Un total de 686 centros participan este curso en 44 programas educativos temáticos do Plan Proxecta

Un total de 686 centros participan este curso nos diferentes programas educativos que a Xunta de Galicia integra no Plan Proxecta, o conxunto de iniciativas formativas en distintos ámbitos que ofertan as consellerías do Goberno galego en colaboración con outras institucións.

No Portal Educativo poden consultarse xa os centros participantes incluídos na resolución definitiva. Nela constátase un incremento de 59 centros co respecto ao pasado curso escolar, o que supón un crecemento do 9%. En total, o alumnado implicado participará en 44 programas de temáticas moi diversas, en función do interese dos propios centros. Para levalos a cabo, contará coa participación de 8102 docentes en toda a Comunidade.

A oferta de actividades, que complementa os currículos educativos, está relacionada cos ámbitos da saúde, a alimentación, a actividade física, a ciencia e a tecnoloxía, a lingua, o patrimonio, a solidariedade, o medio ambiente, o desenvolvemento sustentable, a igualdade, o consumo responsable, o voluntariado, a interculturalidade, a convivencia, a educación emocional, a normalización lingüística e os dereitos da infancia ou a mobilidade.

Como novidade, este ano súmase ao Plan Proxecta o programa Cóntame un conto, impulsado pola Consellería de Cultura en colaboración co Arquivo do Patrimonio Oral da Identidade do Museo do Pobo Galego. O programa persegue promover a actividade de contar contos tradicionais entre os escolares para aproveitar as súas posibilidades educativas, promover o coñecemento da literatura popular galega de transmisión oral e incorporar a tradición de contar contos ás actividades públicas dos centros escolares.

Por número de participantes, o programa con máis número de centros integrados é, un ano máis, Proxectos de vida activa e deportiva, que promove o incremento diario de actividade física que realiza o alumnado. A distribución por programas é a seguinte: