A Consellería de Educación dotou de conexión á internet de alta velocidade a 159 centros educativos

Un total de 159 centros educativos de Galicia dispoñen neste curso dunha velocidade de conexión á internet de 100 Megabites por segundo, grazas ás melloras realizadas na conectividade de colexios e institutos públicos galegos por parte da Consellería de Educación e Ordenación Universitaria e a Secretaría Xeral de Modernización e Innovación Tecnolóxica. Estas accións de mellora, que forman parte do proxecto Abalar, véñense desenvolvendo desde o curso 2010/2011 enmarcándose na aposta que o Goberno galego fai pola integración das novas tecnoloxías da información e a comunicación (TIC) no ensino, co fin de impulsar progresivamente a mellora da calidade da educación.

Dos 159 centros que xa viron mellorada a velocidade da súa conexión ata os 100 Mbps, o 33% son colexios e institutos públicos integrados na rede Abalar, o que permite optimizar a experiencia de uso e o aproveitamento do equipamento co que se dota a estas aulas dixitais –encerado dixital interactivo, ordenador para o profesorado e ultraportátiles para os alumnos-.

No 2010 migraron a dita velocidade 91 centros, 26 deles Abalar; e no 2011 veñen de incorporarse a esta velocidade outros 68 centros de ensino, dos que 27 pertencen á devandita rede. Por provincias, 85 dos 159 centros pertencen á provincia da Coruña, 17 á de Lugo, 18 á de Ourense e 39 á de Pontevedra.

A Consellería de Educación ten ademais previsto migrar en xaneiro de 2012 outros 13 centros a esta velocidade, co fin de continuar a mellorar a conectividade de colexios e institutos públicos. Desta forma, contribúese a reforzar o programa de actuacións desenvolvido pola Xunta de Galicia para achegar as TIC ao ensino, a través de plataformas como o espazoAbalar, facilitando a intercomunicación dos membros da comunidade escolar -docentes, familias...- e poñendo a disposición dos usuarios recursos didácticos en formato multimedia.