Educación e Concello de Meaño asinan un acordo para construír un novo comedor no CEIP de Coirón-Dena
O obxectivo é realizar as obras o vindeiro ano para que o novo espazo poida comezar a funcionar no curso 2017/2018
A Consellería estende a colaboración que xa mantiña co Concello, con quen renova convenios curso a curso para xestionar o comedor escolar do dito centro
O conselleiro de Cultura, Educación e Ordenación Universitaria, Román Rodríguez, e mais a alcaldesa de Meaño, Lourdes Ucha, asinaron hoxe un acordo para planificar a construción dun novo espazo no CEIP de Coirón-Dena no que se localizará o comedor escolar. Trátase dunha actuación que permitirá mellorar e ampliar as instalacións actuais dedicadas a tal servizo no centro. Á sinatura asistiu tamén o delegado da Xunta en Pontevedra, José Manuel Cores Tourís; e o xefe territorial da Consellería na provincia, César Pérez Ares.
O obxectivo, tal e como explicou o titular do departamento educativo da Xunta de Galicia, pasa por comezar cos traballos o vindeiro ano co fin de que as novas instalacións poidan entrar en funcionamento no curso 2017/2018.
Colaboración interadministrativa
Este novo acordo co Concello de Meaño vén a afianzar a colaboración continua que manteñen as dúas administracións en materia de servizos educativos. De feito, desde o curso 2013/2014, a Consellería e mais o Concello veñen asinando convenios de colaboración para a prestación do servizo de comedor escolar no dito centro.
Deste xeito, e en virtude destes convenios regulares, vixentes tamén para o vindeiro curso 2016/2017, o Concello asume a xestión e organización do comedor escolar, mentres que a Xunta achega o financiamento correspondente para garantir a calidade no servizo.