Carmen Pomar visita nos Peares o alumnado da English Week organizada por Educación

A titular de Educación tamén se desprazou ao CEE Miño, en Ourense, onde a Consellería acomete unha reforma dos falsos teitos
Uns 1.125 alumnos de toda Galicia participan nestas estadías de inmersión lingüística en inglés que cada ano programa a Consellería e que son totalmente de balde para as familias
Os obxectivo desta iniciativa, enmarcada na Estratexia Galega de Linguas Extranxeiras, EDUlingüe 2020, é que os rapaces melloren as súas competencias en lingua inglesa
Durante unha semana os participantes compaxinan actividades educativas con outras lúdicas, que lles permiten poñer en práctica o uso deste idioma en situacións reais, sempre apoiados por profesorado nativo
Ven, 09/11/2018 - 12:07

A conselleira de Educación, Universidade e Formación Profesional, Carmen Pomar, visitou hoxe o alumnado que está participando na English Week, o programa de inmersión lingüística en inglés que cada outono organiza a Xunta de Galicia no Centro de Excelencia dos Peares, e que vai dirixido a estudantes de 6º curso de educación primaria e dos catro cursos de ESO co fin de que melloren as súas competencias neste idioma.

O obxectivo principal da iniciativa -no que participan arredor de 1.125 alumnos de toda Galicia entre outubro e novembro- é proporcionarlle ao alumnado unha actividade de inmersión lingüística que lle permita mellorar as súas destrezas de comprensión e expresión oral en lingua inglesa.

Para iso, organízanse tanto actividades académicas como de tempo libre e obradoiros, de tal xeito que se reforce a un tempo o programa ordinario do currículo dos alumnos e das alumnas e a convivencia entre eles, promovendo a comunicación en lingua inglesa entre os participantes. Trátase, por tanto, de que o alumnado poida desenvolver a súa comunicación en inglés nunha contorna real, estimulando a práctica do idioma e a súa utilización en contextos comunicativos máis amplos que os que permite o ámbito escolar.

A conselleira Carmen Pomar emprazou aos alumnos participantes (esta semana hai uns 100 rapaces de 5 colexios) a que aproveiten ao máximo a súa estancia nos Peares, tanto desde o punto de vista lúdico como desde o académico, xa que hoxe en día o coñecemento de idiomas “deixou de ser un valor engadido para converterse nun requisito imprescindible” no desenvolvemento profesional e ademais do enriquecemento persoal.

Enmarcadas dentro da Estratexia Galega de Linguas Estranxeiras, EDUlingüe 2020, as estadías son totalmente gratuítas para as familias, xa que a Consellería asume o custe das mesmas cunha partida de 544.500 euros destinados a sufragar os gastos de docencia e material escolar, de mantemento e aloxamento dos rapaces, a contratación dos monitores que os acompañan, as actividades culturais, deportivas e complementarias dos cursos, os certificados e os seguros correspondentes.

As estadías desenvólvense en sete quendas dunha semana de duración entre o 7 de outubro e o 24 de novembro. Deste xeito, os rapaces pasan unha semana de domingo a sábado en réxime de internado nun campamento con profesorado e monitores nativos en inglés, onde compaxinarán as actividades formativas con outras de carácter lúdico.

Centros participantes

Nesta estadía participan un total de 39 centros educativos públicos a razón de 17 centros da provincia da Coruña, 7 de Lugo, outros 7 de Ourense e 8 de Pontevedra.

En concreto, os centros participantes da provincia de A Coruña son: o IES Fernando Blanco de Cee, o IES Urbano Lugrís de Malpica de Bergantiños, o IES Plurilingüe Adormideras de A Coruña, o IES David Buján de Cambre, o IES Plurilingüe Pedra da Aguia de Camariñas, o IES Terra de Soneira de Vimianzo, o IES Sofía Casanova de Ferrol, o IES de Ortigueira, o IES Ferrol Vello de Ferrol, o CEIP Plurilingüe de Pedrouzos de Brión, o CEP Salustiano Rey Eiras de A Pobra do Caramiñal, o CEIP Plurilingüe Manuel Murguía de A Coruña, o CEIP Plurilingüe Os Casais de Fene, o CEIP Plurilingüe Ponte do Porto de Camariñas, o CEIP Plurilingüe San Marcos de Abegondo, o CEIP Plurilingüe Concepción Arenal de A Coruña e o CEIP Plurilingüe Alexandre Rodríguez Cadarso de Noia.

Da provincia lucense participan o CPI de Tino Grandío de Guntín, o IES Río Cabe de Monforte de Lemos, o IES Enrique Muruais de A Pontenova, o CPI Doctor López Suárez de O Saviñao, o IES Becerreá, o CEIP Plurilingüe San Miguel de Paradela e o CEIP Plurilingüe Santa Rita de Viveiro.

Pola súa banda, na provincia de Ourense benefícianse o CPI Virxe dos Remedios de Castro Caldelas, o CPI Antonio Faílde de Coles, o IES Xermán Ancochea Quevedo de A Pobra de Trives, o CEIP Plurilingüe O Ruxidoiro de Barbadás, o CEIP Plurilingüe Ben-Cho-Shey de Pereiro de Aguiar, o CEIP Plurilingüe dos Blancos e o CEIP Plurilingüe Eulogio Gómez Franqueira de San Amaro.

Por último, de Pontevedra participan nas estadías de inmersión lingüística os seguintes centros: o IES Plurilingüe Aquis Celenis de Caldas de Reis, IES Plurilingüe A Paralaia de Moaña, o IES Miguel Ángel González Estévez de Vilagarcía de Arousa, o CPI Curros Enríquez de Pazos de Borbén, o IES de Salvaterra do Miño, o CPI do Progreso de Catoira, o CEIP Plurilingüe Froebel de Pontevedra e o CEIP Torre-Illa de A Illa de Arousa.

Visita ao CEE Miño

Na xornada de hoxe a conselleira Carmen Pomar tamén visitou o Centro de Educación Especial Miño (na cidade de Ourense), onde mantivo un encontro cos responsables do centro, a quen informou da obra de renovación dos falsos teitos que se inicia hoxe e que suporá un investimento de 177.000 euros.

A renovación prodúcese despois do desprendemento dalgúns elementos destes falsos teitos. Como medida provisional, a Unidade Técnica da Consellería na provincia de Ourense decidiu demoler algúns dos teitos, aínda que os informes elaborados recomendan cometer a reposición do falso teito e da instalación de iluminación de forma inmediata, para evitar unha situación que impide o normal funcionamento do centro escolar.

A do CEE Miño enmárcase na rolda de visitas que está a realizar a conselleira a centros de ensino de toda Galicia para coñecer de primeira man as realidades das diferentes comunidades educativas e as súas necesidades, así como para comprobar o desenvolvemento dos programas educativos que se impulsan desde o seu departamento.

Nesta visita, a conselleira estivo acompañada do alcalde de Ourense, Jesús Vázquez Abad.