A Consellería de Educación e a ONCE informarán aos centros dos recursos dispoñibles para atender ao alumnado con discapacidade visual

Os centros que conten con estudantes que teñan estas necesidades educativas específicas recibirán información sobre as posibles actividades de formación
Mar, 09/03/2010 - 14:37
José Luis Mira e Jose Ángel Abraldes Rodeyro
José Luis Mira e Jose Ángel Abraldes Rodeyro

A Consellería de Educación e Ordenación Universitaria, en colaboración coa Organización Nacional de Cegos Españois (ONCE) informará aos centros educativos que contan con alumnado con discapacidade visual dos recursos e actividades desenvolvidas para dar resposta a estas necesidades educativas específicas. O director xeral de Educación, Formación Profesional e Innovación, José Luis Mira, asinou hoxe a comunicación, xunto co director do Centro de Recursos Educativos da ONCE, Jose Ángel Abraldes Rodeyro

O obxectivo da citada comunicación é o de informar aos centros que contan con alumnado con discapacidade visual respecto das actuacións dos profesionais dos equipos específicos mixtos e de como estes colaboran nas atencións educativas xerais mediante aspectos específicos da deficiencia visual, como poden ser accións de apoio xeral ao alumnado; transcrición elaboración e adaptación de material; ou adaptación do posto de estudo ás súas necesidades específicas.

Así mesmo, dáse conta da oferta de actividades de formación para o profesorado, entre as que destacan xornadas de portas abertas, os recursos da biblioteca técnica da ONCE e outras ferramentas que están a disposición de todas as persoas que, dunha forma ou doutra, teñen relación co alumnado con discapacidade visual.

Esta iniciativa de colaboración impulsada pola Consellería de Educación coas administracións, neste caso a ONCE, significa un paso máis na formación das persoas, na procura da plena integración educativa do alumnado favorecendo a súa inserción na sociedade e polo tanto no mercado laboral.