Skip to Content

Benvidas/os ao curso 2023/24!!

Ven, 01/09/2023 - 17:58

Para preparármonos para este novo curso 2023/24, no CEIP Plurilingüe Bragade, como vén sendo habitual antes do comezo das clases, o vindeiro 8 de setembro de 2023 ofreceremos varias reunións sobre organización do centro, normas e procedementos básicos, titoría colectiva coa persoa titora e co profesorado especialista, resolución de dúbidas, etc.

Podedes consultar na imaxe os horarios!!

CONCURSO de POESÍA e DEBUXO 2023

Xov, 09/03/2023 - 15:13

Benqueridas/os nenas/os do CEIP Plurilingüe Bragade: 

Como este curso 2022/23 estamos desenvolvendo convosco o programa do PROXECTA+, 15. METEOESCOLAS, decidimos conmemorar o Día Mundial da Poesía e o Día Meteorolóxico Mundial, 21 e 23 de marzo respectivamente, conxuntamente a través do Concurso de Poesía (para Primaria) e no Concurso de Debuxo (para Infantil) do cole. Así que dende os Equipos de Actividades Extraescolares e Complementarias, Biblioteca e Dinamización da Lingua Galega animámosvos a participar. 

 

As poesías, que serán en galego, e debuxos deberán versar sobre o tempo meteorolóxico e faranse nunha cartolina (tamaño folio dinA4), a cal nola podedes pedir.

 

Haberá 1 premio para cada participante e outro especial por nivel!!!

Ánimo! A concursar! 

 

Límite de entrega: luns 20/marzo ás 14:30 H.

Entrega de premios: mércores 22/marzo 

22/marzo/2023

O xurado dos Equipos de Actividades Extr. e Compl., Biblioteca e Dinam. da Lingua Galega non o tivo nada doado para elixir o alumnado gañador do Concurso de Poesía (Pri.) e Debuxo (Inf.). Cada participante tivo un pequeno agasallo e outro a maiores para a persoa gañadora de cada nivel.
Parabéns aos 29 participantes e ás 8 persoas gañadoras!!

Día Internacional da Muller, 8M 2023

Mér, 08/03/2023 - 16:46

Para conmemorar o Día Internacional da Muller, o 8M, no CEIP Plurilingüe Bragade contamos hoxe coa heroína Súper Manuela, quen traballou co alumnado a través de contos e dun xeito moi ilustrativo, participativo e divertido a temática da igualdade. Ademais, novamente tivemos a sorte de contar con tradución simultánea a lingua de signos a cargo da nosa intérprete, Raquel.

ENTROIDO 2023 (última act. 16/02/23)

Ven, 10/02/2023 - 17:08

O Entroido logo chega!!! E velaquí veñen os mandadiños... Moito ollo ás pistas que nos dá o noso esqueleto do laboratorio, Paquiño, co que nos diga que hai que traer ao CEIP Plurilingüe Bragade, pois cada día colgaremos o que nos vaia dicindo.

LUNS 13 FEBREIRO 2023

Xa se achega o Entroido,

moito ollo a Paquiño,

que nos vai ir dando pistas

dos seguintes mandadiños.

 

Comeza con algo sinxelo,

da nosa zona corporal,

así que arriba de todo,

algo deberás colocar.

______________________________

MARTES 14 FEBREIRO 2023

 

Lembra o que xa puxeches,

de novo voltao colocar,

mais agora outra cousa,

logo vas ter que levar.

 

O parrulo teno longo,

o aire pasa ao respirar,

baixa tamén a comida,

procura non te atragantar!

______________________________

 MÉRCORES 15 FEBREIRO 2023

 Xa levamos dúas cousas,

do que vimos a Paquiño, 

baixamos no noso corpo,

algo máis que un pouquiño.

 

Na extremidade superior,

na que escribes e na que non,

has de poñer o seguinte,

sen ningún medo nin temor.

______________________________

XOVES 16 FEBREIRO 2023

 

Mandadiño obrigatorio,

logo chegas ao teu final,

neste penúltimo día

a Paquiño imos mirar.

 

Na extremidade inferior,

coas dúas coas que andamos,

novamente colocarás,

levándoo a todos lados.

______________________________

 

Hoxe xa non hai que pensar,

pois fúchelo preparando,

en plástica e en titoría,

estiveches argallando.

 

Temática de animación

e filmes moi coñecidos

dende Mickey Mouse a Star Wars,

desfilaremos xuntiños.

DÍA DA PAZ (30/01/2023)

Lun, 06/02/2023 - 16:56

O pasado 30 de xaneiro conmemoramos no centro o Día da Internacional da non Violencia e da Paz.

Por un lado, todo o alumnado pegou a palabra Paz nalgún dos idiomas a escoller (castelán, inglés, árabe, ruso, hebreo e xaponés), pegándoo no mural da “Canción da Paz” (de Benny Berman-Amart) que cantamos xunto con outras dúas cancións en inglés que reivindican a Paz: “I´ve got the peace in my fingers” (de Susan Salidor) e “We want peace” (de Lenny Kravitz), acompañados ao piano polo noso Mestre de Música.

Posteriormente, todo o alumnado, e algunhas familias que se animaron e puideron vir, participamos na 19ª edición de “Kilómetros de Solidariedade”, proposta pola ONG “Save the children”, cuxo obxectivo é axudar a nenas e nenos afectados polas guerras. Superamos o reto dos 12 km e recadáronse 231,59 eur!!!

PAZ

PEACE

سلام /salaam/

МИР /mir/

שָׁלוֹם /shalom/

平和 (へいわ) /heiwa/

DÍA INTERNACIONAL DA EDUCACIÓN (24/01/2023)

Lun, 06/02/2023 - 16:53

O pasado 24 de xaneiro conmemoramos o Día Internacional da Educación. Tratouse dunha actividade proposta e impulsada pola ANPA do centro e en colaboración coa Coord. de Actividades Complementarias e Extraescolares. Cada grupo de alumnado traballou con Rosa Bao (ONG @ama.nepal ) sobre a diversidade que representa a Carta dos Dereitos Humanos.

SERVIZO DE ATENCIÓN TEMPERÁ

Mar, 08/11/2022 - 16:44

Betanzos, xunto cos concellos de Paderne e Oza-Cesuras, ven de poñer en marcha o servizo de atención temperá, o que permitirá que a veciñanza non  teña que desprazarse á unidade de referencia que lles correspondía ata o de agora, ubicada no Hospital Materno Infantil Teresa Herrera de A Coruña.

A atención temperá é un conxunto de intervencións dirixidas á poboación infantil de 0 a 6 anos, á súa familia e ao seu contorno, e que ten por obxectivo dar resposta o antes posible ás necesidades transitorias ou permanentes que presentan os nenos e as nenas con trastornos no desenvolvemento ou en risco de padecelos, para facilitar o desenvolvemento da súa autonomía persoal e a inclusión social.

Pódese acceder á información completa PREMENDO NA IMAXE.

Distribuir contido


by Dr. Radut