O conselleiro de Cultura e Educación presenta o proxecto ‘E-Lectores nas Bibliotecas Escolares’ como reforzo do Plan LÍA

Xesús Vázquez Abad salientou a importancia de que o alumnado coñeza de primeira man os novos soportes de lectura

Mér, 20/02/2013 - 11:51
O conselleiro de Cultura e Educación presenta o proxecto ‘E-Lectores nas Bibliot
O conselleiro de Cultura e Educación presenta o proxecto ‘E-Lectores nas Bibliotecas Escolares’ como reforzo do Plan LÍA

O conselleiro de Cultura, Educación e Ordenación Universitaria, Xesús Vázquez Abad, presentou hoxe na Cidade da Cultura de Galicia o proxecto piloto ‘E-Lectores nas bibliotecas escolares’ (E-LBE)’, unha nova liña do Plan LÍA 2010/2015 de bibliotecas escolares (Lectura, Información, Aprendizaxe). Este novo eixo de actuación, que reforza os plans da Consellería nesta materia, busca que profesorado e alumnado coñezan de primeira man os novos soportes e dean conta das posibilidades que ofrecen para a mellora da competencia e dos hábitos de lectura entre os máis novos.

Durante o acto, no que estivo acompañado polo director xeral de Centros e Recursos Humanos, José Manuel Pinal, o conselleiro salientou a necesidade de que o alumnado galego coñeza, de primeira man, os novos soportes de lectura e ás experiencias lectoras que ofrecen coa orientación do profesorado. Así mesmo salientou a oportunidade que supón para a equiparación de recursos culturais entre a Galicia rural e a urbana.

Resposta ás novas tendencias

O conselleiro explicou que o proceso de transformación da biblioteca escolar impulsa tamén que se muden algunhas prácticas educativas e se introduzan as metodoloxías innovadoras nos centros de ensino. Neste sentido destacou que proxectos como o E-LBE procuran respostas ás novas necesidades, adaptándose ás novas tendencias en aprendizaxe, que pasan pola participación, a colaboración, e as novas formas de acceder á información e de construír o propio coñecemento. Todo isto contribúe, tal e como sinalou Vázquez Abad, á universalización dun modelo de biblioteca que está demostrando ser útil, contribuír a adquisición de competencias básicas no alumnado e fomentar a lectura entre os distintos sectores da comunidade educativa.

Así mesmo, o conselleiro agradeceu o labor do profesorado e o compromiso das comunidades educativas na formación dos máis novos a través de esta e outras experiencias que se están a levar a cabo en bibliotecas escolares por toda a xeografía galega.

Experiencia nos centros

Como primeira actuación deste proxecto piloto hoxe entregáronse lectores electrónicos a 25 centros educativos. Estes soportes pasarán a formar parte do equipamento da biblioteca escolar e serán os propios centros os que establezan as normas de uso dos mesmos, así como a posibilidade de poder realizar os préstamos de libros dixitais. A Consellería repartiu entre os centros seleccionados unha guía con información sobre a posibilidade de uso destes soportes e enlaces web para a descarga legal de libros electrónicos gratuítos.

Cómpre salientar que os lectores son de tipo tinta electrónica polo que, a diferenza de outros dispositivos, non emiten luz propia. Deste xeito, a experiencia de lectura é moi similar á do papel e pouco agresiva para a vista.

Centros seleccionados

Unha vez analizadas todas as solicitudes, a Consellería seleccionou os centros de entre os integrados no Plan de Mellora de Bibliotecas Escolares (PLAMBE), tendo en conta o compromiso da comunidade educativa coa biblioteca como espazo de lectura e de aprendizaxe. Ademais, deuse prioridade aos centros do rural, procurando unha distribución axeitada por todo o territorio galego.

Os centros seleccionados colaborarán coa Consellería na elaboración dun informe ao finalizar o curso no que se valorarán os aspectos máis salientables que cómpre atender para introducir estes soportes de lectura nos centros educativos.

Os colexios e institutos que recibiron hoxe e-lectores son os seguintes:

Centro

Concello

Provincia

CEIP Víctor Sáenz

Mazaricos

A Coruña

CEIP Milladoiro

Malpica de Bergantiños

A Coruña

CEIP dos Muíños

Muxía

A Coruña

IES de Ponteceso

Ponteceso

A Coruña

CEIP de Présaras

Vilasantar

A Coruña

CPI de San Sadurniño

San Sadurniño

A Coruña

IES de Monterroso

Monterroso

Lugo

CPI Luís Díaz Moreno

Baralla

Lugo

CEIP Pedro Caselles Rollán

Xove

Lugo

CPI Poeta Uxío Novoneira

Folgoso do Courel

Lugo

IES Gregorio Fernández

Sarria

Lugo

CEIP Plurilingüe da Pontenova 

A Pontenova

Lugo

IES Plurilingüe Fontem Albei

A Fonsagrada

Lugo

IES Lagoa de Antela

Xinzo de Limia

Ourense

CEIP Condesa de Fenosa

O Barco de Valdeorras

Ourense

CEIP Nosa Señora de Xuvencos

Boborás

Ourense

CEIP Plurilingüe de Vilar de Barrio

Vilar de Barrio

Ourense

CEIP de Oímbra

Oímbra

Ourense

IES Xesús Taboada Chivite

Verín

Ourense

IES de Sanxenxo

Sanxenxo

Pontevedra

CEIP de Agolada

Agolada

Pontevedra

CEIP Manuel Cordo Boullosa

Ponte Caldelas

Pontevedra

CEIP de Figueroa

A Estrada

Pontevedra

CEIP Nosa Señora das Dores

Forcarei

Pontevedra

CEIP de Silleda

Silleda

Pontevedra

Reforzo do Plan LÍA

'E-LBE' é unha nova liña do Plan LÍA cuxo obxectivo é apoiar aos centros educativos diante das transformación que se están a producir na forma de presentar os textos, en boa medida relacionadas coas novas tecnoloxías.

Este proxecto piloto é unha oportunidade para que o alumnado teña acceso a estes recursos electrónicos, aínda en pleno desenvolvemento, e as diferentes experiencias lectoras que ofrecen. Do mesmo xeito, o profesorado poderá familiarizarse cos E-lectores e afondar nas súas posibilidades para o traballo na clase, para o préstamo e para o fomento do hábito lector entre os estudantes.