.

Lemos o conto, reflexionamos sobre os problemas da inmigración, o descoñecemento das linguas, o mal que se pode pasar cando se chega a un cole novo…a importancia de axudar aos amigos e amigas que temos ao redor, especialmente se teñen uha minusvalía física, a eliminación de barreiras arquitectónicas…

Chegamos ao centro de día e pedíronnos que llo leramos outra vez…e así foi por cachiños volvemos ler  en voz alta esta historia tan fermosa.

Kovar ten un problema muscular….non pode ir ao patio, pasa os recreos sentado nun banco…Xermán chega novo ao cole…,  non coñece o idioma, así que ten que esforzarse máis, pero non lle importa. Sentado na aula ao lado de kovar…axúdao, acompañao no banco para que non quede só, nace unha fermosa amizade entre eles. Por fin poñen rampa no cole! Desde entón, Kovar, sairá na súa cadeira de rodas ao patio sempre con sempre co seu amigo que guía a cadeira, e xa poderá percorrer o patio, e xogar coa axuda de Xermán…

Pero a axuda é mutua, pois Kovar axudarao coa lingua… a relación dos amigos é consistente e une ao resto do grupo…tanto que acaban formando unha orquestra, coa axuda do profe de música, pois Xermán ten coñecementos musicais…formando un equipo cooperativo coa diversidade de instrumentos que toca cada un…

Desta lectura saíron frases tan fermosas como a amizade non ten barreiras, nin idades…a diversidade suma, os sentimentos son libres…Os nosos maiores contáronlles que antes era moito peor…porque tampouco existía a eliminación de barreiras físicas, co que xa non poderían nin saír da casa. Por outra banda, moitas persoas non podían querer libremente, había que escoitar as recomendacións do pai, por exemplo para casar, os ricos, ou señoritos non acostumaban a ser amigos dos labregos…

Foi unha sesión moi rica, na que os nosos nenos e nenas tiveron moi claro que os dereitos e melloras de que disfrutamos hoxe, non son gratuitos…detrás está a loita e o traballo calado, sumiso moitas veces dos nosos maiores, moi conscientes da inxustiza, e da necesidade de cambio e mellora.

Por iso temos que ser responsables cos dereitos e obrigas para construír unha sociedade crítica, constructiva e sustentable…donde debemos colocarnos todos  sen exclusións porque todos somos importantes e todos podemos aportar.

Disfrutade das imaxes premendo AQUÍ. 

PROGRAMA FESTIVAL LETRAS GALEGAS

FESTIVAL LETRAS GALEGAS 2019

O xoves, 16 de maio celebramos o festival das Letras Galegas.

Estades invitados a pasar unha mañá teatreira para celebrar as nosas letras.

Programa.

ESTAMOS DE NORABOA

Estamos todxs moi contentxs!!!

A asesoría de Bibliotecas Escolares de Galicia vén de concedernos un premio polas actividades desenvolvidas polos nosos biblioaxudantes especialmente (Os nenos e nenas de 5º e 6º) en relación coa biblioteca escolar.

Nesta convocatoria participaramos 82 centros de todo Galicia. Selecionaron dez, dous da provincia de Lugo: o CEIP Virxe do Carme de Sober e o noso!.

Aquí tedes o enlace a resolución da convocatoria do voluntariado de lectura.

 

Enlace a convocatoria

 

 

SEMANA DO DEPORTE.

Un ano máis chegou unha das nosas semanas preferidas do curso, a Semana do Deporte. Con esta actividade buscamos o fomento da práctica da actividade física entre todo o alumnado

A actividade física é fundamental no desenvolvemento integral dos nenos e nenas xa que nos permite inculcar valores importantes como o traballo en equipo, a superación ou o emprendemento e ten moitos beneficios para o noso organismo. 

Aquí vos contamos todo o que disfrutamos. Se premedes nos títulos podedes ver as imaxes de cada actividade. Disfrutádeas!

Luns: Miniolimpiadas I. 

O primeiro día estivo adicado ao deporte rei, o atletismo, o cal combina habilidades básicas que facemos de forma innata. Así, todos os nenos participamos en carreiras de velocidade, carreiras de resistencia e carreiras por relevos. Competimos en grupos mixtos por cursos e os gañadores de cada unha das carreiras puideron pasar unha segunda volta se ben o importante non é ser o vencedor, se non participar e compartir cos nosos compañeiros. 

