Comezamos o primeiro trimestre deste curso 2022/2023 cunha apaixoante liga interna de Brilé entre todos os cursos do Chamoso Lamas que así quixesen participar.

Os encontros disputáronse entre 12 equipos compostos por un máximo de 6 xogadores, sendo de carácter mixto tanto en xénero como en idade, durante os recreos do luns, mércores e venres. Mesmo o claustro participou cun equipo que a piques estivo de chegar á final!

Mais o nivel estivo moi alto e só dous equipos chegaron á finalísima, dos cales tivemos aos campións da foto que podedes ver no álbum adxunto. Moitos parabéns!

No segundo trimestre comezaremos a liga interna de bádminton por parellas. Non vola perdades!

Álbum: CURSO 2022/2023 -> Ligas deportivas

Sete distinguidas alumnas de 1º de Bacharelato fixeron este xoves un roteiro de case 13 kilómetros polo famoso percorrido dos Arrieiros.

A andaina partiu do Instituto, dende o cal partimos cara Pazos de Arenteiro pasando por diferentes vilas onde puidemos escoitar os comentarios do profesor Ricardo sobre a historia da rexión.

Pese a que o día foi caluroso, tamén tivemos tempo de refrescarnos a carón da ponte dos franceses, antes de coller o bus de volta ao instituto.

Álbum: CURSO 2021/2022 -> EF - Roteiro a Pazos de Arenteiro

Na xornada de hoxe, 15 de xuño, uns 30 alumnos do curso de 3º da ESO realizaron unha carreira de orientación no circuíto permanente de Cenlle (Ourense). 

En grupos de 2-3 alumnos, cada un co seu mapa e as súas respectivas follas de control, tiveron que atopar cada unha das 14 balizas indicadas para o percorrido de categoría "longo doado". 

O certo foi que debido ás recentes choivas e o calor da última semana os nosos alumnos non o tiveron fácil para localizar algunhas das balizas, xa que a herba medrou moito e estas estaban ben agochadas entre a frouma. Con todo, o día nubrado fíxonos a tarefa máis doada, xa que evitamos o calor sofocante de dias previos. 

Ao rematar a carreira os alumnos aínda tiveron posibilidade de ter un anaco de tempo libre para xogar ao balón ou remollarse no espazo termal que dispoñen xunto ao comezo do circuíto. 

Álbum: CURSO 2021/2022 -> EF - Orientación en Cenlle