Inicio

Equipo de Dinamización Lingüística

DÍA DA POESÍA - 21 DE MARZO

Enviado por Zalaeta o Sáb, 25/03/2023 - 15:56

 

O día 21 realizamos o Roteiro da Poesía.Na actividade do Roteiro participou alumnado de 1º e de 2º da ESO do Club de lectura e do EDLG. Iniciamos o percorrido no Papagaio recitando poemas de Luísa Villalta (á beira dos que alí están expostos dela) e acompañounos a poeta Olga Patiño, quen recitou un poema que lle dedicou a Luísa Villalta; despois seguimos á Praza de España e máis tarde a María Pita, aquí recitouse o poema Lela, de Castelao; a seguir fomos á Real Academia Galega, onde Nuno García nos sorprendeu cantando un poema de Rosalía e Olga Patiño fixo referencia a Luz Pozo Garza, de quen recitou poemas; seguimos a onde estaba o antigo cárcere e a continuación fomos á casa de Rosalía de Castro, alí fixemos unha parada importante, porque se leron varios poemas. Subimos entón cara a rúa Sinagoga, onde lle demos unha sorpresa a Olga Patiño, porque varias alumnas recitaron un poema que Olga Patiño dedicou a Curros Enríquez, e especialmente recitaron nesta rúa porque aquí pasou a súa infancia a autora e constitúe un espazo moi importante para ela, emocionouse e animou ao alumnado a seguir sendo "LUZ, vós tamén sodes luz" -díxolles-. Paramos logo na Praza da Fariña e aquí recitamos os poemas que ficaban por ler, e, ademais, tivemos a sorte de que a autora recitou un poema inédito dela. Rematamos o roteiro cunha parada diante do letreiro das Irmandades da Fala na rúa da Franxa e posteriormente diante da igrexa de San Nicolás, aquí dúas alumnas leron cartas que se escribiron Rosalía de Castro e Manuel Murguia. A presentación levouna a cabo o alumno Óscar Lires.
 

EDLG - ESTÍBALIZ ESPINOSA

Enviado por Zalaeta o Mar, 14/03/2023 - 18:40

O venres 10 de marzo tivemos a sorte de poder rematar a actividade que se comezara o curso pasado con 1.º de Bacharelato. O alumnado de 1.º ESO C asistiu a unha charla sobre a Poesía e a Astronomía. Despois o mesmo alumnado realizou poemas e Estíbaliz Espinosa tróuxoos de novo para traballar con eles este venres.
Máis tarde 2.º da ESO A realizou poemas relacionados con imaxes da Terra de satélite. A verdade que ata houbo alumnado que traía preparado algún poema sobre o Mar, ben bonito, e que se animou a presentarllo á autora, quen o leu e a partir de aí algún grupo realizou poemas. Os temas foron diversos: sobre as imaxes que Estíbaliz presentaba sobre a Terra, sobre o mar, ...
Unha actividade marabillosa, na que conxugamos varios temas e aprendemos moito.
O noso agradecemento a @estibaliz.espinosa pola súa colaboración

BIBLIOTECA DE MONTE ALTO - EDLG

Enviado por Zalaeta o Xov, 29/12/2022 - 11:35

#ZALACANCELO 2022/2023

Enviado por Zalaeta o Lun, 21/11/2022 - 13:18

O venres pasado as votacións en Instagram Stories determinaron os #ZalaCancelos para este curso 2022/2023, o curso do noso #50aniversario.
Na categoría de ESO o gañador foi David A., de 3.° ESO A, con #ZaLaniversario e na categoría ciclos, Fran H. gañou coa súa proposta #ZalaFesta.
Parabéns aos dous, pronto nos poñeremos en contacto para darvos o voso premio!

ZALACANCELO 2022/2023

Enviado por Zalaeta o Lun, 24/10/2022 - 18:33

 

Por cuarto ano, o Equipo de Dinamización da Lingua Galega do centro convoca o concurso do #Zalacancelo. A través deste concurso elixiranse os dous cancelos que acompañarán ás publicacións en redes sociais no curso 2022/2022.
✔No 2019/2020 ensinamos ao mundo que somos #PeixesDeMoitoCoidado e lanzamos o #ÚneteÁOnda porque non hai quen nos pare!
✔No 2020/2021 fixemos do #ConDistanciaPeroXuntos o noso lema, amosando que sempre, sempre #ZalaetaCaraAdiante.
✔No 2021/2022 pisamos forte, #ZalaetándonoNOS e dicindo a todo o mundo que #ZalaetaSomosNós.
Para este curso tan especial, como non podía ser doutro xeito, a temática estará relacionada co noso 50 aniversario, valorándose a súa orixinalidade, corrección ortográfica e representatividade para o centro.
✅️ Haberá dúas categorías: para a ESO e para Bacharelato+Ciclos Formativos.
✅️ Cada persoa pode aportar dous #zalacancelos, a través do correo electrónico edlg@zalaeta.gal ou na caixa do correo situada na entrada do instituto, indicando nome e apelidos e curso.
✅️ Prazo para participar: ata o venres 4 de novembro.
✅️ O 9 de novembro publicaranse en Instagram os dous finalistas para cada categoría
✅️ A votación realizarase o venres 11 a través de Instagram Stories, ata as 23.59h.
✅️ Premio: un vale de 30euros para a Fnac para cada categoría. Contémplase a posibilidade de conceder accésits.
Participa!!

17 DE MAIO: LETRAS GALEGAS

Enviado por Zalaeta o Mér, 18/05/2022 - 15:09

 

Celebramos este día das nosas letras con diversas actividades. Unha, xincana polo instituto para coñecer máis a Florencio Delgado Gurriarán, murais e traballos sobre o autor realizados por 1.° e 2.° da ESO, e expostos coa colaboración de 3.°B da ESO, e xogos sobre os libros que se leron este ano e sobre as persoas ás que se lles dedicou o Día das Letras Galegas. Ademais, contamos coas visitas de Estíbaliz Espinosa e de Laura Romero.

Últimos Artigos

máis

Theme by Danetsoft and Danang Probo Sayekti inspired by Maksimer