Martes: Miniolimpiadas II. 

Continuamos co deporte rei, neste caso con outras especialidades e foi o momento dos saltos de altura, o lanzamento de peso e as carreiras de valados. No pavillón fixemos un circuito con tres estacións que estaban dirixidas polos nenos e nenas de sexto que nos axudaban no control e organización de cada actividade. Os demais distribuimonos en tres grupos mixtos e comezamos a disfrutar. Na carreira de valados tiñamos vallas de diferentes alturas para poder salvalas e todos nos animamos a subir un pouco a altura, incluso os máis pequenos. No salto de altura tivemos que sortear unha goma elástica para caer sobre o quitamedos. Cada vez que o intentábamos subíamos un poquiño a altura e todos fomos capaces de superarnos as nós mesmos. Por último lanzamos o peso o máis lonxe que puidemos. Os máis pequechos tiraron un balón pequenos pero os maiores atrevéronse cun de dous kilos e tod@s o fixeron moi ben. 

Xoves: Sobre rodas!

Despois do éxito dos anos anteriores estabamos ansiosos porque chegara este día. Os profes convertiron o pavillón en un gran circuito cheo de carreteras, rotondas, pasos de peóns... e nós, con todos os nosos vehículos circulamos por el respectando as normas de seguridade vial. Monopatins, bicicletas, triciclos, patíns... todo valía. Cada un de nós tiña un carné con doce puntos e os mestres convertéronse en gardas civís e multáron cada vez que se incumprían as normas. Algún ata tivo que correr arredor do pavillón para recuperar algun punto e poder seguir participando. 

Queremos agradecer as familias a súa colaboración para traer e recoller todos os vehículos e que así puidésemos disfrutar desta actividade. 

Venres: Sobre rodas, volei e partido!

Para despedir a Semana do Deporte tivemos un día do máis completo. 

Despois do recreo tivemos con nós a visita de Manolo Martínez e Noelia, dous adestradores do Clube de Voleibol Ribeira Sacra de Monforte que nos viñeron a ensinar e a iniciar neste deporte. Primeiro, os nenos e nenas de 3º a 6º aprendemos o toque de dedos, de brazos, o saque e incluso iniciámonos no remate. Despois tamén viñeron os máis pequenos que xogaron cos balóns de volei e incluso se pasaron por riba da rede do patio. Todos e todas disfrutamos moito. Agradecerlle a Manolo e a Noelia a súa presenza neste día e todo o que nos ensinaron. Esperamos tervos connosco noutras ocasións. 

Xa pola tarde e dado que o día anterior quedammos con ganas, volvemos a repetir a actividade "Sobre rodas" e temos que dicir que cada vez o facemos mellor e respectamos máis as normas viarias. 

E para despedirnos, nada mellor que un partido mestres- alumn@s. Todos nos calzamos as zapatillas e animámonos co fútbol sala. Ademais, contamos con dúas visitas moi especiais, Vanesa e Julio, os profes que marcaron o ano pasado e que non se quixeron perder a actividade. Todos xogamos, rimos, compartimos e algún mestre que xa anda algo maior ata se nos lesionou, aínda que mereceu a pena o esfrozo. 

 Así despedimos unha semana deportiva coa que quedamos moi contenos. Un ano maís foi unha experiencia moi positiva e que esperamos manter en nos próximos anos por ver as caras de diversión e cariño dos nenos e nenas do cole. 

 

COÑECÉNDONOS MÁIS.

As dúas últimas semanas, os nenos e nenas de 5º e 6º de Educación Primaria tivemos unha visita que nos axudou a coñecernos un pouquiño máis. 

Tivemos con nós ao Doutor Miguel Francisco Rodríguez Piñán, un médico especializado en sexoloxía que, xunto con outra compañeira, recorren os centros educativos co fin de axudarnos a reflexionar e compartir os cambios que todos sufrimos na adolescencia. 

Ao longo de dúas sesións, estudamos acerca dos nosos aparellos xenitais, de como cambiamos a medida que cumprimos anos, falamos acerca da menstruación nas nenas e os produtos hixiénicos que temos que utilizar e puxemos en común moitas inquedanzas que tiñamos. Ao principio estabamos todos moi avergoñados pero pouco a pouco e grazas ao doutor puidemos resolver moitas dúbidas. Tamén falamos acerca das relacións sexuais, os métodos anticonceptivos e as consecuencias que poden traer os nosos actos  o que cremos nos fixo un pouco máis responsables. 

