O Centro Ramón Piñeiro analiza nunha xornada o seu papel como depositario de legados científicos

O secretario xeral de Política Lingüística, Valentín García, participou esta mañá no acto de inauguración da terceira das xornadas con que o Centro Ramón Piñeiro para a Investigación en Humanidades (CRPIH) celebra os seus 25 anos de existencia, e que se desenvolven baixo o título “O Centro Ramón Piñeiro como recuperador de fondos e despositario de legados”. No acto, que tivo lugar no Pazo de San Roque, sede do CRPIH, o secretario xeral estivo acompañado polo coordinador científico do centro, Manuel González, e polo profesor Mathias Untermann, quen hai agora un ano lle fixo entrega ao Piñeiro do legado científico de seu pai, o lingüista alemán Jürgen Untermann.

Valentín García atribuíulle “ao traballo serio e constante dos investigadores do Piñeiro durante os últimos 25 anos” o feito de que o centro se convertese recentemente “en depositario de legados tan relevantes nos ámbitos da lingüística e da literatura como os de Aníbal Otero, Elixio Rivas, Jürgen Untermann ou, aínda non hai ben dous meses, Luísa Villalta” e asegurou que “o CRPIH responderá a esta confianza coa custodia, o estudo e difusión dos materiais que constitúen os ditos legados”. O secretario xeral puxo este labor en relación co de recuperación de publicacións e de textos dispersos e de difícil acceso para poñelos a disposición de investigadores e de público interesado “que esta institución leva facendo desde a súa creación”.

Xornada de análise dos legados recibidos

No último ano, o Centro Ramón Piñeiro fíxose depositario de catro relevantes legados: os dos lingüistas Jürgen Untermann, Elixo Rivas e Aníbal Otero e o da escritora Luísa Villalta. A analizar a relevancia destes legados e o papel do Centro Ramón Piñeiro na súa custodia e estudo dedicouse esta xornada.

O encontro abriuse cun relatorio de Luís Alonso Girgado, quen disertou sobre “A importancia do Centro Ramón Piñeiro na visibilización e accesibilidade de fondos históricos importantes da cultura galega”. Seguiron a esta intervención outras dúas, dos profesores Carlos Búa Carballo e Virgilio García Trabazo, centradas na figura do profesor Jürgen Untermann e a súa transcendencia para o coñecemento da realidade lingüística prerromana da península Ibérica. Tras un breve descanso, Ramón Mariño falou sobre “Elixio Rivas, o lingüista apaixonado pola nosa cultura material” e Antón Santamarina sobre “Aníbal Otero, unha figura clave no coñecemento do léxico e da dialectoloxía galega”. A xornada pechouse co relatorio de Armando Requeixo “O legado de Luísa Villalta, escritora referencial na literatura galega de entre séculos”.

25 anos do CRPIH

O CRPIH é un organismo dependente da Secretaría Xeral de Política Lingüística que se ocupa de levar adiante e de difundir proxectos de investigación lingüística, literaria, histórica e antropolóxica centrados en Galicia. Para conmemorar os seus 25 anos de actividade, ao longo de 2018 está a desenvolver un programa de actos conmemorativos que inclúe unha conferencia inaugural, catro xornadas temáticas e unha conferencia de clausura nas que se trata de dar a coñecer ao público a historia do centro, a transcendencia da investigación levada a cabo nel e o recoñecemento da súa centralidade dentro da pescuda en humanidades posta de manifesto nos legados de investigadores importantes, dos que o CRPIH é depositario.

Todas as actividades programadas celébranse no salón de actos do pazo de San Roque, sede do Centro. O programa completo pode verse en www.lingua.gal e en www.cirp.gal