Francisco animounos a que falásemos e compartísemos as nosas dúbidas e inquedanzas coas nosas familias xa que son elas as que mellor nos poden acompañar no noso descubrimento como persoas. 

Foron dúas sesións moi proveitosas polas que temos que agradecer ao doutor polo seu traballo.

Podedes ver as fotos das sesións premendo aquí. 

 

"A Educación sexual empeza coa educación dos afectos"

SEMANA DO LIBRO.

O día 23 de abril, coincidindo co aniversario da morte de Cervantes, celébrase o Día do Libro, unha data moi especial no noso centro. Os libros son o eixo fundamental da nosa escola, cos que estudamos, descubrimos, viaxamos, compartimos.... así que a celebración converteuse nunha semana de actividades coas que todos disfrutamos e aprendimos. 

 

 

 

APADRIÑAMENTOS LECTORES. 

Un ano máis levamos acabo esta actividade na que os nen@s máis maiores, dende 4º a 6º de Educación Primaria, cóntanlle un conto aos máis pequenos do cole. Cada un dos maiores escolleu un libro que lle gustara e preparou a lectura. Durante as horas de ler de toda esa semana sorteamos os agrupamentos e puxémonos a ler. "O monstro de cores", "Vacío", "Blobló", "Elmer".... e un montón de títulos máis soaron nas voces dos nen@s e os peques disfrutaron un montón. 

Ademais, a localización da actividade foi moi especial: estrenamos a nova biblioteca. A pesares de non ter aínda mobles xa puidemos comezar a disfrutala e que mellor día e ocasión ca esta. 

 

BOOKTUBERS

AS novas tecnoloxías son un recurso moi interesante e tamán se pode unir aos libros. Nesta actividade todo o alumnado de educación primaria convertémonos en booktubers. Durante as vacacións de semana santa todos os nenos e nenas levamos o seu libro preferido da biblio para volver a lelo. Ademais tiñamos que completar unha ficha na que contabamos un pouco do argumento e o motivo polo que os demais compañeiros deberían ler ese libro. 

Unha vez feito ese traballo, cada un de nós preparou unha pequena presentación e convertémonos en famosos youtubers! Os profes grabáronnos e montamos o video para publicar as nosas recomendacións lectoras. Os nenos e nenas de 3º e 4º incluso creamos as nosas propias marionetar para contar o noso libro e o resultado foi xenial. 

Nos seguintes enlaces podedes disfrutar do resultado. Esperamos que vos guste: 

 

POEMAS COMPARTIDOS. 

O último día disfrutamos coa poesía. Aproveitando que o tema deste ano de Bibliotecas Escolares é "poéticas diversas" decidimos que os maiores despedisen esta semana de actividades recitando poemas ao resto de compañeiros e mestres. 

Cada un de nós recitou un poema escollido de diferentes libros: "Os soños na gaiola" de Manuel María, "Roseira do teu mencer" de ñAlvarez Blázquez ou "A casa de había unha vez" de Ana María Fernández. 

Os máis maiores preparamos moi ben os nosos poemas e a todos disfrutamos moito deste xénero. 

E ata aquí a semana de celebracións do día do libro que nos permitiu descubrir novas aventuras, experiencias, ideas... ademais de aprender moito. 

Se premedes nos títulos de cada actividade podedes difrutar de todas as fotos.

XOGANDO COA XEOGRAFÍA.

O pasado martes, os nenos e nenas de 5º e 6º de primaria tivemos unha clase de ciencias moi entretida. Xa que no pasado tema nos tocou estudar a Unión Europea, os países, capitais e bandeiras, fixemos unha xornada de repaso, pero intetamos que fora entretida e divertida. 

Na nosa biblioteca temos milleiros de libros, robots, ordenadores, e tamén temos xogos! Así que decidimos aproveitalo. O noso xogo chámase "Países de Europa" e nel todos nos convertemos en turistas que viaxamos arredor do noso continentee. Nunhas tarxetas vannos dando pistas como a localización no mapa, a capital e a bandeira de cada país, e con elas temos que adiviñar onde nos atopamos. Cantas menos pistas precisemos, máis puntos levamos ee antes chegamos ao noso destino. 

O xogo é un recurso educativo fundamental e que ademais resuta atraínte e motivador para todos. 

Disfrutade das imaxes aquí.

Distribuir contido